Isukulu lya Gileadi Ilyalenga 132

Abacingilila Icine

UBUSHIKU bwa pa 10 March, 2012, bwali bushiku ubwaibela ku Patterson mu New York, ukubela amasambililo ya fya mu Baibolo. Abantu abengi nga nshi, ukubikako na beni abafumine ku fyalo fya kutali, balishile mu kusangwa kuli programu ya balepwisha Isukulu lya Gileadi ilyalenga 132. Bonse fye balifwele ubusaka. Abalongene mu cikuulwa icabela ku Patterson bali abengi; bambi nabo baletambila programu pa ma TV ku Bethel. Bonse pamo bali 9, 042.

Bonse abasangilweko balefwaisha ukumfwa ifyali no kucitika. Abaali muli ili kalasi balipuseneko na baleba mu makalasi yambi pantu aba bena baba mu mulimo wa nshita yonse uwaibela. Bamo babomba pa Bethel, bambi ni bapainiya baibela, bakangalila abenda, e lyo bambi ni bamishonari nangu ca kuti tabatala abasangwa kwi Sukulu lya Gileadi. Finshi bali no kweba aba abasambi abalepwisha isukulu apo kale kale baba mu mulimo waibela uwa nshita yonse?

Tapapitile ne nshita, ba Gerrit Lösch, ababa mwi Bumba Litungulula Ilya Nte sha kwa Yehova, kabili abali ba ceyamani pali iyi programu balandile ilyashi lya kwiswila, ilyakwete icipusho ca kulenga umo ukutontonkanyapo icaleti, “Bushe Mulacingilila Icine?” Balondolwele ukuti Abena Kristu balacingilila icine na masambilisho yonse aya Bwina Kristu. Ukucingilila icine te kusambilisha fye abantu icine, lelo cipilibula no kubafwa ukutemwa icine.

Munyinefwe Lösch aipwishe ukuti: “Twaishiba shani ukuti twalikwata icine?” Atile, te mpendwa ya bantu abasumina ukupepa kwa cine iilanga ukuti twalikwata icine. Nangu cingati muno nshiku abasumina ukupepa kwa cine bengi nga nshi, bali fye abanono pa Pentekoste mu 33 C.E. Alandile pa fintu fisano ifilanga ukuti twalikwata icine: (1) tulakonka ifyo Yesu asambilishe, (2) twalitemwana, (3) tulakonka amafunde ya kwa Lesa ayalanda pa mibele isuma, (4) tatuitumpa mu fikansa fya calo, na (5) ni fwe Lesa ainika ishina lyakwe.

“Twalilileni Ukulaumfwila Ifyo Yehova Alemweba Ukucita”

Abalongene balipapile ilyo bamwene ba Geoffrey Jackson ababa mwi Bumba Litungulula banina pa cisebele ninshi nabasenda na sutikesi! Balandile ilyashi ilyafumine pali Esaya 50:5, ilyaleti “Twalilileni Ukulaumfwila Ifyo Yehova Alemweba Ukucita.” Amashiwi ya kusesema ayaba pali ili lembo ayalelanda pali Yesu Kristu, yatila: “Na ine, nshapondweke. Nshafutatwike iyo.”

Ba Jackson bakoseleshe abalepwisha amasambililo ukulailuka bwangu ifyo Yehova atweba ukupitila mu mupashi wakwe uwa mushilo, muli Baibolo, na mu kuteyanya kwakwe. Mu cilangililo ca matalanti icalembwa pali Mateo 25:14-30, kuti twatila, abasha bonse babapeele amatalanti yamo yene, pantu umusha umo na umo bamupeele ukulingana na papelele amaka yakwe. Bonse balingile ukubomba ukulingana na papelele amaka yabo. Abasha babili alibatashishe kabili abebele no kutila we musha “musuma kabili uwa cishinka.” Ififuma mu fyo tucita te filanga ukuti tuli ba cishinka lelo ukulaumfwila no kulacita ifyo Yehova aletweba e mwalola ukuba uwa cishinka.

