Amos 5:1-27
5 “Yufala long haos blong Isrel, yufala i lesin long tok we mi stap talem agensem yufala, we i olsem wan singsing sore.*
2 ‘Gel we i no save man yet, hemia Isrel, i foldaon finis,Hem i no save girap bakegen.
Oli lego hem finis long prapa graon blong hem,I no gat wan man blong leftemap hem.’
3 “From hemia samting we Hae Masta Jehova i talem, i se:‘Taon we i sanemaot wan taosen soldia, bambae i gat wan handred nomo i stap,Mo taon we i sanemaot wan handred soldia, bambae i gat ten nomo i stap. Samting ya bambae i hapen long haos blong Isrel.’+
4 “From hemia samting we Jehova i talem long olgeta long haos blong Isrel se:‘Yufala i lukaotem mi nao yufala i save gohed blong laef.+
5 Yufala i no mas lukaotem Betel,+Yufala i no mas go long Gilgal,+ mo yufala i no mas wokbaot i go long Bereseba,+From Gilgal bambae i go wok slef long narafala kantri,+Mo Betel bambae i lus.*
6 Yufala i lukaotem Jehova nao yufala i save gohed blong laef,+Olsem nao, hem i no save laet bigwan olsem faea long haos blong Josef,I bonem Betel, we i no gat man i save kilim i ded.
7 Yufala i mekem jastis i kam plant ya womwud,*Mo yufala i slingim stret fasin i go long graon.+
8 Man we i mekem grup blong ol sta ya Kima* mo grup blong ol sta ya Kesil,*+Man we i mekem bigfala tudak i kam moning,Man we i mekem delaet i kam tudak olsem naet,+Man we i stap singaotem ol wota blong solwota oli kamBlong i kafsaedem olgeta antap long wol,+Nem blong hem Jehova.
9 Bambae hem i mekem se wan samting i distroem ol strong man,Mo i distroem ol strong ples blong haed.
10 Oli agensem olgeta we oli stap tok strong long ol man long get blong taon,Mo oli no laekem nating olgeta we oli stap tok tru.+
11 Bambae yufala i no gohed blong stap long ol haos ya we yufala i bildim olgeta long ol ston we yufala i katem+Mo yufala i no dring waen blong ol plantesen blong grep we yufala i planem,+From we yufala i mekem puaman i stap pem rent* blong graon we hem i stap wok long hemMo yufala i stap tekemaot ol wit mo bale blong hem olsem takis.+
12 From mi mi save we yufala i rebel* plante taem,Mo mi save se ol sin blong yufala i bigwan we i bigwan,Yufala i stap spolem ol stret man,Yufala i stap tekem dotimane,*Mo yufala i stap blokem raet we ol puaman long get blong taon oli sud kasem.+
13 Taswe, olgeta we oli gat hed, bambae oli stap kwaet nomo long taem ya,From we bambae hem i wan taem blong trabol.+
14 Yufala i lukaotem samting we i gud, be i no samting we i nogud,+Blong yufala i save gohed blong laef.+
Nao Jehova, God ya we i komanda blong ol ami, i save stap wetem yufala,Olsem we yufala i stap talem.+
15 Yufala i no mas laekem nating samting we i nogud, be yufala i mas laekem samting we i gud,+I gud i gat jastis long get blong taon.+
Olsem nao, maet Jehova, God ya we i komanda blong ol ami,Bambae i kaen long ol laen blong Josef we oli stap yet.’+
16 “Taswe hemia samting we Jehova, God ya we i komanda blong ol ami, yes Jehova i talem se:‘Long olgeta pablik ples, ol man bambae oli stap krae bigwan,Mo long evri rod, bambae oli stap talem se: “!O sore tumas!”Bambae oli singaot i go long ol fama blong oli kraeMo ol nambawan man blong krae long taem blong ded, bambae oli krae bigwan.’
17 ‘Long evri plantesen blong grep, bambae ol man oli stap krae bigwan,+From bambae mi pas long medel blong yufala,’ hemia nao tok blong Jehova.
18 ‘!Sore tumas long olgeta we oli wantem tumas blong luk dei blong Jehova!+?Yufala i tingbaot dei blong Jehova se i olsem wanem?+Dei ya bambae i tudak, mo i no gat laet.+
19 Bambae hem i olsem wan man we i ronwe long wan laeon, be i mitim wan bea,Mo taem hem i go insaed long haos blong hem mo i putum han blong hem long wol blong haos, wan snek i kakae hem.
20 ?Yufala i no save se dei blong Jehova bambae i tudak, mo i no gat laet,Mo bambae hem i dak nomo, mo i no klia nating?
21 Mi mi no laekem nating, yes mi agensem ol lafet blong yufala,+Mo mi no glad nating long gudfala smel blong ol impoten asembli blong yufala.
22 Nating sipos yufala i givim ol ofring we oli bon fulwan mo ol ofring we oli givim olsem presen,Bambae mi no glad long olgeta,+Mo bambae mi no glad blong luk ol fatfat animol we yufala i givim olsem sakrefaes blong pis.+
23 Mi no moa wantem harem noes blong ol singsing blong yufala,Mo i gud yufala i no moa letem mi mi harem ol gudfala miusik blong ol instramen blong yufala we i gat string.+
24 I gud jastis i ron olsem wota,+Mo stret fasin i olsem springwota we i ron olwe nomo.
25 O haos blong Isrel, ?long ol 40 yia we yufala i stap long draeples,Yufala i bin karem ol sakrefaes mo ol ofring we oli givim olsem presen i kam long mi?+
26 Naoia bambae yu mas karemaot Sakut we i king blong yufala mo Kaewan,*Hemia ol pija blong yufala, sta blong god blong yufala, we yufala nomo i mekem,
27 Mo bambae mi sanem yu i go wok slef long wan kantri we i stap longwe olgeta long Damaskes,’+ hemia nao tok blong man ya we nem blong hem Jehova, God we i komanda blong ol ami.”+
Ol futnot
^ MNT: “i kam wan samting we i narakaen.”
^ NT: “i kam samting blong harem nogud.”
^ Maet hemia i minim grup blong ol sta we nem blong hem Oraeon.
^ Maet hemia i minim grup blong ol sta we nem blong hem pleades, we oli stap long wan narafala grup blong ol sta we nem blong hem Tauras.
^ NT: “pem takis blong graon.”
^ NT: “tekem mane long fasin haed.”
^ NT: “brekem loa.”
^ Maet tufala god ya i stap minim planet ya Saten, we oli stap wosipim olsem wan god.
