Leta i go long man Hibru 8:1-13
8 Nao bigfala poen blong ol tok ya blong mifala i olsem: Yumi gat wan hae pris olsem,+ mo hem i stap long heven, i stap sidaon long raetsaed blong tron* blong Man Ya We i Hae Olgeta,+
2 hem i mekem minista wok* long holi ples+ mo long tent ya we i tru, we Jehova* nomo i stanemap, i no man.
3 Nao ol hae pris ya, God i putumap olgeta blong oli stap givim presen long hem, mo blong oli stap bonem sakrefaes. Mo long sem fasin, hae pris ya tu i mas gat samting blong givim i go long God.+
4 Sipos hem i stap long wol, bambae hem i no save kam wan pris,+ from we i gat ol man finis we oli stap givim ol presen olsem we Loa i talem.
5 Tabu wok ya we ol man ya oli stap mekem, hem i olsem wan sado nomo+ mo wan pija we i soemaot ol samting we oli stap long heven.+ Hemia i tru from we taem God i talem long Moses blong i stanemap tent, hem i talem se: “Yu mas meksua se yufala i wokem olgeta samting ya, stret olsem plan ya we mi soemaot long yu, long bigfala hil.”+
6 Be naoia Jisas i kasem wan nambawan minista wok* i bitim wok blong ol pris bifo, from we hem i medel man* tu+ long wan kontrak we i sem mak long narawan, be hem i gud moa,+ from we promes blong kontrak ya i folem loa mo i gud moa i bitim ol promes ya bifo.+
7 Sipos faswan kontrak ya i gud nomo, bambae i no nidim wan narafala kontrak.+
8 Be hem i luk we ol man oli mekem plante samting we i no stret, from we “Jehova* i talem se: ‘!Yu luk! I gat ol dei i stap kam we mi bambae mi mekem wan niufala kontrak wetem haos blong Isrel mo wetem haos blong Juda.
9 Bambae i no olsem kontrak ya we mi mekem wetem ol olfala blong olgeta long dei ya we mi bin holem han blong olgeta, mi lidim olgeta oli aot long kantri ya Ijip,+ from we olgeta oli no holemtaet kontrak blong mi. From samting ya, mi mi no moa tingbaot olgeta,’ hemia nao tok blong Jehova.*
10 “Jehova* i talem se: ‘Afta long ol dei ya, kontrak we bambae mi mekem wetem haos blong Isrel i olsem: Bambae mi putum ol loa blong mi long tingting blong olgeta, mo bambae mi raetem long hat blong olgeta.+ Mo mi bambae mi kam God blong olgeta, mo olgeta bambae oli kam ol man blong mi.+
11 “‘Mo bambae i no gat wan long olgeta we i save go tijim neba blong hem mo brata blong hem se: “!Yufala i mas save Jehova!”* From we bambae olgeta evriwan oli save mi, stat long olgeta we oli no gat nem i go kasem ol haeman.
12 From bambae mi fogivim olgeta from ol samting nogud we oli mekem, mo mi bambae mi no moa tingbaot sin blong olgeta.’”+
13 Nao taem hem i talem tok ya “wan niufala kontrak,” hem i mekem faswan kontrak ya i kam olfala.+ Mo samting we i olfala mo i stap kam nogud, klosap i lus.+
Ol futnot
^ NT: “jea blong king.”
^ NT: “hem i mekem wok blong givhan long ol man.”
^ NT: “wan nambawan wok blong givhan long ol narafala we.”
