NGA mwatontonkanya pali aya amashiwi ayalandile aba abantu babili ayali pa muulu, mashiwi nshi ayo imwe mumona ukuti ya cine? Abantu abengi bamona ukuti amashiwi ayalandile Sauli uwa ku Tarsi, uwaishileba umutumwa Paulo, yasuma kabili yalasansamusha. (Imilimo 17:26, 27) Mu Baibolo mwaliba amashiwi na yambi ayatusansamusha. Ku ca kumwenako, Yesu alipepele ipepo umo aebele abasambi bakwe ukutila kuti baishiba Lesa kabili kuti bapaalwa.—Yohane 17:3.

Na lyo line, abantu pamo nga Philo balemona kwati abantunse te kuti beshibe Lesa nangu panono. Nomba bushe ca cine abantu te kuti beshibe Lesa?

Baibolo taipita mu mbali, lelo ilanda ukuti kwaliba ifintu fimo pali Lesa ifyo abantu bashingomfwikisha. Ku ca kumwenako, abantu te kuti beshibe bwino bwino umo calola ukuti Lesa abako umuyayaya, te kuti beshibe ifyo atontonkanya ne fyo amano akwata yafula. Nangu ca kuti kwaliba ifyo tushingomfwikisha pali Lesa, tacalola mu kuti te kuti tumwishibe. Na kuba, ukutontonkanya pali ifi, kuti kwalenga ‘twapalama kuli Lesa.’ (Yakobo 4:8) Kanshi natulande pa fintu fimo fimo ifyo tufilwa ukumfwikisha pali Lesa e lyo tulande na pa fintu ifyo twingomfwikisha pali ena.

LESA ABAKO UMUYAYAYA: Baibolo itila Lesa abako “ukufuma umuyayaya no kuya umuyayaya.” (Amalumbo 90:2) Ici calola mu kuti, Lesa takwata intendekelo kabili takakwate ne mpela. Baibolo itila, “Impendwa ya myaka yakwe te kuti ishibikwe” ku bantunse.—Yobo 36:26.

Ifyo cawamina: Lesa alilaya ukuti akamupeela umweo wa muyayaya nga ca kuti mwamwishiba. (Yohane 17:3) Bushe Lesa kuti alaya shani abantu ukuti bakekala umuyayaya nga ca kutila ena te kuti ekale umuyayaya? Uwingafikilisha fye ifi ni “Mfumu ya muyayaya.”—1 Timote 1:17.

IFYO LESA ATONTONKANYA: Baibolo itila takwaba ‘uwingeshiba umucetekanya’ wa kwa Lesa pantu ifyo atontonkanya fyalicila pa fyo fwe bantu tutontonkanya. (Esaya 40:28; 55:9) Ici e calenga Baibolo ilande ukuti: “Nani uwaishiba ifyo Yehova atontonkanya, pa kuti amusambilishe?”—1 Abena Korinti 2:16.

Ifyo cawamina: Lesa alakutika ku mapepo ya bantu abengi sana pa muku fye umo. (Amalumbo 65:2) Aleshiba no kwishiba nga ca kuti uluseba lwaponena pa nshi. Bushe kukatala akuba inshita ilyo Lesa akakwata ifya kutontonkanya ifingi ica kuti akafilwe no kwishiba ukuti e ko mwaba e lyo no kukutika ku mapepo yenu? Ica musango uyo te kuti cicitike pantu amatontonkanyo yakwe tayapelela. Na kuba, kuli ena “mwalicindama ukucila inseba ishingi.”—Mateo 10:29, 31.

IFYO LESA ACITA IFINTU: Baibolo itila umuntu te kuti eluke “umulimo uo Lesa wa cine aabomba ukutula pa kutendeka no kufika ku mpela.” (Lukala Milandu 3:11) Kanshi tatwakeshibe ifintu fyonse pali Lesa pantu takwaba umuntu “uwingeluka” fyonse pali ena. (Abena Roma 11:33) Na lyo line, Lesa afwaya ukuti abantu abamubombela baishiba imibele yakwe.—Amose 3:7.

Ifyo cawamina: Nga mulebelenga no kusambilila Baibolo, ninshi mukalaishibilako ifintu ifipya pali Lesa na pa mibele yakwe. Ne ci kuti calenga mwapalama sana kuli Shifwe wa ku muulu, umuyayaya.

