Klodean i wan Witnes blong Jehova long Saot Afrika. Hem i sik bigwan, ale hem i go slip long hospital blong oli katem hem. Hem i gat plante problem blong helt, mo hem i mas mekem sam bigfala desisen long saed blong tritmen we hem i jusum. Bifo mo afta we dokta i katem hem, hem i harem se i slak, i soa long bodi, mo i wari. Klosap ten wik afta we hem i gohom, hem i no save kamaot long bed yet. Mo ol narafala oli no save kam visitim hem, from COVID-19 pandemik.

 Be Klodean i no wantem tingting tumas long sik blong hem. Taswe, hem i askem long God blong i givim paoa long hem blong kamfotem ol narafala. Ale, taem hem i naf blong kamaot long bed, hem i toktok i go long sista blong neba blong hem. Woman ya i bin stadi Baebol wetem ol Witnes bifo, be hem i stopem. Klodean i yusum Baebol blong leftemap tingting blong hem, nao woman ya i wantem stadi bakegen. Mo tu, Klodean i eksplenem from wanem i gud blong joen long ol Kristin miting, mo hem i meksua se woman ya i save konek long lokol kongregesen tru long Intenet. Woman ya i joen long miting, mo hem i givim ansa tu long wan haf blong miting we i kwestin mo ansa.

 Klodean i toktok tu long smol sista blong Baebol studen ya, from we hem tu i wantem stadi Baebol. Mo hem i talem long Klodean nem blong sam narafala we maet oli intres. ?Wanem i hapen? Klodean i statem Baebol stadi wetem fo woman bakegen. !Be stori i no finis long ples ya!

 From we Klodean i soemaot se hem i kea long ol narafala, hem i statem ten Baebol stadi bakegen long taem blong pandemik, hemia i mekem 16 evriwan. Sam long olgeta oli joen oltaem long ol Kristin miting long Intenet. Taem Klodean i bisi blong givhan long ol narafala ya, hem i no moa wari tumas long sik blong hem. Mo tu, hem i luksave se Jehova, “God ya we i mekem olgeta samting blong leftemap tingting blong man,” i kamfotem hem long ol trabol blong hem, taswe hem i naf blong kamfotem ol narafala.—2 Korin 1:3, 4.

 ?Wanem tingting blong ol Baebol studen blong Klodean, long saed blong ol samting we oli stap lanem? Wan long olgeta i talem se: “Baebol stadi i givhan long mi long plante rod. Wan bigfala samting, hemia taem mi lanem nem blong God. Naoia mi save kam klosap moa long Jehova.” Fas woman we Klodean i toktok long hem, naoia hem i rere blong baptaes. Ol ekspiriens ya oli givim bigfala glad long Klodean. Mo hem i kam gud fulwan afta long operesen blong hem.