Sambilileni Icebo ca kwa Lesa

Bushe Kuti Mwaikala Umuyayaya?

Ici cipande cilelanda pa mepusho ayo nalimo mufwaisha ukwishiba kabili cilemulanga napo mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.

1. Mulandu nshi tufwila bwangu?

Bafulwe bamo balafisha imyaka 150, kabili imiti imo ilekala imyaka 3,000. Lelo imyaka ya muntu yena yalicepa sana. Na lyo line, fwe bantu twalicila bafulwe ne miti. Yehova Lesa atupangile ukuti tuleipakisha inyimbo, ifyangalo, ifya kulya, ukusambilila, ukuya ku ncende ishalekanalekana, e lyo no kuba pamo na banensu. Lesa atupangile ukuti tulefwaisha ukwikala umuyayaya.—Belengeni Lukala Milandu 3:11.

2. Bushe kuti twaikala umuyayaya?

Yehova tafwa, abako umuyayaya. Apo Yehova e ntulo ya mweo, kuti apeela abantu umweo wa muyayaya. (Amalumbo 36:9; Habakuki 1:12) Na kuba, alilaya ukuti bonse abamumfwila akabapeela umweo wa muyayaya. Akafumyapo ubukote.—Belengeni Yobo 33:24, 25; Esaya 25:8; 33:24.

Ifipesha amano Yesu acitile filenga twacetekela ubulayo bwa kwa Lesa ubwa kupeela abantu umweo wa muyayaya no kufumyapo ukulwala. Yesu aliposeshe abalwele amalwele yalekanalekana kabili alibushishe fye na bafwa.—Belengeni Luka 7:11-15, 18, 19, 22.

  3. Ni lilali abantu bakalaikala ukwabula ukufwa?

Lesa afwaya ukuti tukekale umuyayaya muli paradaise pano isonde, umushakabe umutitikisha no bunkalwe. Afwaya ukuti tukekale umutende. (Amalumbo 37:9, 29; Esaya 65:21, 22) Ilyo isonde likaba Paradaise nga fintu lyali kale, abantu abengi abafwa bakabuushiwa. Abantu abakabuushiwa kabili abakasalapo ukupepa Lesa no kucita ifyo afwaya, bakekala umuyayaya.—Belengeni Luka 23:42, 43; Yohane 5:28, 29.

4. Kuti twacita shani pa kuti tukeseikala umuyayaya?

Ni Lesa fye e wingatupeela umweo wa muyayaya. Kanshi e mulandu wine tufwile ukupalamina kuli ena ukupitila mu kumwishiba bwino. Baibolo ipashanya ukusambilila pali Lesa ku kulya ifya kulya. (Mateo 4:4) Tulaipakisha ukulya ifya kulya, lelo pa kufisanga no kufipekanya tufwile ukubombesha. E fyo caba na pa kusambilila icebo ca kwa Lesa, tufwile ukubombesha. Lelo bushe kuti kwaba icingawama ukucila ukupalamina kuli Lesa no kuba no mweo wa muyayaya?—Belengeni Luka 13:23, 24; Yohane 6:27; 17:3.

Nga mulefwaya ukwishibilapo na fimbi, belengeni icipandwa 3 mu citabo citila Bushe Cinshi Baibolo Isambilisha? icalembwa ne Nte sha kwa Yehova.

[Icikope pe bula 17]

Mwaliba ubusuma mu kwishiba Lesa