Bushe Kuti Twasekesha Lesa?
Mufwile mwalibelengapo mu Baibolo pa bantu abo batasha sana e lyo mwatila, ‘Te kuti imbe nga bena!’ Nalimo kuti mwatila, ‘Nshili wa kaele nelyo umulungami kabili te lyonse incita ifisuma.’
Yobo aali “uwa kaele kabili umulungami.” —Yobo 1:1
Baibolo ilanda ukuti Yobo aali “uwa kaele kabili umulungami.” (Yobo 1:1) Lote bamulondolola ukuti aali “mulungami.” (2 Petro 2:8) Davidi na o Baibolo yamulondolola ukuti alecita “icalungama” mu menso ya kwa Lesa. (1 Ishamfumu 14:8) Nomba natulande pa fintu na fimbi ifyo Baibolo yalandapo pali aba bantu. Twalamona ukutila (1) aba bantu balelufyanya, (2) kuti twasambililako ifingi kuli bena, no kuti (3) abantunse abashapwililika kuti basekesha Lesa.
BALELUFYANYA
“[Lesa] apuswishe Lote, umulungami, uwalengelwe ubulanda nga nshi ku mibele ya kuilekelesha iya bampulamafunde.”—2 Petro 2:7
Yobo aali na mafya ayengi kabili alemona kwati balemufyenga. Alemona kwati Lesa tabikileko amano ku fyo alecita nampo nga ali mutetekeele nelyo iyo. (Yobo 9:20-22) Yobo alishibe ukuti ali umulungami, lelo bambi balemumona kwati, alemona ukuti mulungami sana ukucila Lesa.—Yobo 32:1, 2; 35:1, 2.
Lote tacitile bwangu ifyo Lesa amwebele. Aleumfwa sana ububi pa fyabipa ifyo abantu ba mu Sodomu na Gomora balecita, ica kuti “fyalelungulusha umweo wakwe.” (2 Petro 2:8) Lesa alandile ukuti ali no konaula abantu abalecita ifyabipa, lelo ali no kupususha fye Lote no lupwa lwakwe. Apo Lote aleumfwa ububi pa fyo abantu balecita, nalimo kuti mwatontonkanya ukuti e wali no kubalilapo ukufuma muli uyu musumba. Na lyo line, Lote tafumine bwangu mu musumba. Bamalaika abo Yehova atumine ukupususha Lote no lupwa lwakwe babekete pa maboko no kubafumisha ku nse ya musumba pa kuti befwa.—Ukutendeka 19:15, 16.
Davidi ‘alenkonka [Lesa] no mutima wakwe onse pa kulacita lyonse icalungama mu menso ya kwa Lesa.’—1 Ishamfumu 14:8
Davidi bushiku bumo alifililwe ukuilama ica kuti alicitile ubucende na muka mwine. Ku ca bulanda, Davidi alipeye umulume wa uyu mwanakashi pa kuti fye afise ulubembu ulo acitile. (2 Samwele, icipandwa 11) Baibolo itila ifyo Davidi acitile “fyalibipile mu menso ya kwa Yehova.”—2 Samwele 11:27.
Yobo, Lote na Davidi balicitilepo ifilubo, kabili ifilubo ifyo bamo pali aba bacitile fyalibipile sana. Nomba nga fintu twalamona, balefwaisha ukubombela Lesa ne cishinka. Balilangile ukuti tabaumfwile bwino pa filubo bacitile kabili balilapiile. Kanshi Lesa alibabeleele uluse pa filubo bacitile, e co Baibolo ilandila pali aba bantu ukuti baali aba citetekelo.
IFYO TWINGASAMBILILAKO
Apo tatwapwililika, ilingi line tulalufyanya. (Abena Roma 3:23) Nga twalufyanya, tulingile ukulanga ukuti natumfwa ububi pa fyo tucitile kabili tufwile no kuleka ukucita ifyabipa.
Finshi Yobo, Lote na Davidi bacitile pa kulanga ukuti balilapiile? Yobo ali muntu umulungami. Ilyo Lesa alandile nankwe, Yobo alyumfwile ububi pa fyo alandile kabili alilapiile. (Yobo 42:6) Ifyo Lote alemona abantu abalecita ifyabipa mu Sodomu na Gomora, e fyo na Lesa amona abacita ifyabipa. Na lyo line, Lote aleshingashinga ilyo Yehova amwebele ukufuma mu musumba. Lote asukile afulumuka muli iyi misumba kabili alipuswike. Lote alyumfwilile ifyo Lesa amwebele ukuti talingile ukulolesha ku numa. Nangu ca kuti Davidi alitobele ifunde lya kwa Lesa ilyo acitile icilubo cabipisha, alilangile ukuti alyumfwile ububi pa fyo acitile ilyo alapiile ukufuma pa nshi ya mutima e lyo na pa kulomba kuli Lesa ukuti amweleele.—Amalumbo 51.
Lesa alemona ukuti aba bantu bali abalungama pantu alishiba ukuti fwe bantunse tatwapwililika. Lesa “alishiba bwino ifyo twapangwa, alebukisha ukuti tuli lukungu.” (Amalumbo 103:14) Kanshi nga ca kuti Lesa alishiba ukuti tulalufyanya, finshi enekela kuli ifwe?
Lesa “alishiba bwino ifyo twapangwa, alebukisha ukuti tuli lukungu.”—Amalumbo 103:14
BUSHE ABANTU ABASHAPWILILIKA KUTI BASEKESHA LESA?
Ifyo Davidi aebele Solomone filalenga twaishiba ifyo twingacita pa kusekesha Lesa. Atile: “Iwe, Solomone mwana wandi, ishiba Lesa wa kwa wiso no kumubombela no mutima onse.” (1 Imilandu 28:9) Bushe calola mwi ukubombela Lesa no mutima onse? Calola mu kuti tufwile ukutemwa Lesa, ukwishiba ifyo afwaya e lyo no kulacita ifyo afwaya. Ici tacipilibula ukuti te kuti tulufyanye, lelo cipilibula ukuti tufwile ukulaumfwila ifyo Lesa atweba e lyo no kuitemenwa ukulomba ubwelelo nga twalufyanya. Ukutemwa Lesa e lyo no kulamumfwila e fyalengele Yobo abe “uwa kaele,” Lote abe “umulungami,” e lyo na Davidi ukuti ‘alecita lyonse icalungama’ mu menso ya kwa Lesa. Nangu ca kuti limo balelufyanya, balesekesha Lesa.
Umuntu uwatemwa Lesa alacita ifyo Lesa afwaya kabili alafwaisha no kulamumfwila
Kanshi nga ca kuti tulatontonkanya pa fyabipa ifyo tushifwaya ukutontonkanyapo nelyo tulalanda fimo ifilenga twaumfwa ububi, nangu nga tulacita fimo e lyo twailuka ukuti fibi, ifyacitile aba tulandilepo kuti fyatwafwa. Lesa alishiba ukuti tuli babembu. Na lyo line, enekela ukuti tulingile ukumutemwa e lyo no kulaesha sana ukulamumfwila. Nga ca kuti tulemubombela no mutima onse, ninshi na ifwe bene kuti twasekesha Lesa.
