Tukonka ifyo Baibolo ilanda pa fililo, ukubikako ne fi twalalandapo:

•   Caliba fye bwino ukuloosha nga ca kuti cibusa afwa. Abasambi ba kwa Yesu balilooseshe ilyo ifibusa fyabo fyafwile. (Yohane 11:33-35, 38; Imilimo 8:2; 9:39) E ico, tatumona ifililo nge nshita ya kusefya no kunwa ubwalwa. (Lukala Milandu 3:1, 4; 7:1-4) Lelo tumona inshita ya kuloosha ukuti ni nshita ya kulangulukilako abafwililwe.​—Abena Roma 12:15.

•   Abafwa tabaishiba icili conse. Nangu ca kuti twakulila ukwapusanapusana kabili tukonka intambi ishalekanalekana, tatukonka intambi nelyo ukucita ifintu ifyo Baibolo ishasuminisha pamo nga filya abantu basumina ukuti abafwa kuti bacita ifintu fimo ku ba mweo. (Lukala Milandu 9:5, 6, 10) Pali ifi paba ne ntambi pamo nga ukulinda icitumbi, ukupoosa indalama ishingi sana pa kusefya icililo na pa kwibukisha umuyashi, ukutuula amalambo ku bafwa, ukulanda na bafwa no kubalomba ifintu, e lyo ne fintu fimbi ifyo bacita kuli mukamfwilwa nelyo ku mwaume uufwililwe umwina mwakwe. Tatukonka ishi intambi shonse pantu tulomfwila ifyo Baibolo yalanda ukuti: “E ico fumenimo muli bena, . . . kabili mwi-ikatako ku cishasanguluka.”—2 Abena Korinti 6:17.

•   Abafwa bakabuuka. Tubelenga mu Baibolo ukuti kukaba ukubuuka kabili inshita ileisa ilyo imfwa tayakabeko. (Imilimo 24:15; Ukusokolola 21:4) Ukwishiba ukuti abafwa bakabuuka kulatwafwa ukukaanalosha ukucila mu cipimo, nga fintu kwayafwile Abena Kristu bakubalilapo.​—1 Abena Tesalonika 4:13.

•   Baibolo itweba ukuti tulingile ukuba abafuuka. (Amapinda 11:2) Twaishiba ukuti inshita ya cililo te nshita ya “kuitakishisha” ku bantu pa fyuma twakwata nelyo ifibusa twakwata. (1 Yohane 2:16) Tatufwaya ukuti ifililo fyesu fyaba ifya lulumbi, nelyo ukushita imbokoshi isha mutengo sana no kufwala ifya kufwala ifya kuti abantu balekumbwa.

•   Tatupatikisha abantu ukucita ifintu ifyo twasuminamo. Tukonka aya mashiwi yatila: “Awe ifwe bonse umo umo tukalubulula kuli Lesa.” (Abena Roma 14:12) Na lyo line, nga batwipusha tulalondolola ifyo twasuminamo “no mutima uwafuuka na katiina.”—1 Petro 3:15.

 Ukwakubela icililo: Aba mu lupwa e balingile ukufwaya ukwalabela icililo pamo nga Ing’anda ya Bufumu iyo balabomfya, ifikuulwa ifyo balooseshamo, no kwa kushiika.

 Ilyashi lya cililo: Kulaba ilyashi lya kusansamusha abaleloosha ukubomfya Baibolo no kubalondolwela ifyo ilanda pa mfwa na pe subilo lya kuti abafwa bakabuuka. (Yohane 11:25; Abena Roma 5:12; 2 Petro 3:13) Mu lyashi lya cililo kuti balandako na pa mibele iisuma iyo umuyashi akwete ingalenga icitetekelo cabeshile ku cililo ukukoselako.—2 Samwele 1:17-27.

 Kuti baimba no lwimbo ululanda pa fyaba mu Baibolo. (Abena Kolose 3:16) Pa numa ye lyashi kulaba no kupepa ipepo lya kusansamusha abaleloosha.​—Abena Filipi 4:6, 7.

 Ukutuula umutuulo nelyo indalama: Tatulipilisha abantu nga baisa mu kulongana, ku fililo, na kabili tatupoka umutuulo.—Mateo 10:8.

 Abakusangwako: Abashili ba Nte kuti baya ku Ng’anda ya Bufumu ukubelele icililo nga filya fine ciba ku kulongana kumbi uko tukwata.

 Cila Nte alingile ukuisalilapo ukulingana na kampingu yakwe iyasambilishiwa na Baibolo nampo nga kusangwako nelyo iyo. (1 Timote 1:19) Na lyo line, tatucitako ifintu fimo ifyo bacita pa cililo ifyo tumona ukuti Baibolo yalikaanya.​—2 Abena Korinti 6:14-17.