Aesea 39:1-8
-
Ol mesenja we oli aot long Babilon i kam (1-8)
39 Long taem ya king blong Babilon, Merodak-baladan we i boe blong Baladan, i sanem ol leta mo wan presen i go long Hesekia,+ from we hem i harem se hem i bin sik mo i kam gud bakegen finis.+
2 Hesekia i glad i welkamem olgeta,* mo i soemaot long olgeta, haos blong ol sas samting blong hem,+ hemia silva, gol, balsam oel mo ol narafala gudfala oel, mo olgeta tul blong faet blong hem, mo i soem evri samting we i stap long ol ples blong hem blong putumgud ol sas samting. Hesekia i soem long olgeta evri samting long prapa haos* blong hem, mo evri samting long olgeta ples we hem i rul long hem. I no gat wan samting nating i stap we hem i no soemaot long olgeta.
3 Afta long samting ya, profet ya Aesea i kam luk King Hesekia mo i askem hem se: “?Ol man ya oli talem wanem? ?Mo oli kam wea?” Nao Hesekia i talem se: “Oli kam long wan ples we i longwe, oli kam long Babilon.”+
4 Ale profet i gohed i askem se: “?Oli luk wanem long haos* blong yu?” Hesekia i ansa se: “Oli luk evri samting long haos* blong mi. Mi soem evri samting we i stap long ol ples blong mi blong putumgud ol sas samting. I no gat wan samting nating i stap we mi no soemaot long olgeta.”
5 Nao Aesea i talem long Hesekia se: “Yu harem tok blong Jehova komanda blong ol ami.
6 Jehova i talem se:+ ‘!Yu luk! I gat taem i stap kam we bambae evri samting insaed long haos* blong yu, wetem olgeta samting we ol bubu blong yu oli putumgud i stap kam kasem tede, bambae ol man oli karem i go long Babilon. Bambae i no gat wan samting nating i stap.+
7 Mo sam long ol stret pikinini boe blong yu, we bambae yu kam papa blong olgeta, bambae ol man oli karem olgeta i go mo bambae oli kam ol haeman insaed long pales blong king blong Babilon.’”+
8 Ale Hesekia i talem long Aesea se: “Tok ya blong Jehova we yu talem, i gud.” Mo i gohed se: “Hemia from we long olgeta yia* we bambae mi laef i stap, bambae i gat pis mo ol samting oli stap gud, oli no jenis.”*+
Ol futnot
^ PT: “glad tumas long olgeta.”
^ NT: “pales.”
^ NT: “pales.”
^ NT: “pales.”
^ NT: “pales.”
^ PT: “ol dei.”
^ NT: “mo ol man bambae oli mekem ol fasin we i tru.”
