Abantu abengi nga nshi mu calo balasefya Krisimasi. Ico bamo basefesha, kufwaya ukuba pamo ne fibusa na balupwa wabo. Bambi nabo bamona ukuti e nshita batontonkanya pali Lesa, nelyo ukwafwilisha abapiina. Abacita ifi bamona ukuti tacalubana. Lelo icalenga ukuti balecita ifi pali ubu bushiku, ni co tabaishiba icalengele ukuti abantu batendeke ukusefya Krisimasi.

Ica kubalilapo, abengi abasefya Krisimasi batila e bushiku ubo Yesu afyalilwepo. Lelo abasambilila ilyashi lya kale batila ubushiku Yesu afyalilwepo tabwaishibikwa. Icitabo icitila The Christian Book of Why casosa ukuti, “Abena Kristu bakubalilapo tababikile ubushiku bwa kusefeshapo ukufyalwa kwa kwa Yesu,” pantu tabalefwaya “ukulakonka ifyalecita abasenshi.” Na kabili, Baibolo tayalandapo ukuti Yesu alesefya ubushiku bwa kufyalwa kwakwe nelyo ubwa muntu umbi. Ico Yesu aebele abasambi bakwe ukulaibukisha, ni mfwa yakwe.—Luka 22:19.

Ica bubili, abasambilila abengi balisumina ukuti ifingi ifyo bacita pa Krisimasi fyafuma ku bashali Bena Kristu e lyo na ku ntambi sha basenshi. Abantu nga balesefya balepeeleshanya ifya bupe, balesanika amakandulo, balekobeka amaluba, baleimika icimuti ca Krisimasi, e lyo baleimba ne nyimbo, kabili kwaleba na Father Chrismas. Icitabo icitila The Externals of the Catholic Church calanda pali fimo ifyo bacita pa Krisimasi ukuti: “Bushe twalishiba ukuti nga twapeela bamo nelyo ukupokelela ifya bupe pa Krisimasi, no kukobeka amaluba mu mayanda yesu na mu macalici ninshi tulekonka intambi sha basenshi?”

Nalimo kuti mwatila, bushe calibipa ukucita ifi fintu ifimoneka ukuti fyaliba fye bwino? Natulande pa mulandu wa butatu pa kuti twasuke ici cipusho. Lesa tafwaya tulekonka intambi sha basenshi pa kumupepa. Ukupitila muli kasesema Amose, Yehova aebele abena Israele abalekonka intambi sha basenshi ati: “Nalipata kabili nalikaana imitebeto yenu . . . Fumyeni apa icongo ca nyimbo shenu.”—Amose 5:21, 23.

Cinshi Yehova akalipiile ifi? Tontonkanyeni pa fyalecita abena Israele abali mu bufumu bwa ku kapinda ka ku kuso. Imfumu ya kubalilapo Yeroboamu, yapangile ifimpashanya fya bana ba ng’ombe aba golde, no kufibika mu musumba wa Dani no wa Betele, kabili yaebele abantu ukulapepa aba abana ba ng’ombe mu nshita ya kulapepa Yehova Lesa pe tempele mu Yerusalemu. Imfumu yapekenye ne mitebeto, no kusonta bashimapepo abakwangalila abalesefya.—1 Ishamfumu 12:26-33.

Abena Israele balemona kwati ifyo balecita fyali fye bwino. Balemona kwati balepepa Lesa, kabili balemusekesha. Nomba ifyo Yehova alandile ukupitila muli kasesema Amose na bakasesema bambi, filanga ukuti Yehova tatemenwe nangu fye panono pa fyo balecita. Ukupitila muli kasesema Malaki, Lesa atile: “Nine Yehova; nshayaluka iyo.” (Malaki 3:6) Bushe aya mashiwi tayaletulanga fye apabuuta tuutu ukuti Lesa tomfwa bwino abantu nga balesefya Krisimasi?

Abantu abengi abatontonkanyapo sana pali ifi twalandapo balileka ukusefya Krisimasi. Lelo balatemwa sana ukuba pamo na balupwa wabo ne fibusa, kabili balatemwa no kwafwa abapiina pa nshita ili yonse iya mu mwaka.