Bushe Tufwile Ukupepa ku Batakatifu?

BONSE tulasakamikwa ica kuti limo tulafwaisha uwa kutwafwa. Cilawama ukukwata cibusa uwaba no luse kabili uwaishiba bwino amafya tulepitamo. Umuntu uwa luse kabili uwaishiba bwino amafya tupitamo, e wingaba cibusa musuma.

Bamo bamona kwati ifi twalandapo e fyo cifwile ukuba na ku mapepo. Bamona kwati kuti cabangukilapo ukupepa ku mutakatifu ukucila ukupepa kuli Lesa pantu Lesa alicindama sana kabili alishilisha. Batontonkanya ukuti apo abatakatifu balipita mu mafya ne fyakwesha ifingi ifyo na bo bapitamo, kanshi e bo bafwile ukulapepako pantu balomfwikisha amafya ya bantunse. Ku ca kumwenako, abantu nga balufya ifintu fimo ifyacindama sana nalimo kuti bafwaya ukupepa ku “Mutakatifu” Anthony uwa ku Padua mu calo ca Italy, uo batila alabafwa nga balufya nelyo babebila ifintu. Nga balefwaya ukupepelela inama iilwele, kuti bapepa ku “Mutakatifu” Francis uwa ku Assisi kabili nga nabakwata amasakamika, kuti bapepa ku “Mutakatifu” Jude Thaddeus pa kutila abaafwe.

Bushe kuti twaishiba shani nga ca kuti Amalembo yalisuminisha ukupepa ku batakatifu nelyo iyo? Apo mu mapepo tulatasha Lesa no kumweba ifyo tulefwaya: Bushe tatufwile ukubikako amano ukufwaya ukwishiba nga ca kuti alomfwa amapepo yesu? Na kabili tulingile ukuyipusha ukuti: Bushe Lesa omfwa shani nga tulepepa ku batakatifu?

IFYO BAIBOLO YALANDAPO PA KUPEPA KU BATAKATIFU

Ukupepa ku batakatifu kwashimpwa pa cisambilisho ce Calici lya baKatolika, abasumina ukuti abantu nga babembuka, abatakatifu e bafwile ukubapepelako kuli Lesa pa kuti abelele. Icitabo ca New Catholic Encyclopedia citila, ico bacitila ifi “ni co batontonkanya ukuti umutakatifu e wakwata fye insambu shakulombelako umuntu uubembwike pa kuti Lesa amubelele uluse.” Kanshi ilyo umuntu alepepa, alasubila ukuti balamubelela uluse nga alomba ukupitila mu batakatifu pantu bena e bakwata insambu sha kupepelako bambi kuli Lesa.

Bushe Baibolo e fyo isambilisha? Bamo batila ifyo umutumwa Paulo alembele filangilila ukuti alekoselesha abantu ukulapepa ku batakatifu. Ku ca kumwenako, alembeele Abena Kristu ba ku Roma ati: “Awe ndemukoselesha, mwe bamunyinane, muli Shikulwifwe Yesu Kristu na pa mulandu wa kutemwa ukwafuma ku mupashi, ukuti mukosepo ukumpepelako kuli Lesa nge fyo na ine ndepepa.” (Abena Roma 15:30) Bushe ifi Paulo alandile, alelomba Abena Kristu banankwe ukumulandilako kuli Lesa? Awe iyo. Na kuba, nga kulomba ninshi ni Paulo balingile ukulomba ukuti alebalandilako kuli Lesa. Paulo alelanda ukuti caliba fye bwino Umwina Kristu ukulomba Umwina Kristu munankwe ukumupepelako kuli Lesa. Lelo  ukucita ifi kwalipusanako no kupepa ku muntu uuli ku muulu ukumweba ukuti atulombeleko kuli Lesa. Mulandu nshi twasosela ifi?

Mwi buuku lya Mbila Nsuma ilyo umutumwa Yohane alembele, Yesu atile: “Nine nshila ne cine no mweo. Takuli uwisa kuli Tata kano aishila muli ine.” (Yohane 14:6) Na kabili atile: “Conse ico mwalomba Tata mwi shina lyandi, akamupeela.” (Yohane 15:16) Yesu talandile ukuti tufwile ukulungatika amapepo yesu kuli ena pa kuti e o aletulandilako kuli Lesa. Lelo pa kuti amapepo yesu yaleasukwa, tufwile ukupepa kuli Lesa ukupitila muli Yesu epela.

