Ababelenga Ino Magazini Balepusha Ukuti . . .

Bushe Abanakashi Ababa mu Cilonganino ca Nte sha kwa Yehova Balasambilisha?

▪ Ee balasambilisha. Mu fyalo ifyalekanalekana mwaliba Inte sha kwa Yehova abanakashi abengi nga nshi abasambilisha. Abanakashi abashimikila imbila nsuma iya Bufumu bwa kwa Lesa baba ibumba ilikalamba. Pa Amalumbo 68:11 paba amashiwi ayasobelwe ayalanda pali aba abanakashi abasambilisha ayatila: “Yehova asosa icebo; abanakashi abalesabankanya imbila nsuma libumba ilikalamba.”

Lelo, ico mulingile ukwishiba ca kuti umulimo wa kusambilisha uo ba Nte abanakashi babomba tawalingana no mulimo abanakashi abapepesha mu mipepele imbi babomba. Walipusana sana kabili e ubalenga ukupusanako na ba mu mipepele imbi. Bapusana shani?

Abo bashimikilako nangu ukusambilisha balipusana. Abanakashi abasambilisha ifya mapepo, maka maka abatila Bena Kristu, e batungulula mu macalici yabo kabili bashimikila ku ba mu filonganino fyabo. Lelo ba Nte abanakashi bena bashimikila ku bashili ba mu cilonganino, abantu abo basanga ilyo baleshimikila ku ng’anda ne ng’anda.

Cimbi ico bapusanamo, milimo babomba mu cilonganino. Abanakashi abapepesha mu macalici ya batila Bena Kristu na ba mu mipepele imbi balatungulula no kusambilisha aba mu cilonganino cabo ifyo basuminamo. Lelo Inte sha kwa Yehova abanakashi tabasambilisha mu cilonganino nga ca kuti pali abaume ababatishiwa. Abasambilisha mu cilonganino, baume fye abapeelwa uyu mulimo.—1 Timote 3:2; Yakobo 3:1.

Baibolo ilondolola ukuti baume fye epela e bapeelwa umulimo wa kutungulula icilonganino. Moneni ifyo umutumwa Paulo alembeele kangalila munankwe Tito, ifyo na ifwe tufwile ukukonka. Atile: ‘Ico nakushiilile mu Krete, ni pa kuti . . . usonte abakalamba mu misumba yonse.’ Paulo alandile no kuti umwaume onse uwasontelwe alingile “ukuba uwabula umulandu, umulume wa mukashi umo.” (Tito 1:5, 6) Paulo aebele Timote amashiwi yapalako ilyo amulembeele kalata iyalelanda pa fyo ifintu fifwile ukuba mu cilonganino. Atile: “Umuntu nga alefwaya ukuba kangalila, ninshi alefwaya umulimo uusuma. E ico kangalila afwile ukuba uushitungwa akabi, umulume wa mukashi umo, . . . uwafikapo ukusambilisha.”—1 Timote 3:1, 2.

Mulandu nshi bapeelela fye abaume umulimo wa kutungulula icilonganino? Paulo atile: “Nshilesuminisha umwanakashi ukusambilisha, nelyo ukutungulula umwaume, lelo ukuba tondolo. Pantu Adamu e wabalilepo ukubumbwa, e lyo pakonka Efa.” (1 Timote 2:12, 13) Kanshi, ifi Lesa abumbile umwaume intanshi, e mulandu wine apeelela abaume umulimo wa kusambilisha no kutungulula ifilonganino.

Ababomfi ba kwa Yehova bapashanya Intungulushi yabo Yesu Kristu. Luka, umusambi wa kwa Yesu, alembele pa mulimo Yesu alebomba ukuti: “Aile alepita mu misumba na mu mishi, aleshimikila no kubila imbila nsuma ya bufumu bwa kwa Lesa.” Pa numa, Yesu atumine abasambi bakwe ukuyabomba umulimo umo wine. “Baile balepita mu mishi, balebila imbila nsuma.”—Luka 8:1; 9:2-6.

Muno nshiku, ababomfi ba kwa Yehova, abaume na banakashi, balabombesha mu mulimo Yesu asobele ilyo atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.