Umusha wa citatu bamwebele ukuti umusha “mubi kabili umunang’ani, no kuti “icinangwa.” Cinshi alufyenye? Alishiikile italanti lyakwe. Italanti talyali likobili, lelo lyali cipimo icalefina amakilogramu 20 kabili nga kupendela mu ndalama, italanti limo lyalingene na madenari 6,000. Ici nacilinganako ne ficitika ilyo umuntu aleya ku calo cimbi, bamusuminisha fye ukusenda sutikesi iifinine nalimo amakilogramu 20. Pa kuti umusha ashiike icintu icakula nga sutikesi, afwile alibombeshe sana. Kanshi  uyu musha alicitilepo cimo, alishiikile italanti, lelo ifi te fyo bamwebele ukucita. E fyo cingaba na kuli mishonari, kuti alapoosa inshita iikalamba pa Intaneti, ukulemba amakalata, ukwangala nelyo ukucita amakwebo. Ifi fintu kuti fyalenga mishonari ukunaka sana, lelo ifi te fyo bamwebele ukulacita. Ba Jackson basondwelele na mashiwi ya kuti: “Lyonse mulecita ifyo Yehova alemweba ukucita!”

“Mwilatwishika Yehova”

Uyu e mutwe we lyashi ilyalandile ba Anthony Morris, ababa mwi Bumba Litungulula. Batile: “Baibolo tailanda ukuti icitetekelo no kutwishika filendelana. Umuntu uwaba ne citetekelo tatwishika.” Ifyo Satana alefwaya fyalibombele, alengele Efa, umwanakashi uwali uwapwililika ukutendeka ukutwishika. Satana kuti alenga na ifwe twatendeka ukutwishika. Ba Morris batile: “Mulecita ifintu ifingakosha icitetekelo cenu, kabili tamwakaletwishika.” Balandile pa cacitikile Petro, ‘uwaendele pa menshi’ lelo ilyo “amwene amabimbi ayaleima pa mulandu wa cikuuku ca mwela,” alitiinine kabili atendeke ukwibila. Ilyo Yesu amwikete ku kuboko, amwipwishe ati: “Nga cinshi wacitwishikila?” (Mateo 14:29-31) “Apo imwe bamishonari mukalabomba sana mu mulimo wa nshita yonse, abantu bambi bakalatemwa ukumona ifyo mulebomba, cikaba kwati mule-enda pa menshi, kanshi nga mwaba na mafya ayapala amabimbi, mwikatendeka ukutwishika.”

Munyinefwe Morris alandile no kuti, ca cine ukuti calyafya ukupita mu mafya, lelo mu kuya kwa nshita yalapwa. Bakoseleshe abalepwisha isukulu ukuti, nga baba na mafya baletontonkanya pa fyo Paulo na Sila bacitile ilyo bali mu cifungo mu Filipi. Pa Imilimo 16:25 patila: “Lelo lwa pa kati ka bushiku Paulo na Sila balepepa no kulumbanya Lesa mu nyimbo; na bafungwa balebomfwa.” Moneni ico bacitile ico ilembo lyalanda: Tabalepepa fye, lelo baleimba ne nyimbo. Baleimba ica kuti na bafungwa banabo baleumfwa. Munyinefwe Morris atile, fwe bengi amashiwi yesu tayomfwika bwino nga tuleimba, lelo tatufwile ukulaumfwa insoni sha kwimba, maka maka nga tuli na mafya. Pa kusondwelela ilyashi, Munyinefwe Morris abelengele amashiwi yaba mu lwimbo namba 135 ulutila “Tushipikishe Ukufika na ku Mpela,” mu citabo ca nyimbo icitila Imbileni Yehova.

