Ukubuuka kwa kwa Yesu Kukalenga Abantu Ukuba no Bumi!

UKUBUUKA kwa kwa Yesu kwalicindama sana kuli ifwe. Umutumwa Paulo alandile pa fyo ukubuuka kwa kwa Yesu kwacindama ilyo alembele ukuti: “Kristu alibuuka ku bafwa, e cisabo ca ntanshi ku bafwa. Pantu apo ni mu muntu umo e mwaishiile imfwa, e fyo no kubuuka kwaishila mu muntu umo. Pantu filya fine fye bonse bafwila muli Adamu, e fyo na bonse bakalengelwa aba mweo muli Kristu.”—1 Abena Korinti 15:20-22.

Yesu abuushiwe pa Nisani 16, mu 33 C.E. Pali ubu bushiku e po abaYuda balepeela ifisabo fya kubalilapo ukupya kuli Yehova Lesa mwi tempele mu Yerusalemu. Ilyo Paulo alandile pali Yesu ukuti cisabo ca ntanshi, apilibwile ukuti kwaliba abantu na bambi abakabuuka ku bafwa.

Amashiwi Paulo akonkeshepo yalangilila ico ukubuushiwa kwa kwa Yesu kukacita. Paulo atile: “Apo ni mu muntu umo e mwaishiile imfwa, e fyo no kubuuka kwaishila mu muntu umo.” Bonse tulafwa pa mulandu wa lubembu no kukanapwililika ifyo twapyana kuli Adamu. Lelo ilyo Yesu apeele ubumi bwakwe ubwapwililika ubwa buntunse icilubula, alengele ukuti abantu balubulwe ku busha bwa lubembu ne mfwa. Pa kusondwelela ilyashi bwino bwino, Paulo alembele pa Abena Roma 6:23 ati: “Icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.”

Yesu umwine alilondolwele ifyo imfwa no kubuuka kwakwe fyacindama kuli ifwe. Atile: “Umwana wa muntu bakamwimya, pa kuti onse uumutetekela akabe no mweo uwa muyayaya. Pantu Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:14-16.

Ala cikawama sana ukwikala umuyayaya ukwabula ukukalipwa, ukucula e lyo no bulanda! (Ukusokolola 21:3, 4) Uwasoma umo alandile pa lwa nshita ya ku ntanshi ukuti: “Nangu ca kuti inshishi shitwibukishako ifyo ubumi bwa muntu bwaipipa, ukubuuka na ko kutupeela isubilo lya kuti ukufwa takwakatwalilile fye ukubako.” Cine cine ukubuuka kwa kwa Yesu kukalenga abantu ukuba no bumi!