“Moneni! Ndelenga Ifintu Fyonse Ukuba Ifipya”
PALAMENI KULI LESA
“Moneni! Ndelenga Ifintu Fyonse Ukuba Ifipya”
Bushe imwe no lupwa lwenu mulafwaisha ukuba no bumi busuma e lyo no kwikala imyaka iingi? Bushe kuti mwatemwa ukwikala mu calo umushakabe ukukalipwa, ukucula ne mfwa? Icalo umushakabe fyonse ifi kabili umo abantu bakaba no bumi busuma cikabako. Yehova Lesa alilaya ukuti akaleta icalo cipya umukaba abalungami. Moneni ifyo Lesa akafikilisha ubufwayo bwakwe pa Ukusokolola 21:3-5.—Belengeni.
“[Lesa] akafuuta ifilamba fyonse ku menso yabo.” (Ukusokolola 21:4) Bushe filamba nshi Lesa akafuuta? Te filamba fya nsansa nelyo filya ificingilila amenso, lelo ni filya tulukusha pa mulandu wa kucula no bulanda. Lesa takafuute fye ifilamba iyo, lelo akafumyapo na fyonse ifilenga ukuti tulelila, pamo nga ukucula e lyo no bulanda.
“Imfwa tayakabeko na kabili.” (Ukusokolola 21:4) Imfwa e ilenga sana abantu ukulaloosha. Lelo, Yehova akalubula abantunse bacumfwila ku mfwa. Akacita shani? Akafumyapo icilenga tulefwa, e kuti ulubembu twapyana kuli Adamu. (Abena Roma 5:12) Yehova akabomfya ilambo lya kwa Yesu ku kulenga abantunse bacumfwila ukuba abapwililika. * Lyena umulwani wa kulekelesha, imfwa, ‘ikonaulwa.’ (1 Abena Korinti 15:26) Abantunse bacumfwila bakekala no bumi busuma umuyayaya, nga fintu Lesa alefwaya.
“Takwakabe . . . ukukalipwa na kabili.” (Ukusokolola 21:4) Kukalipwa kwa musango nshi ukushakabeko na kabili? Kukalipwa uko abantu bomfwa pa mulandu wa masakamika, ubulanda e lyo no kukalipwa kwa mubili. Ulubembu no kukanapwililika e filenga abantu ukulakalipwa e lyo no kukanaba ne nsansa.
Nomba line, ukuloosha, ukukalipwa ne mfwa tafyakabeko. Bushe ni kwi aya amalayo yakafikilishiwilwa? Bushe ni ku muulu? Awe, iyo. Mulandu nshi twalandila ifi? Ica kubalilapo, ubu bulayo butendeka na mashiwi ya kuti, “itenti lya kwa Lesa lili pamo na bantunse,” kabili nga fintu twaishiba, abantunse bekala pa calo. (Ukusokolola 21:3) Ica bubili, ubu bulayo bulanda ukuti, “imfwa tayakabeko na kabili.” Kanshi nangu ca kuti kwaliba imfwa pali ino nshita, ku ntanshi tayakabeko. Ku muulu takwatala akuba imfwa, ni pano calo e po imfwa yatuteka imfine. Kanshi ifi twalandapo ifyo Lesa atulaya, fikacitikila pano pene pa calo.
Yehova afwaya twacetekela ukuti akatupeela icalo cipya umushakabe ukucula. Yehova alitulaya no kuti: “Moneni! Ndelenga ifintu fyonse ukuba ifipya.” Kabili, atile: “Aya mashiwi ya cishinka kabili ya cine.” (Ukusokolola 21:5) Bushe te kuti mutemwe ukwishibilapo na fimbi pa fyo imwe, balupwa lwenu ne fibusa mwingabombela Lesa ne nsansa capamo na babomfi ba kwa Lesa bambi pa kuti mukamone ifyo Lesa akafikilisha ifyo alaya?
Amalembo ya Kubelenga mu December
1 Petro 1-5; 2 Petro 1-3; 1 Yohane 1-5; 2 Yohnae 1-13; 3 Yohane 1-14 ukufika ku Ukusokolola 1-22
[Futunoti]
^ para. 3 Nga mulefwaya ukwishibilapo na fimbi pe lambo lya cilubula ilya kwa Kristu, belengeni icipandwa 5 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
[Amashiwi pe bula 11]
Lesa akafuuta ifilamba ifyo abantu abengi balukusha pa mulandu wa bulanda no kucula