Amalyashi na Yambi aya Kukoselesha

“Bushe Mukatemwa Inshiku Ishingi?” Ba Robert Luccioni, ababombela ku Dipartimenti ya fya Kushitashita, e balandile ili lyashi. Umutwe wa ili lyashi wafumine pa mashiwi yaba pa Amalumbo 34:12, ayo Imfumu Davidi yalandile. Ba Luccioni balandile pa fyo twingacita nga twaba na mafya no kutwalilila ukuba na bucibusa na Yehova. Kuti twasambililako ifingi ku fyalembwa muli 1 Samwele icipandwa 30. Ilyo Davidi na bantu bakwe ne ndupwa shabo balebutuka Shauli, baileikala mu Siklagi. Ilyo abena Amaleke basendele indupwa sha bantu ba kwa Davidi muli bunkole, abantu bakwe batile e walengele kabili bafwaile ukumupoola amabwe. Bushe Davidi acitile shani? Tafuupwike, lelo “alombele amaka ukufuma kuli Yehova Lesa wakwe.” (1 Samwele 30:6) Alombele Yehova ukumulanga ifya kucita, alicitile ifyo Lesa amwebele, kabili alipuswishe abo basendele bunkole. Munyinefwe Luccioni aebele abalepwisha isukulu ukuti nabo nga bacetekela Yehova no kukonka ifyo alebeba ukucita, bakatemwa inshiku ishingi no kumona icisuma. Bakaba ne nsansa ilyo balebomba umulimo wacindama uo bapeelwe.

“Lekeni Amenso Yenu Yatangilile Ubulinde bwa Bushiku” e mutwe wa lyashi uo ba Michael Burnett, bakafundisha ba mwi Sukulu lya Gileadi balandile. Abena Israele bayakenye inshita ya bushiku mu fiputulwa fitatu, kabili iciputulwa cimo na cimo calepele ama-awala yane. Baletendekela ukupenda lilya akasuba kawa mpaka lilya katula. Iciputulwa ca kulekelesha, icaletendeka na 2 koloko ya bushiku ukwisashinta 6 koloko ya lucelo, e cali icayafya sana ku muntu ukulola, pantu e lyo kwalefiita sana no kutalala. Pali iyi nshita ya bulinde, e lyo uwaimbile amalumbo aletontonkanya sana pa fyebo fya kwa Yehova pa kuti taponene mu tulo. (Amalumbo 119:148) Ba Burnett baebele abalepwisha isukulu ukuti: “Mukabe abalola.  Mukalakwata amafya. Mufwile ukwishibila limo ifyo mukacita.” Lyena babacinkwileko ukuti bafwile ukutwalilila ukusambilila ifyashika ifyaba mu Baibolo pa kuti bengatwalilila ukuba abalola lwa ku mupashi. Ba Burnett, batile: “Cila bushiku mulapepa kuli Yehova pantu mufwaya ukuti abe cibusa wenu. E ico, apo Yehova ni cibusa wenu, muleleka alelanda na imwe cila bushiku ukupitila muli Baibolo. Amafya tulepitamo ino nshita yali no kupwa nomba line, e ico pekanishisheni libela ifyo mukacita ku ntanshi. Ukucite fi kukamwafwa ukuba abalola.”

“Namusambilishiwa Ifya Kubomba Imilimo ili ku Ntanshi.” Abalandile ili lyashi, ilyafumine pali 1 Petro 5:10, ni ba Mark Noumair, bakafundisha ba mwi Sukulu lya Gileadi. Baipwishe abalepwisha isukulu ukuti: “Apo imwe bonse muli babomfi ba kwa Lesa abaishiba ifingi ifya mu Baibolo, mulandu nshi bamwitile ukwisa kuno ku Watchtower Educational Center ku kusambilila?” Lyena batile: “Ni pa mulandu wa kuti mwalisambilila kabili mwalishiba bwino imilimo yenu. Ilingi line, abengi abasambilila kabili abaishiba imilimo balatala baleka ukuya ku ncito no kuya ku sukulu pa kuti bayeishibilapo na fimbi pa kuti balebomba bwino imilimo yabo. Iyi imyeshi 5 iyapita, Yehova ‘alemwikasha’ kabili ‘alemukosha’ ilyo mwalesambilila Icebo cakwe no kwishiba bwino ukuteyanya kwakwe pa kuti mukalebomba bwino imilimo iikalamba iyo bakamupeela. Inceshi ishakosa tashongama nelyo ukulepuka nangu ing’anda ifine shani. Ifyo musambilishiwe fikalamonekela mu fyo mukalabomba na bamunyinenwe na bankashi. Bushe amafya yakamulenga ukuleka ukulakonka amafunde ya kwa Lesa, nelyo bushe mukatwalilila ukulabomfya ifyo mwasambilila mu Cebo ca kwa Lesa? Icintu icakosa kuti casenda icafina. Icilenga umuti ukukosa, lukula ulwaba mu kati. Icilanga ukuti mwalikosa, fintu mwaba mu kati. Ico Yehova amwitiile ukwisa kuno ni ku kumukosha, pa kuti mulinge ukubomba imilimo iili ku ntanshi. Lesa namusambilisha, e ico tulepepa ukuti mukabombe ulubali lwenu no kuleka ‘Kasambilisha Uwapulamo’ akapwishe ukumusambilisha.”

