Ifyo Twingaba Abena Kristu Bene Bene Kabili Abekala Calo Abasuma

FINTU nshi fibili ifyo Yesu alecita ilyo aleshimikila? Ica kubalilapo, Yesu alefwaya ukwalula imitima ya bantu, te tubungwe twa fikansa fya calo iyo. Ku ca kumwenako, moneni ico Yesu alandilepo sana mu Lyashi lya pa Lupili. Ilyo talalanda pa fyo cacindama ukuba ngo mucele nangu ulubuuto, aebele abalemukutika ukuti abapaalwa bantu “abaishiba ukuti balakabila ifya kwa Lesa.” Alandile no kuti: “Balipaalwa abafuuka, . . . abatambalala imitima, . . . aba mutende.” (Mateo 5:1-11) Yesu alyafwile abasambi bakwe ukwishiba umulandu cacindamine ukwaluka mu fyo baletontonkanya pa kuti filingane ne fyo Lesa amona icisuma ne calubana no mulandu cacindamina ukubombela Lesa no mutima onse.

Ica bubili, ilyo Yesu alemona abantu balecula, alebomfwila uluse kabili ici calengele ukuti alebafwa. Na lyo line ukufumyapo ubucushi tawali e mulimo uukalamba Yesu alebomba. (Mateo 20:30-34) Aleundapa abalwala, lelo tafumishepo amalwele. (Luka 6:17-19) Alesansamusha abatitikishiwa, lelo tafumishepo ulufyengo ulwalecusha abantu. Alilishishe abantu abali ne nsala, lelo abantu balitwalilile ukucula ku fipowe.—Marko 6:41-44.

Ukwalula Imitima ya Bantu no Kucefyako Amafya Yabo

Mulandu nshi Yesu abikile fye amano ku kwalula imitima ya bantu no kucefyako ukucula lelo tabikile amano ku kwalula utubungwe twa mapolitiki nelyo ukufumyapo ukucula? Yesu alishibe ukuti ku ntanshi, Lesa akabomfya Ubufumu bwakwe ku kufumyapo amabufumu yonse aya bantunse na fyonse ifilenga ukucula. (Luka 4:43; 8:1) E mulandu wine, ilyo abasambi bakwe bamwebele ukuti akonkanyepo ukuposha abantu, Yesu abebele ati: “Tuleyeni kumbi, ku mishi ya mupepi, pa kuti na ko kwine nshimikileko, pantu e co naishila.” (Marko 1:32-38) Yesu aleafwa abengi abalecula, lelo abikile sana amano ku kushimikila no kusambilisha icebo ca kwa Lesa.

Ilyo Inte sha kwa Yehova baleshimikila, balesha na maka ukupashanya Yesu. Balafwa abalecula lelo tabalwisha ukuti bafumyepo ulufyengo ulwaba mu calo. Balishiba ukuti Ubufumu bwa kwa Lesa e bukafumyapo ifilenga ukucula. (Mateo 6:10) Nga filya fine Yesu alecita, nabo bafwaya ukwalula imitima ya bantu, te tubungwe twa fikansa fya calo. Ifi bacita e fyo cilingile fye ukuba pantu imibele ya bantu abene e bwafya ubukalamba abantu bakwata, te mabuteko iyo.

Abekala Calo Abasuma

Nangu ca kutila Inte sha kwa Yehova tabapampamina pa kwalula ifintu mu calo, balisumina ukuti apo Bena Kristu, bafwile ukuba abekala calo abasuma. E ico balacindika bakateka no kubapeela umucinshi. Mu mpapulo balemba na lintu baleshimikila, bakoselesha abantu ukulaumfwila amafunde ya buteko. Lelo nga ca kutila ubuteko bwabeba ukucita ifipusene ne funde lya kwa Lesa, ba Nte balakaana ukumfwila ubuteko. ‘Banakila Lesa ukucila ukunakila abantu.’—Imilimo 5:29; Abena Roma 13:1-7.

Inte sha kwa Yehova balatandalila abantu ku ncende bekala ku kubasambilisha Baibolo  apa fye. Ici calilenga abantu abengi nga nshi ukwalula imibele yabo. Cila mwaka, balaafwa abantu abengi nga nshi ukuleka imibele iyonaula ubumi, pamo nga ukupeepa fwaka, ukukolwa, ukubomfya imiti ikola, ukuteya ifyangalo fya kushitikapo, e lyo no bulalelale. Ino nshita aba bantu baliba ne mibele iisuma kabili bekala calo abasuma pantu balakonka ifyo Baibolo ilanda. Moneni icipande cileti “Baibolo Ilaalula Abantu,” pe bula 18 muli ino ine magazini.

E lyo cimbi ca kutila, ukusambilila Baibolo kulalenga aba mu lupwa ukulacindikana no kulalanshanya bwino, e kutila abalume na bakashi, abafyashi na bana, e lyo na bana beka beka. Ukucindikana no kulanshanya bwino kulalenga indupwa ukwikatana. Indupwa ishaikatana e shilenga aba mu bwikashi ukwikatana.

Pa numa ya kulanshanya pali ifi ifishinka fyalekanalekana muli ifi fipande, bushe kuti mwatila Baibolo yalisuminisha aba mipepele ukuitumpa mu fikansa fya calo? Icasuko cintu cayeba; taisuminisha. Lelo bushe Abena Kristu ba cine balingile ukuba abekala calo abasuma? Ee. Cinshi balingile ukucita pa kuba abekala calo abasuma? Balingile ukulakonka ifyo Yesu alandile ukuti bafwile ukuba ngo mucele kabili ngo lubuuto lwa ba mu calo.

Bonse abesha na maka ukukonka ifi Kristu alandile balanonkelamo kumo ne ndupwa shabo ukubikako na bantu ba ku ncende bekala. Inte sha kwa Yehova ababela uko mwikala bakatemwa nga nshi ukumulondolwela ifyo basambilisha abantu Baibolo. *

[Futunoti]

[Amashiwi pe bula 10]

Yesu alefwaya ukwalula imitima ya bantu, te tubungwe twa fikansa fya calo iyo

[Amashiwi pe bula 11]

Inte sha kwa Yehova basumina ukuti bafwile ukuba abekala calo abasuma