Nogat. Ol Witnes blong Jehova oli bilif se God i mekem evri samting. Be mifala i no agri se hem i mekem evri samting long sikis dei stret. ?From wanem? From we tingting ya i no laenap wetem samting we Baebol i talem. Yumi traem tingbaot tufala samting ya:

1.   Longfala blong ol sikis dei ya. Sam man oli talem se ol sikis dei ya we God i mekem olgeta samting, oli ol trufala dei blong 24 aoa. Be long Baebol, tok ya “dei” i save minim wan taem we i longfala moa i bitim wan dei.​—Jenesis 2:4; Ol Sam 90:4.

2.   Hamas yia finis we wol ya i stap. Sam man oli tijim se wol ya i stap sam taosen yia nomo. Be folem Baebol, wol mo skae oli stap finis bifo we God i mekem olgeta samting long ol sikis dei ya. (Jenesis 1:1) From risen ya, ol Witnes blong Jehova oli agri wetem ol save blong ol saentis we oli soemaot se wol ya i stap plante bilian yia finis.

 Ol Witnes blong Jehova oli bilif se God i mekem olgeta samting. Be mifala i no sakemaot ol save we ol saentis oli faenemaot. Mifala i bilif se ol stret save we oli faenemaot, oli laenap wetem ol save blong Baebol.