Baibolo Ilaalula Abantu

CINSHI shimakwebo umo uwa ku Scotland asangile ukuti e calemuletela sana insansa ukucila ubukwebo alecita? Cinshi calengele umwaume umwina Brazil ukuleka ubulalelale no kupeepa imiti ikola? Bushe umwaume umo umwina Slovenia acitile shani pa kuti aleke ukukolwa sana? Yumfwileni ifyo abene balondolola.

“Ifintu Fyalemoneka Ukunyendela Bwino.”—JOHN RICKETTS

UMWAKA BAFYELWE: 1958

ICALO: SCOTLAND

IFYO BALI: SHIMAKWEBO UMWINE MWINE

INKULILO YANDI: Nakuliile mu lupwa ulukankaala. Batata bali bashilika mu Britain kabili bali ne cifulo icikalamba, ne ci calengele ukuti tulekuukakuuka. Twaleikala mu Scotland, lelo twalikeleko na ku England, ku Germany, ku Kenya, ku Malaysia, ku Ireland, e lyo na ku Cyprus. Ukufuma fye ilyo nali ne myaka 8, natendeke ukusambilila ku masukulu ya kukuuka aya mu Scotland. Awe nasukile napwisha na masambililo pa Yuniversiti ya Cambridge.

Ilyo nafishishe imyaka 20, natendeke ubukwebo bwa kushitisha oilo, uko bafumya amafuta ya muli bamotoka na mafuta yambi. Nacitile ubu bukwebo pa myaka 8. Pa kubala, nalecitila ubu bukwebo mu South America, lyena naile ku Africa na pa kulekelesha naile ku Western Australia. Ilyo nakuukile ku Australia, nailepanga kampani yandi, lelo mu kuya kwa nshita nali-ishitishe.

Indalama nakwete ilyo nashitishe akampani shali ishingi ica kuti ilyo nali fye ne myaka 40 nalilekele ukubomba incito. Apo nomba nalekwata inshita, naleenda sana. Nalishingulwikepo icalo ca Australia imiku ibili na Honda, kabili nalishingulwikepo ne calo conse. Ifintu fyalemoneka ukunyendela bwino.

IFYO BAIBOLO YA-ALWILE UBUMI BWANDI: Na lintu nshilaleka incito, nalefwaya inshila ya kutashishamo Lesa pa bumi ampeele. Natampile ukupepa mwi Calici lya Anglican, umo nakuliile. Lelo ifingi ifyo balefunda, tafyalefuma mu Baibolo. Lyena, natampile ukusambilila Baibolo na ba Mormon, lelo nalilekele ukusambilila pantu tabalefunda ifya mu Baibolo.

Bushiku bumo, ba Nte balishile pa ng’anda pa mwandi, kabili ilyo line fye nalimwene ukuti fyonse ifyo balesambilisha fyalefuma mu Baibolo. Ilembo limo ilyo bambelengele ni 1 Timote 2:3, 4, ilitila Lesa afwaya ukuti “abantu balekanalekana bakapusuke no kwishiba bwino bwino icine.” Ico natemenwe sana ku Nte sha kwa Yehova ca kuti tabalelanda fye pa kwishiba icine, lelo balekomaila pa kwishiba bwino bwino icine ca mu Baibolo.

 Ukusambilila Baibolo ne Nte sha kwa Yehova kwalingafwile ukwishiba bwino bwino icine. Ku ca kumwenako, nasambilile ukuti Lesa na Yesu tababamo batatu; lelo balipusana. (Yohane 14:28; 1 Abena Korinti 11:3) Nalitemenwe nga nshi pa kusambilila ici cine, icishayafya ukumfwa. Lelo nalifulilwe sana pa fyo naonawile amaka yandi ukusambilila icisambilisho ca bufi ica kuti muli Lesa umo mwaba batatu, icisambilisho icishumfwika no kumfwika!

Tapakokwele, nalitendeke ukulongana ne Nte sha kwa Yehova. Nalitemenwe nga nshi imibele yabo iisuma iyo bakwete e lyo ne fyo batemwa abantu. Ala aba bantu basuma icine cine. Ukutemwa kwabo ukwa kufuma pa nshi ya mutima kwalengele nashininkisha ukuti ninsanga ukupepa kwa cine.—Yohane 13:35.

IFYO NANONKELAMO: Pa numa ya kubatishiwa, naishibene no mukashana umusuma nga nshi, ishina lyakwe ni Diane. Abafyashi bakwe bali ni ba Nte, kabili ali ne mibele iingi iisuma iyo natemenwe. Ilyo papitile inshita, twalyupene. Yehova alimpaala nga nshi pa kumpeela Diane pantu alangafwa kabili munandi.

Ine na Diane twalefwaisha ukukuukila ku ncende ukushaba aba kushimikila imbila nsuma abengi. E ico mu 2010, twakuukile ku Belize, iyaba mu Central America. Tushimikila ku bantu abatemwa Lesa kabili abafwaisha ukumwishiba.

