Bushe Caliba fye Bwino Ukwipusha Lesa Ifipusho?

ABANTU bamo batila calilubana ukwipusha Lesa ifipusho. Bamona kwati te mucinshi ukwipusha Lesa umulandu asuminishisha ifintu fimo ukucitika nelyo ukukanacitika. Bushe na imwe e fyo mutontonkanya?

Nga e fyo mutontonkanya nalimo kanshi kuti mwapapa ukwishiba ukuti abantu bamo abasuma balipwishe Lesa ifipusho. Moneni ifipusho fimo ifyo bamwipushe:

Yobo uwali uwa cishinka aipwishe Lesa ukuti: “Nga kanshi cinshi ico ababifi babela no mweo, cinshi bakotela no kuba abakankaala?”—Yobo 21:7.

Kasesema Habakuki na o aipwishe ati: “Nga cinshi ico mulolesesha fye aba bucenjeshi, no kwikala tondolo ilyo umubifi amina uwamucila ubulungami?”—Habakuki 1:13.

Yesu Kristu aipwishe ati: “Lesa wandi, Lesa wandi, cinshi mwandekelesesha?”—Mateo 27:46.

Nga mwabelenga amalembo yambi ayalanda pali aya mashiwi yambwilwe mu Baibolo, mwalamona ukuti Yehova * Lesa tafulilwe ilyo bamwipwishe ifi fipusho. Kwena te kuti tupape ukuti Lesa alisuminishe abantu ukumwipusha ifi fipusho. Ku ca kumwenako, Lesa tamona ati musaalula ilyo tulemulomba ukuti atupeele ifyo tukabila pa kuti tube no bumi busuma. Alaitemenwa ukutupeela ifyo twamulomba. (Mateo 6:11, 33) Kabili Lesa alatupeela ne fyebo ifilenga twilasakamikwa. (Abena Filipi 4:6, 7) Na kuba, Yesu aebele abasambi bakwe ukuti: “Mulelomba, kabili mukapeelwa.” (Mateo 7:7) Amashiwi yaba mu fyo Yesu alandile yalangilila ukutila Lesa kuti atupeela ifyo tukabila kabili kuti atwasuka na mepusho ayacindama.

Nga mwalikwete ishuko lya kwipusha Lesa, bushe batini fipusho nshi mwingatemwa ukumwipusha pali ifi fili pe samba?

● Mulandu nshi nabela pano calo?

● Cinshi cikacitika nga nafwa?

● Cinshi mulekela ndecula?

Apo “amalembo yonse aya mushilo yafuma kuli Lesa,” mukasanga amasuko mu Cebo ca kwa Lesa, Baibolo. (2 Timote 3:16) Natulande icalenga bamo ukwipusha Lesa aya mepusho yali pa muulu e lyo tumone ne fyo Baibolo yasuka.

[Futunoti]