Ilyo abasambi bakwe bamwipwishe ukuti abasambilishe ifya kupepa, Yesu atile: “Lyonse ilyo mulepepa, muletila, ‘Mwe Shifwe, ishina lyenu libe ilya mushilo.’” (Luka 11:2) Kanshi “lyonse” ilyo tulepepa tatufwile ukupepa kuli Yesu nelyo ku muntu umbi, kano fye kuli Lesa. Bushe ifi Yesu alandile, tafilangilila ukuti tulingile ukupepa kuli Lesa ukupitila muli Yesu Kristu, te ku “batakatifu” nelyo ku bantu bambi?

Ipepo lyalicindama sana mu mipepele yesu kabili Baibolo isambilisha ukuti tufwile ukupepa fye kuli Lesa. (Yohane 4:23, 24; Ukusokolola 19:9, 10) E mulandu wine tushifwile ukulungatikila amapepo yesu ku bantu bambi, lelo tufwile ukuyalungatika kuli Lesa epela.

BUSHE MUFWILE UKUTIINA UKUPEPA KULI LESA?

Ilyo Yesu alelanda Ilyashi lya pa Lupili, alandile pa mwana uulelomba bawishi ifya kulya. Bushe bawishi kuti bamupeela ilibwe mu nshita ya kumupeela umukate? Nelyo bushe kuti bamupeela insoka mu nshita ya kumupeela isabi? (Mateo 7:9, 10) Umufyashi uwatemwa umwana te kuti acite ifi!

Katulande pa ca kumwenako cimbi icapalako. Elenganyeni ukuti mwalikwata umwana uo mwatemwa sana kabili uo mumfwana nankwe. Nomba bushiku bumo, mwasanga ukuti kuli icintu cimo icacindama ico alefwaya ukumulomba. Mu nshita ya kuti amulombe, aeba umuntu umbi ukumulombelako pa mulandu wa kuti alemutiina ilyo ninshi mwe bene mwaliba fye bwino. Bushe kuti mwaumfwa shani? Inga nga ca kuti alefwaya fye lyonse pa kulanshanya na imwe, kano fye umuntu umbi e wamulandilako, bushe kuti mwatemwa? Te kuti mutemwe! Abafyashi abatemwa abana babo balafwaya abana balelanshanya nabo mu kulungatika, te kubomfya umuntu umbi, kabili tabafwaya ukuti abana baleumfwa umwenso ukubalomba ifyo balekabila.

Ukulanda pa fyo twingasambilila ku ca kumwenako ca mwana uulelomba ifya kulya ku mufyashi, Yesu atile: “E ico, imwe nangu ca kutila muli babembu, mwalishiba ukupeela abana benu ifya bupe ifisuma, kanshi Shinwe wa mu muulu ena akacilapo nga nshi ukupeela ifisuma ku bamulomba!” (Mateo 7:11) Ukwabula ukutwishika, umufyashi alafwaisha sana ukupeela abana bakwe ifintu ifisuma. Kanshi Shifwe wa ku muulu ena alicilanapo ukufwaisha ukumfwa no kwasuka amapepo yesu.

Lesa afwaya ukuti tulemupepa mu kulungatika nangu ca kutila ifilubo tupanga kuti fyatulenga ukulaumfwa ububi. Takwaba uuli onse uo apeela umulimo wa kwasuka amapepo ayo tupepa. Baibolo itucincisha ukuti: “Poosa icisendo cobe pali Yehova, na o akakukosha.” (Amalumbo 55:22) Mu nshita ya kushintilila pa batakatifu nelyo abantu bambi ukuti e bengalatulandilako kuli Lesa, tufwile ukucetekela sana Yehova Lesa.

Shifwe wa ku muulu alatusakamana bonse fye ica kuti nangu tuli na mafya, alafwaya ukutwafwa kabili alafwaya no kuti tupalame kuli ena. (Yakobo 4:8) Ala cilatuletela insansa ukukwata ishuko lya kulanda na Lesa kabili Shifwe ‘uumfwa amapepo’!—Amalumbo 65:2.

[Icikope pe bula 13]

Nga filya wishi uwatemwa umwana alanshanya nankwe, e fyo Lesa na o afwaya ukuti tulelanshanya nankwe