ICIPANDE ICIKALAMBA BUSUMA NSHI BWABA MU KUPEPA?
Bushe Kwaliba Uukutika Nga Tulepepa?
Abantu bamo bamona kwati umuntu uulepepa apoosa fye inshita, pantu baishiba ukuti takwaba uumfwa amapepo. Bambi nabo balyeshapo ukupepa, nomba bamwene kwati Lesa tabaswike. Umuntu umo uwasumina ukuti Lesa takwaba alipepele ati: “Mwe Lesa nga e ko mwaba, ntepelesheniko fye.” Uyu muntu alandile no kuti “Lesa ali fye tondolo.”
Baibolo yena ilatweba ukuti kwaliba Lesa, uumfwa amapepo. Baibolo itila: “[Lesa] akakumfwila uluse ilyo walila; ilyo aumfwa fye ukulila kobe akakwasuka.” (Esaya 30:19) Ilembo limbi litila: “Ipepo lya balungami lilamusekesha.”—Amapinda 15:8.
Yesu alipepele kuli Wishi, “kabili balimuumfwile.”—AbaHebere 5:7
Baibolo ilalanda na pa bantu abo Lesa ayaswike ilyo bapepele. Ilembo limo litila Yesu alipepele no “kulomba . . . kuli Uyo uwali na maka ya kumupususha” kabili “balimuumfwile.” (AbaHebere 5:7) Amapepo na yambi ayo Lesa ayaswike kuti twayasanga pali Daniele 9:21 na pali 2 Imilandu 7:1.
Nomba cinshi cilenga bamo balemona kwati Lesa taasuka amapepo yabo? Pa kuti amapepo yesu yaleasukwa, tulingile ukulapepa kuli Yehova, * Lesa uo Baibolo yalandapo. Tatulingile ukupepa kuli tulesa tumbi nelyo ku fikolwe. Lesa afwaya ‘tulemulomba ukulingana no kufwaya kwakwe.’ Nga tulepepa ukulingana no kufwaya kwakwe, Lesa atweba ukuti ‘akalatumfwa.’ (1 Yohane 5:14) Kanshi nga tulefwaya amapepo yesu yaleasukwa, tulingile ukwishiba Lesa, uo Baibolo yalandapo kabili tulingile ukwishiba ne fyo afwaya.
Abantu abengi balishiba ukuti Lesa alakutika no kwasuka amapepo. Ba Isaac, aba ku Kenya, batile: “Nalipepele ukuti Lesa angafwe pa kuti ndeumfwikisha ifyaba mu Baibolo. Tapakokwele, kwali umuntu uwantandalile e lyo atendeka ukunsambilisha.” Ba Hilda, aba ku Philippines, balefwaya ukuleka ukupeepa fwaka. Apo baleesha ukuleka lelo balefilwa, abena mwabo babebele ukuti, “Cinshi te kuti upepele fye kuli Lesa pa kuti akwafwe?” Ba Hilda balipepele kabili batile: “Nalipapile ifyo Lesa angafwile. Icilaka ca fwaka calitendeke ukupwa. E ico nalilekele ukupeepa.”
Bushe na imwe mulamona ukutila Lesa kuti amwafwa mu mafya mukwata nga ca kuti mwapepa ukulingana no kufwaya kwakwe?
^ par. 6 Baibolo itila ishina lya kwa Lesa ni Yehova.
