Hagae 1:1-15
1 Long seken yia blong King Darias, long faswan dei blong namba 6 manis, tok blong Jehova i kamtru long profet ya Hagae,*+ blong hem i go talemaot long Serubabel+ boe blong Sealtiel, we i hed gavman blong Juda, mo long Josua boe blong Jehosadak we i hae pris, i se:
2 “Hemia samting we Jehova komanda blong ol ami i talem: ‘Ol man ya oli talem se: “Taem blong wokem* haos* blong Jehova i no kam yet.”’”+
3 Mo tok blong Jehova i kamtru bakegen long profet ya Hagae,+ se:
4 “?Yufala i ting se i taem blong yufala i stap laef long ol naesfala haos blong yufala, be haos blong mi i stap we i nogud yet?+
5 Nao hemia samting we Jehova komanda blong ol ami i talem, i se: ‘Yufala i putum hat blong yufala* long ol fasin blong yufala.
6 Yufala i saksakem plante sid, be yufala i havestem smol nomo.+ Yufala i kakae, be yufala i harem se i no naf. Yufala i dring, be yufala i harem se i no naf. Yufala i werem klos, be i no gat man i harem se i wom. Man we i go wok blong kasem mane hem i putum pei blong hem long wan bag we i gat fulap hol.’”
7 “Hemia samting we Jehova komanda blong ol ami, i talem, i se: ‘Yufala i putum hat blong yufala* long ol fasin blong yufala.’
8 “Jehova i talem se: ‘Yufala i go antap long bigfala hil mo yufala i karem ol wud i kam.+ Mo yufala i wokem haos blong mi,+ blong mi save glad long hem mo ol man oli save leftemap mi.’”+
9 “Jehova komanda blong ol ami i talem se: ‘Yufala i stap wet blong kasem plante samting, be yufala i kasem smol nomo. Mo taem yufala i karem i go insaed long haos, mi mi bloem i gowe.+ ?From wanem risen? From we haos blong mi i nogud i stap, be yufala wanwan i stap bisi blong lukaot gud long prapa haos blong yufala.+
10 Taswe, heven we i stap antap long yu i no letem wota blong naet i kamdaon, mo graon i no mekem kakae i gru.
11 Mo mi stap gohed blong singaot draetaem i kam long graon, long ol bigfala hil, long ol sid, long niu waen, long oel, long ol samting we oli gru long graon, long ol man mo ol animol, mo long olgeta wok blong han blong yufala.’”
12 Serubabel+ boe blong Sealtiel+ mo Josua boe blong Jehosadak+ we i hae pris, mo olgeta narafala man oli lesin long voes blong Jehova we i God blong olgeta mo long ol toktok blong profet ya Hagae, from we Jehova we i God blong olgeta i sanem hem. Nao ol man oli stat blong fraet from ol tok blong Jehova.
13 Biaen Hagae, we i mesenja blong Jehova, i talem mesej ya long ol man, folem tok we Jehova i givim long hem, i se: “‘Mi mi stap wetem yufala ol man,’+ hemia nao tok blong Jehova.”
14 Ale Jehova i pulum tingting*+ blong Serubabel boe blong Sealtiel we i hed gavman blong Juda,+ mo tingting blong Josua+ boe blong Jehosadak we i hae pris, mo tingting blong olgeta narafala man. Nao oli kam mo oli stat blong wok long haos blong Jehova komanda blong ol ami, we i God blong olgeta.+
15 Hemia long namba 24 dei blong namba 6 manis blong seken yia blong King Darias.+
Ol futnot
^ Hemia i minim “Bon Long Taem Blong Lafet.”
^ NT: “wokem bakegen.”
^ NT: “tempol.”
^ NT: “Yufala i tingting gud.”
^ PT: “Yufala i tingting gud.”
^ PT: “pulum spirit.”
