Baibolo Ilaalula Abantu

CINSHI calengele ukuti shibulimi uwalelima sana fwaka aleke iyi ncito no kuleka ukusumina mu fyo asuminemo pa myaka iingi? Cinshi calengele umwanakashi cakolwa ukuti aleke bucakolwa ne misango imbi iyabipa? Yumfwileni ifyo abene balondolola.

“Nalitemwa pa kuba muli ulu lupwa ulukalamba.”—DINO ALI

UMWAKA BAFYELWE: 1949

ICALO: AUSTRALIA

IFYO BALI: BALELIMA SANA FWAKA

INKULILO YANDI: Mu 1939, abafyashi bandi balikuukile ukufuma ku Albania ukuya ku Australia no kuyaikala mu Mareeba, itauni ilinono ilyaba mu citungu ca Queensland. Muli ici citungu mwaleikala abantu abafumine ku fyalo fyalekanalekana pamo nga ku Bosnia, ku Greece, ku Italy, na ku Serbia, kabili baletele intambi ne misango yabo. Abantu abaleikala mu Mareeba balelima sana fwaka, kabili abafyashi bandi nabo e yo batendeke ukulima.

Tapakokwele, umukalamba wandi umwanakashi alifyelwe, pakonkele abakalamba bandi babili abaume, e lyo na ine nakonkapo. Ku ca bulanda, ilyo nali fye no mwaka umo batata balifwile ku bulwele bwa ku mutima. Bamayo balyupilwe na kabili no kukwata abana na bambi abaume bane. Bonse twakuliile pe farmu lya batata abaupile bamayo kabili nabo balelima fwaka.

Nafumine pa ng’anda no kutendeka ukuikalila ninshi nshilafisha ne myaka 20. Ilyo nacilileko fye imyaka 20 naupile Saime umuShilamu munandi. Balupwa lwandi bonse bali baShilamu. Nalibelengele Koran ne citabo icalelanda pali kasesema Muhammad. Kabili nalibelengele na Baibolo. Muli Koran balilanda pali bakasesema abo na Baibolo yalandapo, kabili ukubelenga Baibolo kwalingafwile ukwishiba ilyo aba bakasesema baliko.

Inte sha kwa Yehova baletutandalila no kutushiila bamagazini ne fitabo, kabili ine na Saime twaletemwa nga nshi ukubelenga ishi mpapulo. Ndebukisha amalyashi ayasuma ayalelanda pa mipepele ayo twalelanshanya ne Nte sha kwa Yehova. Lyonse nga baisa, balenjasuka amepusho ukubomfya Baibolo, tabalelanda fye ifya mu mutwe wabo. Ifi balecita fyalimfikile sana pa mutima.

 Ba Nte balenjeba ukuti ndesambilila nabo Baibolo kabili balendalika na ku kulongana kwabo, lelo lyonse nalekaana. Ico nalefwaisha kukwata ifarmu na bana abengi. Nshabalile nkwatapo ifarmu, lelo mu kuya kwa nshita naishilekwata abana 5 abo natemwa sana.

IFYO BAIBOLO YA-ALWILE UBUMI BWANDI: Palipitile imyaka 9 ukutula apo natendekele ukulanshanya ne Nte sha kwa Yehova, na lyo line natwalilile fye ne fyo nasuminemo. Nangu cali ifi, naletemwa ukupokako impapulo shabo no kushibelenga. Lyonse pa Mulungu, ine na Saime twalefwayako inshita ya kubelenga ishi mpapulo. Twalisungile magazini yonse iyo baletupeela pa myaka yonse iyi. Ifyalembelwe muli iyi magazini fyalinkoseshe ilyo abantu batendeke ukwesha icitetekelo candi icaleya cilekulilako.

Ku ca kumwenako, shimapepo umo uwa ku Evangelical alempatikisha ukuti mpokelele Yesu ngo Mupusushi wandi. Uyu shimapepo alyongwele ndume ya kwa Saime na munyinane umo. Tapakokwele, abanandi aba mu mipepele yalekanalekana batendeke ukumpatikisha ukuti ndepepa uko balepepa. Bamo balempeela impapulo umo balesuusha Inte sha kwa Yehova. Naebele aba abalesuusha Inte sha kwa Yehova ukuti banange muli Baibolo ifyo basuminamo ifyo balesambilisha, lelo balifililwe.

Ifi aba bantu balelanda pa Nte sha kwa Yehova fyalengele ukuti mfwailishepo na fimbi muli Baibolo na mu mpapulo isho ba Nte balendetela. Pa kulekelesha, nalikutulwike ukuti inshita ya kucitapo cimo pa fyo nalesambilila yalifikile.