Ukushimika Ifyacitike mwi Bala no Kwipusha Abapita Kale mu Sukulu

Ala cilawama nga nshi ukukutika ku balepwisha Isukulu lya Gileadi ilyo baleshimika ifyacitike lintu bali mwi sukulu, kabili na uno wine muku e fyo cali. Mu lyashi limo, abana be sukulu balilangilile fimo ifyacitike ilyo baleshimikila. Ku ca kumwenako, munyinefwe umo no mwina mwakwe aba ku calo ca France, abali pa lwendo lwa kuya kwi Sukulu lya Gileadi, balilolelele pa ma-awala 6 pa cibansa ca ndeke ukuti indeke iise. Ilyo bali mu cikuulwa baliilamo ifya kulya batendeke ukulanshanya na baume babili nabo abalelolela indeke. Ilyo umwaume umo atile afumine ku Malawi, batendeke ukulanda nankwe mu Chichewa. Uyu mwaume alipapile kabili alibepwishe uko baishibile iciChewa. Bamwebele ukuti ni bamishonari ku Malawi. Ilyo umwaume umbi asosele ukuti ena afumine ku Cameroon, na o alipapile ilyo batendeke ukulanda nankwe mu ciFrench. Aba baume babili balitashishe sana Inte sha kwa Yehova kabili bamishonari balishimikile kuli bena.

Mu lyashi lya kwipusha ilyalandile ba Nicholas Ahladis, ababa mu Dipartimenti ya Kupilibula, baipwishe bamunyinefwe babili na bena mwabo abali pa balepwisha isukulu. Ulupwa lumo pali aba baipwishe, lwafumine ku calo ca Australia no kuya mu kubomba bumishonari ku East Timor ukwaba inkondo. Ulupwa lumbi lwafumine ku Korea no kuya mu kubombela ku Hong Kong. Ishi ndupwa shibili shalondolwele ukuti balefwaisha ukubwelelamo ku fyalo babombela no kuyabomfya ifyo basambilile.

Pa numa ya kupeela abalepwisha isukulu amadiploma, umo pali bena abelengele kalata ya kutasha pa fyo basambilile. Lyena pa kusondwelela programu, ba Lösch babomfeshe ifilangililo ifisuma sana, batile icine cisuma, caba kwati mukolamfula, caba kwati menshi mu ciswebebe, kabili nge nanga pali bemba apali amabimbi. Batile: “Ala lishuko nga nshi ukwishiba icine. Mulecingilila icine, no kwafwa bambi ukuti nabo balecingilila icine.”

 [Charti na Mapu pe bula 31]

IFIPENDO FYA BALI MU KALASI

Bafumine mu fyalo:  12

Imyaka ya kufyalwa:  36

Imyaka baba mu cine:  20

Imyaka babomba mu

mulimo wa nshita yonse:  15

(Nga mulefwaya ukumona mapu, moneni muli magazini)

Babatumine ku fyalo ifili pe samba:

IFYALO BABATUMINEKO

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Icikope pe bula 31]

Abapwishishe Isukulu lya Gileadi Ilyalenga 132

Ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.