Icilonda nacenene umunandi uo twalesambilila nankwe ifya kulwa calibipishe ukucila pa fyo naletontonkanya. Ukwabula ukwenekela nalimupantile pa mona. Nalyumfwile ububi ica kuti natendeke ukutontonkanya pa kuleka ukulwa. Mulandu nshi ifyo nacitile fyalengeele natendeka ukulatontonkanya pa kuleka ukuteya icangalo ico natemenwe sana? Intanshi lekeni mulondolwele ifyo natendeke ukulwa.

 Nakulile mupepi na ku Buffalo, mu New York, ku U.S.A. kabili nakulile mu lupwa umwali sana insansa kabili twalepepa ku Katolika. Naleya kwi sukulu lya ba Katolika kabili nali kampenga. Abafyashi bandi balefwaya ukuti ine na nkashi yandi tukekale bwino ku ntanshi. E ico balensuminisha ukwangalako amangalo ya pa sukulu nelyo ukubombako incito inshiku shimo shimo kulila fye ndecita bwino ku sukulu. Ici calengele ukuti ilyo nali fye umwaice nsambilile ukulailama.

 Ilyo nali ne myaka 17 natendeke ukusambilila ifya kulwa. Pa myaka iingi nalesambilila pa ma-awala yatatu cila bushiku kabili inshiku 6 mu mulungu. Cila mulungu nalepoosa inshita iikalamba ukulatontonkanya pa fya kwishibilako ukulwa kabili naletamba na mavidio. Nalitemenwe ukusambilila ifya kulwa ninshi ninkaka insalu pa menso nangu ndi ne fyanso. Naletoba imbao e lyo na matafwali kwi kofi fye limo. Naishileishiba sana ifya kulwa ica kuti nalepoka ne filambu ifingi nga tulecimfyanya. Ukulwa e kwacindeme sana mu bumi bwandi.

 Nalemona kwati ifi nalecita fyali no kulenga naba ne nsansa. Nalipwishishe isukulu pa universiti kabili nalikwete amatoni ayengi. Nalibombeleko ku kampani kamo kabili nalebombela ku makompyuta. Pa kampani nalebomba baletupeela ifintu ifingi ukulunda pa ndalama baletufolesha cila mweshi, nalikwete ing’anda kabili nalikwete no mukashana. Abantu balemona kwati naleikala fye bwino kabili nali ne nsansa lelo nalikwete ifipusho ifingi ifyo nshaishibe ifyasuko.

 Pa kuti nsange ifyasuko ku fipusho nakwete natendeke ukulaya ku calici imiku ibili mu mulungu kabili nalitendeke no kulapepa sana kuli Lesa. Nomba bushiku bumo ifyo nalanshenye no munandi fyalengele na-aluka. Namwipwishe ukuti: “Bushe walibala autontonkanyapo ico twabela pano calo?” Kabili namwebele no kuti: “Muno calo mwaliba amafya ayengi sana na bantu tababa no mulinganya!” Anjaswike ukuti na o alitontonkenyepo pa fipusho fimo fine kabili alisangile ne fyasuko mu Baibolo. Ampeele icitabo citila Kuti Waikala Kuli pe na pe Muli Paradaise pe Sonde. a Atile alesambilila Baibolo ne Nte sha kwa Yehova. Pa kubalilapo nshalefwaya ukupoka icitabo pantu naletontonkanya ukutila mfwile fye ukulabelenga impapulo sha ku calici uko nalepepa. Na lyo line apo nalefwaisha ukusanga ifyasuko ku fipusho nakwete nalipokele pa kuti mone nga ca kuti ifyo Inte sha kwa Yehova balesambilisha fyali fya cine.

 Nalipapile sana ilyo naishibe ifyo Baibolo isambilisha. Nalisambilile ukuti Lesa alefwaya abantu baleikala pano isonde umuyayaya kabili ifyo alefwaya tafya-aluka nakalya. (Ukutendeka 1:28) Nalipapile ilyo nasangile ukuti muli Baibolo yandi iya King James version mwali ishina lya kwa Lesa ilya kuti Yehova, kabili e shina nalepepelapo lyonse ilyo ndepepa ipepo lya we Shifwe. (Amalumbo 83:18; Mateo 6:9) Na kabili nalisambilile umulandu Lesa alekela abantu ukulacula. Fyonse ifyo nasambilile fyalimfikile sana pa mutima. Nalitemenwe icine cine.

 Nshakatale ndaba ifyo naumfwile ilyo nasangilwe ku kulongana kwa Nte sha kwa Yehova pa muku wa kubalilapo. Abantu bonse bali aba mutende kabili balefwaya ukwishiba ishina lyandi. Ubushiku bwa kubalilapo ilyo naile mu kulongana kwali ilyashi ilyaibela ilyalelanda pa mapepo ayo Lesa aasuka. Lilya lyashi lyaliweme sana pantu nalepepa kuli Lesa ukuti angafwe. Lyena nalisangilwe na ku Cibukisho ca mfwa ya kwa Yesu. Ilyo twalelongana nalipapile ukumona ukuti na bana balekonkamo ilyo balebelenga amalembo. Ukulanda fye icishinka nshaishibe ifya kusanga amalembo, lelo Inte sha kwa Yehova balinsambilishe ifya kusanga amalembo muli Baibolo.