Takwali Nte uwalensambilisha Baibolo, natendeke fye ukulalongana. Pa kubala, naleumfwa sana umwenso ne nsoni, lelo kuli uku kulongana kwaleba abantu abasansamuka, kabili naletemwa ifyo nalesambilila. Napingwilepo ukuba Inte ya kwa Yehova, kabili mu 1981, nalibatishiwe, ukulanga ukuti naliipeele kuli Lesa.

Umukashi wandi tansuushishe pali ifi napingwilepo, nangu ca kuti limo alemona kwati ba Nte balembeleleka fye. Na lyo line, ubushiku nalebatishiwa, alishile. Nalitwalilile ukumushimikilako ifintu ifingi ifyo nalesambilila muli Baibolo. Bushiku bumo ilyo twalefuma mu kutandala, ninshi palipita nalimo umwaka umo ukutula apo nabatishiwilwe, Saime, anjebele ukuti alefwaya ukuba Inte ya kwa Yehova. Ala nalipapile nga nshi ilyo naumfwile aya mashiwi! Mu 1982, na o alibatishiwe.

Tacayangwike ukwalula imikalile yesu. Nalilekele ukulima fwaka pantu ukucite fi kwalipusana ne fyo Baibolo ilanda. (2 Abena Korinti 7:1; Yakobo 2:8) Palipoosele inshita pa kuti tusange incito iisuma, iishalelwishanya ne fyo Baibolo ilanda. Cimbi ca kuti, pa myaka iingi balupwa lwesu bamo balilekele ukututandalila. Nomba tatwabapatile, twalitwalilile ukubatemwa nge fyo Baibolo isambilisha. Mu kuya kwa nshita, twalitendeke ukumfwana na kabili, kabili balileka ukutukankamba.

IFYO NANONKELAMO: Ukupita mu mafya ayalekanalekana pamo nga ukupwisha insoni, amasakamika ya ndalama, nelyo ukucimfya ukukaanya kwa balupwa, kwalinsambilisha  ukuti Yehova Lesa alantekanishisha ilyo alengafwa ukucimfya aya mafya. Ku ca kumwenako, ino nshita nine eluda kabili ilingi ndasambilisha mu cilonganino. Ukusambilisha kucili kulankosela pa mulandu wa kuti ndabulubusa sana nga naumfwa umwenso. Lelo ndabomba uyu mulimo pantu ndapepa lyonse kuli Yehova kabili na o alangafwa.

Ino nshita, ine no mukashi wandi twalitemwana icine cine, kabili twalikatana nga nshi. Pa kubala tatwaishibe ifya kukusha bwino abana lelo twalyeseshe na maka ukubasambilisha icine ca mu Baibolo ico twasambilile. (Amalango 6:6-9) Na kuba, umwana wesu umukalamba no mwina mwakwe babomba umulimo wa bumishonari.

Ndebukisha icacitike bushiku bumo ilyo bonse mu lupwa twatendeke fye ukulongana ne Nte sha kwa Yehova. Pa numa ya kwimika motoka pa nse, naloleshe mu kati ka Ng’anda ya Bufumu, e lyo naipwishe abakashi bandi na bana ati: “Bushe namumona abantu bali mulya?” Mu Ng’anda ya Bufumu mwali abantu abafumine ku fyalo fyalekanalekana, abapusene inkulilo, intambi, ne mitundu. Mwali aba Aborigine, mwali abafumine ku Albania, ku Australia, na ku Croatia. Nangu cingati bali abapusanapusana, bali aba nsansa kabili bali fye nga ba bwananyina. Nalitemwa pa kuba muli ulu lupwa ulukalamba ulwa ba bwananyina, ulushaba fye mu Australia, lelo ulwaba mwi sonde lyonse fye.—1 Petro 5:9.

“Abakalamba bandi tabalekele ukunkoselesha.”—YELENA VLADIMIROVNA SYOMINA

UMWAKA BAFYELWE: 1952

ICALO: RUSSIA

IFYO BALI: BALI NI BACAKOLWA, BALEFWAYA NO KUIPAYA

INKULILO YANDI: Nafyalilwe mu Krasnogorsk, umusumba unono umushali ulukakaala, uwabela mupepi no musumba ukalamba uwa Moscow. Bamayo na batata bali ni bakafundisha. Nalikwete sana amano ku sukulu kabili nalisambilile ukulisha ifilimba no kwimba. Calemoneka kwati ifintu fyali no kungwamina sana ku ntanshi.