Naliba ne nsansa nga nshi pa kwishiba icine pali Lesa ne Cebo cakwe, Baibolo. Ifi mpoosa inshita iikalamba mu kushimikila, nalisambilisha abantu abengi Baibolo. Takwaba icawama ukucila pa kumona abo usambilisha Baibolo ba-aluka no kuba abantu abasuma, kwati ni filya fine cali na kuli ine. Nalisuka nalisanga inshila iisuma iya kutashishamo Lesa pa bumi ampeela.

“Bali Sana ne Cikuuku.”—MAURÍCIO ARAÚJO

UMWAKA BAFYELWE: 1967

ICALO: BRAZIL

IFYO BALI: BALI ABALALELALE

INKULILO YANDI: Nakuliile mwi tauni ilinono ilya Avaré, ku São Paulo. Abengi muli ili itauni balabomba incito.

Batata bafwile ninshi bamayo balinjimita. Ilyo nali umwaice, naletemwa ukufwala ifya kufwala fya bamayo nga tabalipo. Natendeke ukucita ifintu kwati mwanakashi, kabili abantu batendeke ukumona ati ndabembuka na baume banandi. Mu kuya kwa nshita, natendeke ukuulungana na balumendo banandi e lyo na baume abakulu.

Ilyo nalefisha imyaka 19, ninshi lyonse nalecita ubulalelale na bantu abapusanapusana, abaume na banakashi. Naleulungana na bo konse fye uko nabasanga, mu fikuulwa fya bwalwa, nangu ni mu macalici. Nga kuli ifiila ifikalamba, uko abantu balisha inyimbo no kucinda mu musebo, nalefwala ifya kufwala fya banakashi kabili nalecinda sana ica kuti nalilumbwike nga nshi.

Pa banandi nakwete, pali abalelaala na baume banabo, bacilende, na balebomfya imiti ikola. Abanandi bamo banjebele ukuti njeshepo ukubomfya cocaine, kabili tapakokwele nalikunkwime. Limo twalepeepa ubushiku bonse. Limbi na lyo, naleba fye neka kabili nalewisha akasuba konse  ndepeepa fye. Nalyondele sana ica kuti abantu baletila nalilwele AIDS.

IFYO BAIBOLO YA-ALWILE UBUMI BWANDI: Pali iyi yine nshita, nakumene ne Nte sha kwa Yehova. Bali sana ne cikuuku. Ilembo limo ilya mu Baibolo ilyo bambelengele ni Abena Roma 10:13, ilitila: “Onse uwalilila kwi shina lya kwa Yehova akapusuka.” Aya amashiwi yalengele naishiba bwino ifyo cacindama ukubomfya ishina lya kuti Yehova. Imiku iingi, nga napeepa cocaine ubushiku bonse, naleisula iwindo no kulolesha ku muulu no kupepa kuli Yehova ukuti angafwe, ninshi ndelila no kulila.

Naleumfwila bamayo uluse pantu balecula sana na matontonkanyo pa fyo naleyonaula ku miti ikola, e ico napingwilepo ukuleka ukupeepa. Tapakokwele, nalisumine ukulasambilila Baibolo ne Nte sha kwa Yehova. Ba Nte banjebele ukuti ukusambilila Baibolo kwali no kungafwa ukuleka ukubomfya imiti ikola. Kabili ifi fine e fyacitike!

Ilyo natwalilile ukusambilila Baibolo, nalishileiluka ukuti nalingile ukwalula imibele yandi. Icankosele sana ukuleka, kulaala na baume banandi, pantu e wali umusango wandi ukufuma fye ku bwaice. Lelo cimo icangafwile, kuleka ukwangala ne fibusa nakwete no kulaya ku fikuulwa fya bwalwa.

Nangu ca kutila ukucite fi takwayangwike, nalisansamwike ukwishiba ukuti Yehova alensakamana kabili alishibe ifyo nalelwisha ukuleka iyi misango. (1 Yohane 3:19, 20) Ilyo calefika mu 2002, ninshi nalileka ukulaala na baume banandi kabili muli uyu wine mwaka, nalibatishiwe no kuba Inte ya kwa Yehova.

IFYO NANONKELAMO: Bamayo balitemenwe nga nshi ilyo nalekele iyi misango yabipa ica kuti nabo balitendeke ukusambilila Baibolo. Nomba icabipa ca kuti balilwala ubulwele bwa stroko. Na lyo line balitwalilila ukutemenwako Yehova ne cine ca mu Baibolo.

Napapita nomba imyaka 8 ukutula apo natendekela ukupoosa inshita iikalamba mu kusambilisha abantu Baibolo. Kwena ukulanda fye icishinka, limo ndaba no lunkumbwa, lelo ndalwisha na maka ukukanacita ifyabipa. Nalishiba ukuti nga shicitile ifyabipa, Yehova alasekelela.

Ukupalamina kuli Yehova no kulacita ifyo atemwa kwalenga ndeumfwa ukuti nalicindama. Ino nshita naliba ne nsansa nga nshi.

