“Ine Nshakakulabe”
Palameni Kuli Lesa
“Ine Nshakakulabe”
BUSHE cine cine Yehova alasakamana abantu bakwe? Nga alabasakamana, ninshi finshi ifilanga ukuti cine cine alabasakamana? Ifyo Lesa umwine aalanda e fingatwafwa ukwishiba amasuko kuli aya mepusho. Yehova alitweba muli Baibolo ifyo omfwa pa bantu bakwe. Natulande pa mashiwi yalembwa pali Esaya 49:15.
Pa kulanga ukuti cine cine alasakamana abantu bakwe, Yehova abomfeshe Esaya ukulanda icilangililo icingatufika sana pa mutima. Yehova abalile aipusha icipusho icingalenga umuntu atontonkanyapo sana. Aipwishe ukuti: “Bushe umwanakashi kuti alaba umwana wakwe uonka ica kuti afilwa ukumfwila uluse umwana uwafuma mwi fumo lyakwe?” Umuntu nga abelenga fye ici cipusho kuti amona kwati icasuko cintu cayeba. Bushe umwanakashi uonsha kuti alaba shani umwana wakwe? Umwana ashintilila pali nyina lyonse fye, kabili nga kuli ifyo alefwaya, alalila pa kuti nyina amusakamane! Lelo muli ici cipusho Yehova aipwishe, fingi fyasanshiwamo.
Mulandu nshi umwanakashi onsesha umwana no kumusakamana? Bushe kufwaya fye ukuti umwana atalale? Awe. Mu cifyalilwa fye nyina alomfwila uluse “umwana uwafuma mwi fumo lyakwe.” Ishiwi lya ciHebere ilyo bapilibula ukuti “ukumfwila uluse” lipilibula no kuti “ukubelela uluse.” (Ukufuma 33:19; Esaya 54:10) Kuti lyapilibula no kuba ne nkumbu ku balekabila ubwafwilisho. Umufyashi uwakwata umwana uonka, alaba sana ne nkumbu ku mwana wakwe.
Lelo ku ca bulanda, te banacifyashi bonse abomfwila uluse abana babo abonka. Yehova atile, “kwena aba banakashi kuti balaba.” Tuleikala mu calo umo abaume na banakashi abengi ‘bashaba ne cishinka, bashatemwa abantu.’ (2 Timote 3:1-5) Limo tulomfwa uko banacifyashi balekelesha abana babo, ukubacusha, nelyo fye ukubapoosa. Icitabo cimo calanda pa mashiwi yaba pali Esaya 49:15 ukuti: “Banacifyashi bantunse abashapwililika kabili limo ukutemwa batemwa umwana kuti kwapelebela. Nangu umuntu engaba shani no kutemwa, limo kuti kwapwa.”
Nomba Yehova atila: “Lelo ine nshakakulabe.” Kanshi kuti twamona umulandu Yehova aipushishe cilya cipusho calembwa pali Esaya 49:15. Muli ici cipusho Yehova taleilinganya ku mwanakashi uonsha. Yehova taba nga banacifyashi abashapwililika abafilwa limo ukumfwila abana babo uluse, ena takatale afilwa nelyo ukulaba ukumfwila uluse abamupepa. E mulandu wine kanshi icitabo tulandilepo kale calandile pa mashiwi yaba pali Esaya 49:15 ukuti: “Aya mashiwi e yacila pa mashiwi yonse ayalembwa mu Cipangano ca Kale ayalanga ukuti Lesa alikwatisha ukutemwa.”
Bushe tatusansamwike ukusambilila pa “luse lwa kwa Lesa wesu”? (Luka 1:78) Bushe teti mutemwe ukusambilila pa fyo mwingacita pa kuti mupalame kuli Yehova? Uyu Lesa uwaba no kutemwa alaya ababomfi bakwe ukuti: “Nshakakushe nakalya nangu ukukulekelesha nakalya.”—AbaHebere 13:5.
Amalembo ya kubelenga mu February:
