Icipusho ca Kubalilapo: Mulandu Nshi Nabela Pano Calo?

BA ROSALIND abakuliile ku England balitemenwe sana ukusambilila no kwishiba ifintu. Na kabili balefwaya sana ukwafwa abantu. Pa numa ya kupwisha amasambililo, balibombele incito ya pa muulu iya kwafwilisha abashakwete amayanda, abalemana e lyo na bakwete ubwafya bwa kusambilila. Te mulandu no kukwata incito ya pa muulu e lyo ne cuma, ba Rosalind batile, “Pa myaka iingi naleyipusha ati, ‘Mulandu nshi twabela pano calo?’”

Mulandu nshi uwa kwipushisha ici cipusho? Fwe bantu twalipusanako ku nama pantu tulatontonkanya. Tulasambilila ku fyatucitikile kale, tulapanga ne fyo tukacita ku ntanshi e lyo no kufwaya ukwishiba ico twabela pano calo.

Ifyo bamo balanda. Abengi batontonkanya ukuti pa kuti umuntu abe ne nsansa kano alumbuka nelyo akwata indalama ishingi.

Ni mwi balosha? Balosha mu kuti abene e bafwile ukuisalila ico balemona ukuti e cacindama mu bumi. Ifyo bafwaya e fyacindama ukucila ifyo Lesa afwaya.

Cinshi Baibolo Isambilisha? Imfumu Solomone yalikwete sana ifyuma kabili yalitemenwe ukwangala, lelo ifi fintu tafyalengele ukuti ibe ne nsansa. Yaishileishiba icilenga umuntu ukuba ne nsansa, ilyo yalembele ukuti: “Apo fyonse nafyumfwika, amashiwi ya kulekelesha ni aya: Tiina Lesa wa cine no kusunga amafunde yakwe. Pantu ici e cifwaikwa ku bantu bonse.” (Lukala Milandu 12:13) Bushe ukusunga amafunde ya kwa Lesa kucita finshi?

Umulandu umo uo Lesa atupangile ni pa kuti tuleipakisha ubumi. Solomone alembele  ati: “Ku muntu takwaba icisuma icacila pa kulya no kunwa no kusekelamo mu kubombesha kwakwe. Ici na co nalimona, ukuti cafuma mu kuboko kwa kwa Lesa wa cine.”—Lukala Milandu 2:24.

Na kabili Lesa afwaya ukuti tuletemwa no kusakamana ulupwa lwesu. Moneni ukufunda kusuma uko Lesa apeela cila muntu mu lupwa.

“Abalume bafwile ukulatemwa abakashi babo nge mibili yabo.”—Abena Efese 5:28.

“Umukashi na o abe na katiina ku mulume wakwe.”—Abena Efese 5:33.

“Mwe bana, muleumfwila abafyashi benu.”—Abena Efese 6:1.

Nga twakonka aya amafunde ya mu Baibolo, tukaba ne nsansa. Lelo icintu cimo icikaankala ico twingacita, kusambilila pali Kabumba no kupalama kuli ena pa kuti aba Cibusa wesu. Na kuba, Baibolo ilatukoselesha ‘ukupalama kuli Lesa.’ Kabili yalaya no kuti: “Akapalama kuli imwe.” (Yakobo 4:8) Nga mwapalama kuli Lesa, mukeshiba ico twabela pano calo.

Ba Rosalind, abo tulandilepo kale batila nomba balishiba ico twabela pano calo. Kuti mwabelenga icalengele ukuti ba Rosalind baaluke pe bula 10 muli ino ine magazini.

Nga mulefwaya ukwishibilapo na fimbi pa fyo mwingacita pa kuti mulesekesha Lesa, belengeni icipandwa 12 mu citabo citila Bushe Cinshi Baibolo Isambilisha? Kuti mwakopolola ici citabo pa Intaneti pa www.dan124.com

[Akabokoshi pe bula 5]

Bushe Yesu Alandile Ukuti Cinshi ico Twabela Pano Calo?

Yesu alishibe ico aishile pano calo. Atile: “Ici e co nafyalilwa, kabili ici e co naishila pano calo, pa kuti mbe inte ku cine.” (Yohane 18:37) Yesu mu bumi bwakwe bonse alisambilishe abantu icine pa lwa kwa Lesa no kufwaya Kwakwe.

Kuti twaba ne nsansa nga twapashanya Yesu. Na kuba Yesu alitweba ukuti tufwile ukusambilila kuli ena. (Mateo 11:29) Natumone inshila shibili umo twingamupashanya.

Yesu atile nga tulefwaya ukuba ne nsansa, tufwile ‘ukwishiba ukuti tulakabila ifya kwa Lesa.’ (Mateo 5:3) Kuti twaishiba Lesa nga ca kuti twasambilila pali ‘Lesa wa cine eka, na Yesu Kristu uo atumine.’—Yohane 17:3.

Yesu aebele abasambi bakwe ukulasambilishako bambi ifyo abasambilishe. Atile: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.”—Mateo 28:19, 20.

Bonse abafwaya ukuba ifibusa fya kwa Lesa ukupitila mu kusambilila Baibolo no kukonka ifyo basambilila basanga ukuti imikalile yabo ilaba bwino sana. Baleshiba no kushininwa sana ukuti kwaliba umulandu babela pano calo nga batendeka ukwafwa bambi ukwishiba Lesa.