Ilyo naupilwe, uko twakukiile na balume bandi abantu baletukana sana insele, ukunwesha ubwalwa no kupeepa fwaka. Nshailwike ukuti na ine wine kuti nayambulako iyi mibele. Pa kubala, naleya ku maparte mu kwimba fye no kulisha icilimba ca nsale. Lelo nga ndi kulya abantu balefwaya ukuti tulenwena pamo no kupeepa fwaka. Tapakokwele, natendeke ukunwesha ubwalwa.

Ukunwesha ubwalwa kwatendeke ukungonaula. Palipitile inshita pa kuti nkunkume ku bwalwa kabili ilyo nakunkwime, nalilekele no kulya. Nalefwaya fye ukufwa, kabili inshita imo nalyeseshe fye no kuipaya. Ndatasha Yehova ukuti nshafwile.

Ilyo nalepita mu mafya yonse aya, abakalamba bandi abanakashi balentandalila lyonse. Balisangwike Inte ya kwa Yehova, kabili bale-esha ukunondolwelako ifyo Baibolo ilanda ifingangafwa.  Nshatemenwe ifya mu Baibolo, e co pa kubala nalecita ifintu ifya kulenga baleke ukuntandalila. Lelo tabalekele. Balintekanishishe nga nshi kabili balitwalilile ukuntemwa ica kuti nasukile nasumina ukulasambilila Baibolo.

IFYO BAIBOLO YA-ALWILE UBUMI BWANDI: Ilyo natendeke ukusambilila Baibolo, napingwilepo ukuleka ukunwa ubwalwa. Pali iyi yine nshita, umwina mupalamano umo umwaume uwakolelwe alinsanshile no kumpuma icabipisha. Nalilwele sana ica kuti balintekele na mu cipatala. Imbafu 4 shalikontweke, kabili ne linso lyandi limo lyalyonaike. Nomba ukwikala mu cipatala kwalingafwile ukulekelela ukunwa ubwalwa, pantu nangu ndwale shani pa mulandu wa kukananwapo ubwalwa, takwali uko nali no kubufumya.

Pali iyi nshita, nalepepa lyonse kuli Lesa. Amashiwi yalensansamusha sana ni yalya yalembwa mwi buuku lya Inyimbo sha Bulanda 3:55, 56, ayatila: “Nalilila kwi shina lyenu, mwe Yehova, ukufuma mu cilindi icashika nga nshi. Umfweni ishiwi lyandi. Mwifisa ukutwi kwenu pa kuti munjilululeko, no kumfwa ukulila kwandi.”

Nalishininkishe ukuti Yehova alyaswike amapepo yandi. Alimpeele amaka ya kukanabwelela ku misango yandi iya kale. Kwaleba inshita shimo ilyo nalefwaisha ukunwapo ubwalwa na kabili. Lelo icaweme ca kuti nshatalile nwapo na kabili.

Ilyo natwalilile ukusambilila Baibolo, naishileishiba ukuti mfwile ukulanakila abena mwandi pantu e mutwe wa lupwa. (1 Petro 3:1, 2) Ici tacayangwike pantu nine nale-eba abena mwandi ifya kucita. Nalipepele kuli Yehova ukuti angafwe. Palipoosele inshita pa kuti njaluke, lelo mu kupita kwa nshita nasukile na-aluka, naishileba umukashi umusuma uwalenakila abena mwandi.

Ilyo abena mwandi bamwene ifyo na-alwike, balipapile nga nshi. Ukufika na pali iyi nshita, tabalefwaya ukusambilila Baibolo. Nomba ilyo napingwilepo ukuleka ukupeepa fwaka, batile: “Nga waleka ukupeepa fwaka, e lyo nkatendeka ukusambilila Baibolo!” Twalekele ukupeepa fwaka pa bushiku bumo bwine.

IFYO NANONKELAMO: Abena mwandi balitendeke ukusambilila Baibolo nga filya fine balandile. Ino nshita tulabelengela pamo Baibolo cila bushiku, tulatontonkanya sana pa fyo tubelenga, kabili tulesha na maka ukulakonka ifyo tusambilila.

Ala mwandini na mashiwi ya kulondolola ifyo imikalile mu lupwa lwesu yawama kuti yabula, pali bufi ifyo nanonkelamo pa lwandi! Ndatasha Yehova pa kundeta mu cilonganino cakwe. (Yohane 6:44) Na kabili ndatasha na bakalamba bandi abashalekele ukunkoselesha. Ici calenga nsumine ukuti cine cine Baibolo ilaalula abantu.

[Amashiwi pe bula 11]

Nalikutulwike ukuti inshita ya kucitapo cimo pa fyo nalesambilila yalifikile

[Amashiwi pe bula 13]

Abakalamba bandi balintekanishishe nga nshi kabili balitwalilile ukuntemwa ica kuti nasukile nasumina ukulasambilila Baibolo