Daiane i wan Witnes blong Jehova mo hem i mekem wok blong God fultaem, long Brasil. Wan dei, hem i ringim wan yang kapol, mo i serem mesej blong Baebol long tufala mo tufala i intres. Mo tufala i talem long Daiane se bambae tufala i muv i go long wan vilej we i stap longwe, mo i no gat lektrik o intenet. Antap long hemia, i no gat ol Witnes blong Jehova tu long vilej ya. So blong gohed long storian blong olgeta, kapol ya i givim namba blong wan pablik telefon blong vilej ya long Daiane, mo oli putum wan stret dei mo taem blong hem i save kolem tufala.

 !Daiane i ring long stret taem we oli putum, mo kapol ya i ansarem fon! Mo long tufala wik biaen, trifala i gat gudfala storian long telefon.

 Afta long taem ya, hem i gohed blong ring be kapol ya i no moa ansarem fon. Be Daiane i no givap, hem i gohed blong ring tri taem long wan wik, mo hem i storian wetem ol man we oli ansa long fon. From samting ya, Daiane i naf blong statem plante Baebol stadi long vilej ya.

 Wan dei, taem Daiane mo hasban blong hem i stap mekem Baebol stadi blong wan yang man long pablik telefon ya, wan lida blong skul long vilej ya i harem storian blong olgeta. Ale, hem i kam stanap klosap long Baebol stadi ya blong hem i save lesin gud. Taem oli finis, lida blong skul ya i askem blong toktok wetem Daiane mo hasban blong hem. Hem i glad tumas long samting we hem i harem, mo hemia i mekem se hem tu i wantem stadi Baebol.

 Long sem taem ya, Daiane mo hasban blong hem i stadi Baebol wetem sikis man long vilej ya, mo oli mekem tru long telefon nomo. Mo wan long ol man ya hemia lida blong skul we yumi tokbaot antap. Sam long ol Baebol stadi ya oli stap joen long ol Kristin miting tru long pablik telefon ya. Wan long olgeta i mekem wan stul, blong oli save sidaon long hem taem oli stap stadi.

 Daiane mo hasban blong hem i glad tumas se tufala i gat nambawan janis ya blong serem mesej blong Kingdom i go long vilej ya we i stap longwe. Daiane i talem se: “Jehova save mekem se gud nius i kasem evri man, nating sipos ol man oli laef long ol ples we i longwe we i longwe.”