“Nali Kwati Lidalamu Ilyatulika.”—LUKA ŠUC

UMWAKA BAFYELWE: 1975

ICALO: SLOVENIA

IFYO BALI: BALEKOLWA SANA

INKULILO YANDI: Nafyalilwe mu Ljubljana, umusumba ukalamba uwa calo ca Slovenia. Ilyo nafyelwe, ifintu fyali bwino sana, lelo fyaishilealuka lintu nali ne myaka ine ilyo batata baipeye. Lintu batata bafwile, bamayo balebombesha pa kuti batufwaile ifya kulya, ine no mukalamba wandi umwaume.

Ilyo nali ne myaka 15, naile mu kwikala na bamama. Nalitemenwe nga nshi ukulaikala nabo, pantu uko baleikalila  kwali abanandi abengi. E lyo nalikwete no buntungwa sana ukucila ilyo naleikala na bamayo. Ilyo nali ne myaka 16, natendeke ukwangala na bantu abatemenwe ukuya mu kunwa pa mpela ya mulungu. Nalitekele icunsu kabili natendeke ukufwala nga cintomfwa, na pa numa nalitendeke ukupeepa fwaka.

Nangu ca kuti nalibomfeshepo imiti ikola iyalekanalekana, ubwalwa bwena nshalekele ukunwa pantu nalibutemenwe. Tapakokwele, natendeke ukunwa ubwalwa ubwingi sana. Abantu tabaleishiba ukuti ninkolwa pantu nalishibe ifya kuifungushanya pa kuti belaishiba. Ilingi nga baumfwa ubwalwa bulenunka, e lyo baleishiba ukuti ninwa. Na lyo line, tabaleishiba ukuti ninwa ubwalwa ubwalekanalekana ubwingi nga nshi!

Nangu cingati nine nalenwa ubwalwa ubwingi ukucila abanandi, ilingi line nine nalebekatilila pa kufuma uko twaleya mu kunwena no kucinda ninshi tunwene ubushiku bonse. Bushiku bumo, naumfwile umunandi alelanda ukuti nali kwati lidalamu ilyatulika pantu nalenwa sana ukucila abanandi. Aya mashiwi yalinkalifye sana umutima.

Natampile ukutontonkanya pa misango yandi iyabipa. Naleimona uwa cabecabe. Calemoneka kwati tapali ifyacindama ifili fyonse ifyo nalecita mu bumi.

IFYO BAIBOLO YA-ALWILE UBUMI BWANDI: Pali iyi ine inshita, kwali uo twalesambilila nankwe ku sukulu uo namwene ukuti alyalwike nga nshi; aishileba uwatekanya. Nalefwaya ukwishiba icalengele ukuti aaluke, e ico namwebele ukuti tukaye bonse uko bashitisha utwa kulya no twa kunwa. Ilyo twali kulya tuleambaula, anondolwelele ukuti alesambilila Baibolo ne Nte sha kwa Yehova. Alinjebeleko fimo ifyo alesambilila, kabili fyonse ifyo anjebele nshatalile mfyumfwapo pantu ukufuma na ku bwaice tatwaleya ku mapepo. Natampile ukulongana no kusambilila Baibolo ne Nte sha kwa Yehova.

Ukusambilila Baibolo kwalengele njishibe ifintu ifingi ifyacindama. Ku ca kumwenako, naishileishiba ukuti tuleikala mu nshita iyo Baibolo ita ukuti “inshiku sha kulekelesha.” (2 Timote 3:1-5) Na kabili, naishileishiba ukuti nomba line Lesa ali no konaula abantu ababipa no kupeela abantu abasuma umweo wa muyayaya mu Paradaise pano isonde. (Amalumbo 37:29) Ici calengele ukuti ntontonkanye sana pa kuleka imisango yandi iyabipa pa kuti nkabe pa bantu abasuma.

Natendeke ukwebako abanandi icine ca mu Baibolo ico nalesambilila. Abengi balempumya pa fyo nalebeba, lelo ici calingafwile pantu calengele njishibe ukuti tabali ifibusa fya cine cine. Naishileiluka ukuti ukukwata ifibusa ifyabipa e kwalengele ukuti ndenwesha ubwalwa. Lyonse fye, balelolela fye ukuti impela ya mulungu ifike pa kuti bakakolwe na kabili.

Nalilekele ukwangala na banandi bacakolwa kabili natendeke ukwangala ne Nte sha kwa Yehova abalenkoselesha ukuba ne mibele iisuma. Ukuba na ba Nte kwalenkoselesha nga nshi, balitemenwe Lesa ukufuma pa nshi ya mutima kabili bale-esha na maka yonse ukukonka amafunde yakwe. Mu kuya kwa nshita nasukile naleka ukukolwa.

IFYO NANONKELAMO: Ndatasha sana Yehova pantu nshimona ukuti ukunwa ubwalwa e kwingandetela insansa. Ntwalilila ne mibele yandi iyabipa, nga katwishi ifyo naba pali ino nshita. Nalishininkisha ukuti ino nshita ubumi bwandi bwaliwama sana.

Napapita imyaka 7 nomba ukutula apo natendekele ukubombela pa maofeshi ya Nte sha kwa Yehova mu Slovenia. Ukwishiba Yehova no kumubombela kwalindetela insansa nga nshi.