Icipusho ca Butatu: Cinshi Lesa Alekela Ndecula?

BA WISHI ba ba Ian baali ni bacakolwa. Nangu ca kuti ba Ian balebapeela ifyo balekabila mu bumi, bawishi tabalebalanga ukutemwa. Ba Ian batila, “nshatemenwe batata pantu ilingi line baleba fye abakolwa kabili balecusha bamayo.” Ilyo ba Ian bakulile batendeke ukutwishika nampo nga Lesa e ko aba. Baleyipusha ati, “Nga ca kutila Lesa e ko aba, mulandu nshi alekela abantu ukulacula?”

Mulandu nshi uwa kwipushisha ici cipusho? Nangu ca kuti tamwakwata sana amafya mu bumi bwenu, ukwabula ukutwishika tamumfwa bwino nga mwamona ifyo abantu bakaele balecula. Ilyashi lya kucula lilamwikata sana ku mutima nga ca kuti mwacula nga filya ba Ian baculile nelyo nga ca kuti umuntu mwatemwa alwala nelyo afwa.

Ifyo bamo balanda. Bamo basumina ukuti Lesa alasuminisha ukucula pa kuti atusambilishe ukuicefya no kuba no luse. Bambi nabo batontonkanya ukuti abantu balacula pa mulandu wa membu bacitile kale.

Ni mwi balosha? Lesa tabikako amano ku kucula kwa bantu e mulandu wine cayafisha ukumutemwa. Lesa munkalwe.

Cinshi Baibolo Isambilisha? Baibolo ilalondolola bwino bwino ukuti Lesa te ulenga ukuti abantu balecula. Itila: “Ilyo umuntu atunkwa, etila: ‘Ni Lesa e ulentunka.’ Pantu takuli uwingatunka Lesa ukucita ifyabipa, kabili umwine tatunka umuntu iyo.” (Yakobo 1:13) Na kuba, ukulanda ukuti Lesa e walenga ukuti tulecula kwalipusana sana ne fyo Baibolo ilondolola imibele yakwe. Kwapusana shani?

Ukutemwa e mibele yapulamo iya kwa Lesa. (1 Yohane 4:8) Pa kulanga ukuti ukutemwa e mibele ya kwa Lesa iyapulamo, Baibolo ipashanya Lesa kuli nyina uwakwata umwana umunono uuleonka. Itila, “Bushe umwanakashi kuti alaba umwana wakwe uonka ica kuti afilwa ukumfwila uluse umwana uwafuma mwi fumo lyakwe? Kwena aba banakashi kuti balaba, lelo ine nshakakulabe.” (Esaya 49:15) Bushe mwalibala amutontonkanyapo ukuti nyina uwatemwa  umwana wakwe kuti amucusha? Umufyashi uwatemwa abana bakwe alesha na maka ukucefyako ukucula kwabo. Lesa na o wine te ulenga ukuti abantu bakaele balecula.—Ukutendeka 18:25.

Nangu ca kuti Lesa alasakamana, abantu bakaele balacula. Nalimo kuti mwayipusha ukuti, ‘Nga ca kuti Lesa alasakamana kabili alikwatisha amaka, mulandu nshi te kuti afumishepo ifilenga abantu ukucula?’

Kwaliba umulandu uusuma uo Lesa asuminishisha ukutila ukucula kutwalilile na ino ine nshita. Natulande pa mulandu umo: Ilingi line bantu e balenga ukuti bambi balecula. Abengi abafwaya ukucusha abantu banabo kabili abankalwe tabafwaya ukwaluka. Kanshi pa kuti ukucula kukapwe, Lesa akonaula abantu ba musango yu.

Pa kulondolola umulandu Lesa ashaonawila abacita ifyabipa, umutumwa Petro alembele ati: “Yehova tashingashinga ku kufikilisha ubulayo bwakwe, filya bamo batila alashingashinga, lelo alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.” (2 Petro 3:9) Ifyo Yehova Lesa atutekanishisha filanga fye ukuti alitutemwa kabili wa luse.

Ukwabula ukutwishika, Yehova Lesa ali no kucitapo cimo nomba line. Ali no ‘kubwesesha ubucushi ku balecusha’ aba kaele. Bonse abafyenga no kucusha abanabo “bakapingwilwa ukonaulwa umuyayaya.”—2 Abena Tesalonika 1:6-9.

Ba Ian, abo tulandilepo kale, balisangile amasuko ku fipusho bakwete pa mulandu abantu baculila. Ifyo basambilile fyalengele ukuti baaluke. Belengeni ilyashi lyabo pe bula 13 muli ino ine magazini.

Nga mulefwaya ukwishibilapo na fimbi pa mulandu Lesa asuminishisha ukucula ne fyo akacita ku ntanshi, belengeni icipandwa 11 mu citabo citila Bushe Cinshi Baibolo Isambilisha? Kuti mwakopolola ici citabo pa Intaneti pa www.dan124.com

[Akabokoshi pe bula 9]

Bushe Cinshi Yesu Alandilepo pa Kucula?

Yesu tapeele Lesa umulandu pa fyo aculile. Lelo acitile ifyakonkapo.

Yesu alangile ukuti Lesa takanda abantu abakaele pa kubalenga ukucula. Aliposeshe abalwala, abalemana e lyo ne mpofu. (Mateo 15:30) Ifipesha amano ifyo acitile fitusambilisha ifintu fibili ifyacindama: Ica kubalilapo, mu nshita ya kubomfya amaka ya kwa Lesa ku kulenga abantu ukucula, Yesu ayabomfeshe ku kucefyako ukucula. Ica bubili, Yesu taundepe fye abantu ukwabula no kubomfwilako uluse pa fyo balecula. Ilyo amwene abantu balecula Baibolo itila, ‘alibomfwilile uluse.’ (Mateo 20:29-34) Yesu alipashenye sana Wishi mu fyo aleumfwila uluse abantu abalecula. Kanshi ifyo Yesu alelanda no kucita, fitusambilisha ukuti Lesa alomfwa ubulanda nga Amona abantu balecula kabili alafwaya ukupwisha ukucula kwabo.—Yohane 14:7, 9.

Yesu alandile ukuti uulenga abantu ukucula sana ni Satana Kaseebanya. Atile, “Ulya ali ni kepaya wa bantu ilyo atendeke.” (Yohane 8:44) Yesu na kabili alandile pali Satana Kaseebanya ukuti ni “kateka wa pano calo” kabili e “ulufya aba pano isonde bonse.”—Yohane 12:31; Ukusokolola 12:9.

Yesu alitupeela isubilo lya kuti ku nshita ya ku ntanshi ukucula konse kukapwa. Asambilishe abasambi bakwe ukupepa ukuti: “Shifwe wa mu muulu, . . . Ubufumu bwenu bwise. Ukufwaya kwenu kucitwe pano isonde nga mu muulu.” (Mateo 6:9, 10) Ilyo Ubufumu bwa kwa Lesa bukalateka, takwakabe ukucula pano calo, nga filya fine kushaba ukucula ku muulu.

Mu cimonwa ico Yesu asokolwelele umutumwa Yohane, Yesu alilondolwele ifyo imikalile ya bantu ikaba ilyo Ubufumu bwa kwa Lesa bukalateka. Pali ilya nshita Lesa “akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 1:1; 21:3, 4.