Nangu ca kuti kwaliba ifyo tushingomfwikisha pali Lesa, tacalola mu kuti te kuti tumwishibe nangu panono. Muli Baibolo mwaliba ifintu ifingi ifingalenga twaishiba bwino Lesa. Natulande pa fya kumwenako:

ISHINA LYA KWA LESA: Baibolo itila Lesa alikwata ishina. Lesa atile: “Nine Yehova. Ilyo e shina lyandi.” Ishina lya kwa Lesa lilasangwa imiku iingi mu Baibolo ukucila amashina yonse ayabamo. Lisangwamo ukucila pa miku 7,000.—Esaya 42:8.

Ifyo cawamina: Yesu apepele ukuti: “Shifwe wa mu muulu, ishina lyenu libe ilya mushilo.” (Mateo 6:9) Bushe na imwe mulalumbula ishina lya kwa kwa Lesa nga mulepepa? Yehova alilaya ukupususha bonse abacindika ishina lyakwe.—Abena Roma 10:13.

ICIFULO UKO LESA EKALA: Baibolo ilanda ukuti kwaba ififulo fibili. Ica kubalipo, cifulo umwaba icalo e lyo ne myulu. Ica bubili muulu ukwaba ifibumbwa fya mupashi. (Yohane 8:23; 1 Abena Korinti 15:44) Baibolo nga yalanda pa “muulu,” ilingi line ilanda pa cifulo ukwaba ifibumbwa fya mupashi. Kanshi mu “muulu” e mwaba “ubwikalo” bwa kwa Kabumba.—1 Ishamfumu 8:43.

 Ifyo cawamina: Nga twaishiba icifulo ukwaba Lesa, cilalenga twaishiba bwino ifyo Lesa aba. Lesa te maka fye ayasangwa ukuli konse na mu fintu ifili fyonse. Yehova Muntu uwa cine cine kabili alikwata ne cifulo uko ekala. Nangu ca kuti ekala ku muulu, “takwaba icibumbwa icafisama ku cinso cakwe.”—AbaHebere 4:13.

IMIBELE YA KWA LESA: Baibolo ilanda ukuti Yehova alikwata imibele iisuma sana. Itila: “Lesa kutemwa.” (1 Yohane 4:8) Baibolo ilanda no kuti Lesa tabepa. (Tito 1:2) Lesa taba na kapatulula, wa luse, wa mutembo kabili alakokola ukukalipa. (Ukufuma 34:6; Imilimo 10:34) Nalimo kuti capapusha abengi ukwishiba ukuti, Kabumba alafwaya ukuba “cibusa wa bantu” abamutiina.—Amalumbo 25:14.

Ifyo cawamina: Nga mwaishiba imibele ya kwa Yehova kuti mwaba cibusa wakwe. (Yakobo 2:23) Lyena nga mwaishiba imibele yakwe, kuti calenga mwalaumfwikisha ifyaba mu Baibolo.

Baibolo yalilondolola bwino bwino ifyo Yehova Lesa aba. Kabumba afwaya ifwe twamwishiba. Na kuba, Icebo cakwe Baibolo cilanda ukuti: “Nga wamufwaya, akaleka ukamusange.” (1 Imilandu 28:9) Kuti mwaishiba Lesa nga mulebelenga Baibolo no kulatontonkanya pa fyo mulebelenga. Nga mulecita ifi, Baibolo ilanda ukuti Lesa “akapalama kuli imwe.”—Yakobo 4:8.

Nalimo kuti muletontonkanya amuti, ‘Apo te kuti njishibe fyonse pali Kabumba, kuti naba shani cibusa wakwe?’ Tontonkanyeni pali ici: Bushe umuntu uulingile ukuba cibusa wa kwa dokota afwile fye ukuba dokota? Awe nakalya! Umuntu fye uuli onse kuti aaba cibusa wa kwa dokota. Icacindama ca kuti, cibusa wa kwa dokota aleshiba bwino imibele ya kwa dokota, ifyo atemwa e lyo ne fyo apata. E fyo caba nga mulefwaya ukuba cibusa wa kwa Lesa. Nga mulebelenga muli Baibolo e lyo mukeshiba imibele ya kwa Yehova, imibele iisuma iyingalenga mwaba cibusa wakwe.

Muli Babolo mwaliba ifyebo ifingi ifingatwafwa ukwishiba Lesa. Bushe kuti mwatemwa ukwishibilapo na fimbi pali Yehova Lesa? Inte sha kwa Yehova balasambilisha abantu Baibolo. Nga mulafwaya ukusambilila, kuti mwaeba ba Nte ababela ku cifulo mwikala nelyo kuti mwaya pa webusaiti yesu pa www.dan124.com/bem.