Plante taosen Witnes blong Jehova we oli toktok lanwis Tagalog, we i lanwis blong ol man Filipin, oli kam wanples long taon blong Rom, long Itali, blong gat wan spesel asembli long 24 kasem 26 Julae 2015. Itali, i stap bitim 10,000 kilometa longwe long Filipin.

Wan ripot i soemaot se, i gat bitim 850,000 man mo woman Filipin we oli stap long Yurop. Taswe, i gat bitim 60 kongregesen mo ol smol grup blong ol Witnes blong Jehova long Yurop, we oli gat miting long lanwis Tagalog, mo oli prij long ol man Filipin.

Long asembli we i stap long Rom, olgeta kongregesen mo grup we oli toktok lanwis Tagalog, oli joen wanples. Hemia faswan taem we samting olsem i hapen. I gat 3,239 man we oli kam, mo oli glad we Brata Mark Sanderson, wan memba blong Hed Kampani blong ol Witnes blong Jehova, i givim ol laswan tok long ol trifala dei ya. Hem i bin mekem sam wok long Filipin bifo.

?Wanem i save kamaot taem wan man i harem tok blong asembli long prapa lanwis blong hem, no long seken lanwis we hem i toktok long hem? Eva, wan mama we hem wan i lukaot long tufala pikinini blong hem, i talem se: “Mi kasem save smol Inglis, be mi mi wantem talem tangkiu from we asembli ya i stap long lanwis Tagalog, mekem se ol tijing blong Baebol oli kasem hat blong mi.” Mama ya mo tufala pikinini blong hem oli stap long Spen, taswe oli plan blong no kakae long restoron evri wik, be oli mekem wan taem nomo long wan manis, olsem nao oli save sevem mane blong go long asembli ya long Itali. Hem i talem se: “Sakrefaes we mifala i mekem i no blong nating, from we mi kasem save evri samting long asembli ya.”

Jasmin we i stap long Jemani, i askem bos blong hem blong spel, blong hem i save go long asembli. Hem i talem se: “Bifo we mi aot, oli talem long mi se mi no save go from we i gat plante wok. Mi prea long Jehova mo mi go luk bos blong mi. Mitufala i mekemgud plan long wok ya, blong mi save kam long asembli. I naes tumas blong joen wetem ol brata mo sista blong Filipin, we oli stap long Yurop.”

Plante man Filipin long Yurop, oli misim kantri blong olgeta mo ol fren blong olgeta we oli stap long ol narafala kantri long Yurop. Asembli ya i givhan long plante fren blong oli mitim olgeta bakegen, be naoia oli no ol fren nomo, oli ol Kristin brata mo sista. (Matiu 12:48-​50) Fabrice i talem se: “!Mi glad tumas blong luk ol man we mi save olgeta!” Long en blong asembli ya, wan sista i talem plante taem se: “!Asembli ya i spesel from we i mekem famle i joen wanples bakegen!”