 Ilyo natwalilile ukuya mu kulongana, nalicindike sana ifyo Inte sha kwa Yehova balesambilisha. Lyonse nga naya mu kulongana, nalesambilila ifingi kabili ifyo nalesambilila fyalenkoselesha. Lyena balitendeke ukunsambilisha Baibolo.

 Ifyo Inte sha kwa Yehova bali fyalipusene sana ne fyo abantu ba ku calici nalepepa baali. Inte sha kwa Yehova balikatana, bafumacumi kabili balesha apapelele amaka yabo ukucita ifilenga Lesa asekelela. Naishileshininkisha ukuti bali ne mibele iyo Abena Kristu ba cine balingile ukukwata, e kutila, ukutemwana.—Yohane 13:35.

 Ilyo nalesambilila sana Baibolo e lyo naleya ndealuka pa kuti ndecita ifyo Baibolo ilanda. ‘Na lyo line, nalemona kwati te kuti ndeke ukulwa. Nalitemenwe ukusambilila ifya kulwa e lyo no kucimfyanya. Ilyo nalondolwelele uwalensambilisha Baibolo ubwafya nakwete anjebele cikuuku cikuuku ati, “Twalilila fye ukusambilila Baibolo, nincetekela ukuti ukapingulapo bwino ifya kucita.” Ifi fine e fyo nalefwaya ukumfwa. Nga nasambilila sana Baibolo e lyo nalefwaisha ukulacita ifingalenga Yehova Lesa alasekelela.

 Ifyalengele ukuti njaluke, ni filya nacilandapo pa kubala ukuti nalipantile uo twalesambilila nankwe ifya kulwa pa mona ukwabula ukwenekela. Filya fyacitike fyalengele ntontonkanyepo sana nampo nga nali no kuba Umwina Kristu uwa mutende nga ca kuti natwalilila ukusambilila ifya kulwa. Nasambilile ukuti pali Esaya 2:3, 4 pasobele ukuti abakonka ifyo Yehova alanda ‘tabakasambilile inkondo na kabili.’ Kabili Yesu afundile abantu ukuti tabalingile ukuba no lubuli na lintu babafyenga. (Mateo 26:52) E i co nalilekele ukusambilila ifya kulwa, icangalo natemenwe sana.

 Ilyo nalekele ukusambilila ifya kulwa, nalikonkele ifyo Baibolo isambilisha ukuti “ulebombesha pa kuti uleipeelesha kuli bukapepa.” (1 Timote 4:7) Inshita ilya nalepoosa mu kusambilila ifya kulwa natendeke ukuibomfya ukusambilila pali Lesa pa kuti mpalame kuli ena. Umukashana nale-enda nankwe tatemenwe ifyo nalesambilila, e ico nalilekele ukwenda nankwe. Pa 24 January mu 1987 nalibatishiwe no kuba Inte ya kwa Yehova. Tapakokwele natendeke ukubomba bupainiya bwa nshita yonse, nalebomfya inshita yandi ukusambilisha abantu Baibolo. Ukutula ilya nshita, nalikonkanyapo ukubomba umulimo wa nshita yonse kabili inshita ikalamba nalibombela pa maofeshi yakalamba aya Nte sha kwa Yehova mu New York, ku U.S.A.

 Apo pali ino nshita nalishiba icine pali Lesa, nalisanga icintu ico nabulishe kale. Nshumfwa ukuti paliba ico nabulisha. Lelo pali ino nshita nalishiba ico nabela pano calo kabili nalikwata ne subilo ica kuti naliba ne nsansa sha cine cine. Ncili nalitemwa ukutukusha umubili lelo pali ino nshita takwacindama sana kuli ine. Ico nabikako sana amano, kubombela Yehova Lesa.

 Ilyo nalesambilila ifya kulwa nalepoosa sana amano ku bantu pantu naletontonkanishisha kabela ifyo ningile ukucita nga ca kuti umo ansansa. Nomba pali ino nshita ncili nalibika amano ku bantu, nshitontonkanya ukutila kuti bansansa lelo mfwaya ukubashimikila. Muli Baibolo nalisambililamo ifya kuba kapekape ne fya kuba umulume umusuma ku bena mwandi ba Brenda.

 Nangu ca kuti ukusambilila ifya kulwa e co nalefwaisha mu bumi, pali ino nshita nalipyanikishapo icintu icisuma sana. Baibolo itila: “Ukutukusha umubili kwafwa fye panono; lelo bukapepa bwafwa mu fintu fyonse, pantu muli bukapepa mwaliba isubilo lya kuba no bumi pali nomba e lyo na ku ntanshi.”—1 Timote 4:8.