Jajes 14:1-20
14 Nao Samson i godaon long Timnaha, mo hem i luk wan woman Filistia long Timnaha.
2 Ale hem i gobak, i talem long papa mo mama blong hem se: “Mi go long Timnaha, mi luk wan woman Filistia we i naes tumas, mo mi wantem se yutufala i go tekem hem i kam, blong i kam waef blong mi.”
3 Be papa mo mama blong hem i talem se: ?Yu no save faenem wan woman long famle blong yu mo long olgeta man ples blong yumi? Ol man Filistia oli no sakomsaes, ?taswe from wanem yu wantem tekem wan woman ples ya? Be Samson i talem long papa blong hem se: “Yu go tekem woman ya, blong i kam waef blong mi, from we mi luk se hem nao i stret long mi.”
4 Papa mo mama blong hem i no kasem save se hemia tingting blong Jehova, from we Hem i stap lukaot rod blong agensem ol man Filistia, from we long taem ya ol man Filistia oli stap rul long ol man Isrel.
5 Ale Samson i folem papa mo mama blong hem, oli godaon long Timnaha. Taem hem i kasem ol plantesen blong grep blong ol man Timnaha, hem i sek long wan laeon* we i singaot bigwan i kam from hem.
6 Nao spirit blong Jehova i mekem hem i strong, ale hem i holem laeon ya i terem long tu haf, olsem we man i terem wan yang nani wetem han blong hem. Be hem i no talemaot samting ya long papa mo mama blong hem.
7 Biaen hem i godaon, i go toktok long woman ya, mo hem i luk se woman ya i stret yet long hem.
8 Smoltaem biaen, Samson i gobak blong tekem woman ya i kam long haos blong hem. Taem hem i stap go, hem i tanem hem i go long ples we ded bodi blong laeon ya i stap long hem, nao hem i luk we i gat fulap bi mo hani long dedbodi blong laeon ya.
9 Nao hem i karemaot ol hani ya i go long han blong hem, ale hem i stap kakae folem rod i go. Taem hem i go kasem papa mo mama blong hem, hem i givim sam long tufala blong tufala i kakae. Be hem i no talem long tufala se hem i karemaot hani ya long dedbodi blong wan laeon.
10 Nao papa blong hem i godaon blong luk woman ya, mo Samson i mekem wan bigfala lafet long ples ya, from we hemia wan samting we ol yang man oli stap mekem oltaem.
11 Taem ol man oli luk hem, oli go tekem 30 yang man* oli kam stap wetem hem.
12 Nao Samson i talem long olgeta se: “Plis, mi wantem talem wan ridel long yufala. Sipos yufala i faenem ansa blong hem, mo yufala i talem long mi bifo we ol seven dei blong lafet ya i finis, bambae mi mas givim 30 kaliko we oli wokem long linen, mo 30 narafala klos long yufala.
13 Be sipos yufala i no save ansa blong hem, yufala i mas givim 30 kaliko we oli wokem long linen mo 30 narafala klos long mi.” Ale oli talem se: “Yu talem ridel ya long mifala, mifala i wantem harem.”
14 Nao hem i talem long olgeta se:
“Wan samting i save kakae, be gudfala kakae i kamaot long hem,Hem i strong we i strong, be samting we i swit i kamaot long hem.”
Be tri dei i pas, olgeta oli no save talemaot mining blong ridel ya.
15 Long namba 4 dei, oli talem long waef blong Samson se: “Yu go trikim hasban blong yu, blong hem i talemaot ansa blong ridel ya long mifala. Sipos no, bambae mifala i bonem yu wetem olgeta we oli stap long haos blong papa blong yu. ?Olsem wanem? ?Yutufala i invaetem mifala i kam long ples ya blong tekemaot olting blong mifala?”
16 Ale waef blong Samson i go krae long hem, mo i talem se: “Yu yu no laekem mi nating, mo yu no lavem mi. Yu talem wan ridel long ol man ples blong mi, be yu no talem ansa blong hem long mi.” Be Samson i talem long hem se: “Mi mi no talemaot samting ya long papa mo mama blong mi, taswe, ?from wanem mi mas talem long yu?
17 Be hem i stap krae long hem gogo kasem namba 7 dei blong lafet ya. Nao long namba 7 dei, Samson i talemaot long hem, from we hem i fosem hem tumas. Ale hem i go talem ansa blong ridel ya long ol man ples blong hem.
18 Nao, bifo we san i draon* long namba 7 dei, ol man blong taon ya oli talem long Samson se:
“?Wanem i swit moa i bitim hani??Mo wanem i strong moa i bitim laeon?”
Nao Samson i ansa long olgeta se:
“Sipos yufala i no bin yusum yang kao blong mi blong pulum plao blong yufala,Bambae yufala i no save kasem mining blong ridel ya.”
19 Nao spirit blong Jehova i mekem hem i strong, ale hem i godaon long Askelon, i kilim 30 man mo i karem klos blong olgeta, mo i kam givim long ol man ya we oli talem ansa blong ridel ya long hem. Hem i kros we i kros taem hem i gobak long haos blong papa blong hem.
20 Nao oli givim waef blong Samson i go long wan long ol man ya* we i bin stap wetem Samson, nao i mared long hem.
Ol futnot
^ NT: “wan man laeon we i yang mo i gat plante hea long nek blong hem.”
^ PT: “30 man we oli folem man we i mared.”
^ MNT: “bifo we hem i go insaed long rum we i insaed olgeta.”
^ PT: “man ya we i folem man we i mared.”
