Esikel 38:1-23
38 Nao tok blong Jehova i kamtru bakegen long mi, i se:
2 “Pikinini blong man, yu tanem fes blong yu i go long Gog blong kantri blong Magog,+ hemia hed jif* blong Mesek mo Tubal,+ mo yu talemaot profet tok agensem hem.+
3 Yu talem se: ‘Hemia samting we Hae Masta Jehova i talem: “O Gog, hed jif* blong Mesek mo Tubal, naoia mi mi agensem yu.
4 Bambae mi mi mekem yu yu tanraon mo mi putum ol huk long ol jo blong yu,+ mo mi mekem yu kamaot wetem olgeta ami blong yu,+ ol hos mo ol man blong ron long hos. Olgeta evriwan oli werem ol flas klos, olgeta oli wan bigfala asembli we oli karem ol bigfala sil mo ol smol sil,* mo olgeta evriwan oli holem ol naef blong faet.
5 Pesia, Itiopia, mo Put+ oli stap wetem olgeta, mo olgeta evriwan oli gat ol smol sil mo ol hat blong faet.
6 Mo i gat Goma wetem ol soldia blong hem, mo haos blong Togama+ we i stap longwe we longwe long not, wetem ol soldia blong hem. Yes, plante man oli stap wetem yu.+
7 “‘“Yufala i mas rere, yufala i mas rerem yufala, yu wetem olgeta ami blong yu we oli joen wetem yu, mo yu bambae yu komanda* blong olgeta.
8 “‘“Afta we plante dei i pas, bambae mi jekem* yu. Long ol laswan haf blong ol yia, bambae yu yu go faet agensem kantri ya we ol man blong hem oli bin kasem kil from naef blong faet mo oli kam gud bakegen. Olgeta ya oli aot long medel blong ol man mo oli kam wanples long ol bigfala hil blong Isrel, hemia ples ya we i bin stap nating nomo. Ol man long kantri ya oli bin stap long medel blong ol narafala man, be oli kambak bakegen, mo olgeta evriwan oli stap gud oli sef.+
9 Be yu wetem olgeta soldia blong yu mo bigfala hip blong ol man we oli stap wetem yu, bambae yufala i kam agensem olgeta olsem wan hariken, mo bambae yufala i kavremap kantri ya olsem ol klaod.”’
10 “Hemia samting we Hae Masta Jehova i talem: ‘Long dei ya ol tingting bambae oli kam insaed long hat blong yu, nao bambae yu mekem wan plan we i nogud we i nogud.
11 Bambae yu yu talem se: “Mi bambae mi go insaed long kantri we i no gat stonwol long ol vilej blong hem.*+ Bambae mi kam agensem ol man we oli stap sefgud, olgeta we i no gat wan samting i hambag long olgeta. Olgeta evriwan ya oli stap long ol vilej we i no gat ol stonwol i goraon long olgeta, i no gat ol get mo ol bigfala timba blong blokemgud.”
12 Mak blong yu i blong tekem plante samting we yu holemtaet, mo blong atakem ol ples we bifo oli bin stap nating nomo be naoia i gat man long olgeta,+ mo atakem ol man we oli aot long medel blong ol nesen mo oli kam wanples,+ hemia olgeta we oli stap hivimap ol sas samting mo olting,+ olgeta we oli stap long medel blong wol.
13 “‘Seba+ mo Dedan,+ ol bisnesman blong Tasis+ wetem olgeta man blong faet blong hem,* bambae oli talem long yu se: “?Yu yu kam insaed long kantri ya blong tekem plante samting we yu holemtaet? ?Olsem wanem? ?Yu yu hivimap finis ol ami blong yu blong oli karemaot ol silva, gol, ol sas samting, mo olting, mo blong oli holemtaet plante plante samting?”’
14 “From samting ya, pikinini blong man, yu talemaot profet tok mo yu talem long Gog se: ‘Hemia samting we Hae Masta Jehova i talem: “Long dei ya we ol man blong mi, ol man Isrel, oli stap sefgud, bambae yu yu save, ?i tru?+
15 Bambae yu aot long ples blong yu we i stap longwe we longwe long not,+ yu wetem plante man we oli stap wetem yu, we olgeta evriwan oli ron long ol hos, mo oli wan bigfala asembli, wan bigfala kampani blong ol ami.+
16 O Gog, bambae yu yu kam agensem ol man blong mi, ol man Isrel, olsem ol klaod we oli kavremap wan kantri. Long lashaf blong ol dei, bambae mi mekem yu yu agensem kantri blong mi,+ nao ol nesen bambae oli save mi taem mi yusum yu blong mekem mi mi kam tabu long fored blong olgeta.”’+
17 “Hemia samting we Hae Masta Jehova i talem: ‘?I no yu nao sem man ya we mi bin tokbaot hem bifo? Mi bin yusum ol man blong wok blong mi, hemia ol profet blong Isrel, blong oli talemaot profet tok ya blong plante yia se bambae oli tekem yu yu kam blong agensem olgeta.’
18 “Nao Hae Masta Jehova i talem se: ‘Long dei ya, hemia dei we Gog i go insaed long kantri blong Isrel, bigfala kros blong mi bambae i girap kwiktaem nomo.+
19 Nao long strong tingting blong mi mo long kros blong mi we i olsem faea, bambae mi mi toktok. Mo long dei ya, bambae i gat wan bigfala etkwek long kantri ya Isrel.
20 From mi, ol fis long solwota, ol pijin long skae, ol wael animol long bus, olgeta animol olsem lised mo snek we oli stap krol long graon, mo olgeta man long wol bambae oli seksek, mo ol bigfala hil bambae oli kafsaed,+ mo ol klif bambae oli folfoldaon, mo olgeta stonwol bambae oli brobrok i go long graon.’
21 “Hemia samting we Hae Masta Jehova i talem: ‘Mi bambae mi singaot wan naef blong faet i kam agensem Gog long olgeta bigfala hil blong mi. Nao naef blong faet blong evri man bambae i agensem stret brata blong hem bakegen.+
22 Mo bambae mi yusum ol strong sik+ mo mi mekem blad i ron, blong mekem jajmen blong mi i kam agensem hem, mo bambae mi mekem wan bigfala ren i kam, mo ol ston blong aes,+ mo faea,+ mo salfa,+ bambae i kasem hem wetem ol soldia blong hem mo plante man we oli stap wetem hem.+
23 Nao bambae mi leftemap mi i go antap long fored blong plante nesen, mi mekem mi mi kam tabu, mo mi mekem olgeta oli save mi. Nao bambae olgeta oli mas save se mi mi Jehova.’
Ol futnot
^ NT: “jif prins.”
^ NT: “jif prins.”
^ Smol sil ya, plante taem ol man blong sut long bonara oli stap karem.
^ PT: “gad.”
^ NT: “singaot.”
^ NT: “we i open nomo.”
^ NT: “ol man laeon we oli yang mo oli gat plante hea long nek blong olgeta.”
