Wan dei Eliso we i wan Witnes blong Jehova, i stap mekem wan Baebol stadi long haos blong wan woman we i intres, mo long taem ya wan man mo woman blong hem i kam visitim woman ya. Man ya i wan pasta. Eliso i bin harem se tufala i jes lusum wan boe nomo we tufala i gat, long ded.

 Taem Eliso i talem sore long tufala from we tufala i lusum boe blong tufala, tufala tugeta i krae we i krae. Nao pasta ya i toktok wetem kros se: “!Mi no kasemsave from wanem God i letem traem olsem i kasem mitufala! ?From wanem hem i tekemaot wan pikinini ya nomo we mi gat? !Mi mi mekem wok blong hem blong 28 yia, mi mekem plante gudfala samting, mo hemia nao pei we hem i givim long mi! ?From wanem God i kilim ded boe blong mi?”

 Eliso eksplenem long tufala se i no God we i kilim ded pikinini blong tufala. Mo tu, hem i tokbaot sam topik olsem, ransom, laef bakegen, mo risen from wanem God i letem ol nogud samting oli hapen. Pasta ya mo waef blong hem oli talem long Eliso se hem i jes givim ansa blong ol kwestin we tufala i stap prea from.

 Long nekis wik blong hem, pasta ya wetem woman blong hem i gobak long haos blong Baebol stadi ya blong joen wetem hem long stadi blong hem. Eliso mo woman ya i stadi long japta ya “Wan Trufala Hop Blong Ol Fren Mo Famle We Oli Ded,” we i stap long buk ya ?Wanem Samting We Baebol i Rili Tijim? Pasta ya mo waef blong hem i joen tu long ol storian.

 Biaen tufala i go long wan spesel asembli blong ol Witnes blong Jehova long Tbilisi, Georgia, mo tufala i sapraes tumas long lav mo fasin joengud blong ol brata mo sista, hemia sam fasin we oli traem blong mekem ol memba blong jos blong olgeta oli gat, be oli no save mekem.