Long 2011, ol Witnes blong Jehova oli givhan long bitim 5,700 man mo woman blong oli lanem blong rid mo raet.

Long ol 25 yia we i pas, mifala i givhan long bitim 9,000 man mo woman blong oli lanem blong rid mo raet.

Stat long 2002, klosap 12,000 man mo woman oli kam gud moa blong rid mo raet. Agnes, we i gat 82 yia, i talem se: “Taem oli talem se kongregesen bambae i mekem ol klas blong rid mo raet, mi mi glad blong putum nem blong mi blong joen long klas ya. !Long faswan lesen, mi lanem blong raetem nem blong mi!”

Wan woman we i gat 55 yia mo i joenem ol klas ya, i talem se: “Papa mo mama blong mi i no sanem mi long skul, taswe mi ting se bae mi neva lanem blong rid mo raet.”

Long ol 15 yia we i pas, bitim 19,000 man mo woman oli lanem blong rid. Wan long olgeta we nem blong hem Felizarda, i talem se: “Mi glad tumas se naoia mi save faenem mo ridim ol vas blong Baebol long ol narafala. Bifo, hemia i had long mi.”

Branj ofis i raetem leta se: “Bifo, plante we oli stap long bus oli no skul. Mo tu, i no gat plante gel we oli kasem edukesen. Taswe, ol klas blong lanem blong rid mo raet oli givhan long plante man mo woman. Afta we oli mekem kos ya, tingting blong olgeta i strong moa, mo oli trastem olgeta bakegen.”