Jenesis 1:1-31
1 Long stat God i mekem heven mo wol.+
2 Long taem ya, wol ya i narafala olgeta, mo i no gat wan samting nating i stap long hem.* Long evri ples i gat wota we i dip mo ples i tudak nomo,+ mo paoa blong God we i stap wok,*+ i stap muv olbaot antap long wota ya.+
3 Nao God i talem se: “I gud i gat delaet.” Nao delaet i kamaot.+
4 Biaen hem i luk se delaet i gud, nao hem i mekem se delaet mo tudak i seraot.
5 Nao God i singaot delaet se Dei, mo tudak se Naet.+ Nao sapa i pas mo moning i pas, hemia faswan dei.
6 Biaen God i talem se: “I gud wota ya i seraot long tu haf mo i gat wan spes+ bitwin long tufala wota ya.”+
7 Nao God i mekem spes ya i kamaot nao i seraotem wota ya long tu haf. Wan haf blong wota ya i stap aninit long spes ya, mo narafala haf i stap antap long spes ya.+ Nao ol samting ya oli kamtru olsem we hem i talem.
8 Nao God i singaot spes ya se Heven.* Nao sapa i pas mo moning i pas, hemia seken dei.
9 Biaen God i talem se: “I gud ol wota aninit long heven oli kam wanples, blong ples we i drae i kamaot.”+ Nao ol samting ya oli kamtru olsem we hem i talem.
10 God i singaot ples ya we i drae se Graon,+ mo ol wota we oli kam wanples se Solwota.+ Mo hem i luk se i gud.+
11 Biaen hem i talem se: “I gud gras i gru long graon ya, wetem ol defdefren kaen plant we oli save givim sid mo ol defdefren kaen tri we oli save givim frut. Mo i gud ol tri ya oli karem frut mo ol plant ya oli karem sid.” Nao ol samting ya oli kamtru olsem we hem i talem.
12 Nao gras wetem ol defdefren kaen plant we oli gat sid+ mo ol defdefren kaen tri, oli stat blong gru long graon ya, nao oli karem ol frut mo ol sid. Nao God i luk se i gud.
13 Nao sapa i pas mo moning i pas, hemia namba 3 dei.
14 Biaen God i talem se: “I gud ol laet+ oli kamaot long spes long heven blong seraotem delaet mo tudak,+ mo bambae oli olsem ol saen blong makem ol dei, ol yia, mo ol defdefren taem long yia.+
15 Bambae oli stap olsem ol laet long spes long heven, mo oli saen i kamdaon long wol.” Nao ol samting ya oli kamtru olsem we hem i talem.
16 Nao God i gohed, i mekem tu laet, wan i bigwan mo i rul long dei+ mo narawan i smol mo i rul long naet. Mo hem i mekem ol sta tu.+
17 Nao God i putum olgeta long spes long heven blong oli saen i kamdaon long wol,
18 mo blong oli rul long dei mo long naet, mo blong oli seraotem delaet long tudak.+ Nao God i luk se i gud.
19 Nao sapa i pas mo moning i pas, hemia namba 4 dei.
20 Biaen God i talem se: “I gud ol laef samting* oli laef insaed long wota, mo i gud ol laef samting oli flae olbaot long heven.”*+
21 Nao God i mekem ol bigbigfala animol blong solwota mo plante defdefren kaen animol* we oli save muv olbaot long wota ya. Mo hem i mekem ol defdefren kaen laef samting we oli stap flae. Nao hem i luk se i gud.
22 Ale God i blesem olgeta mo i talem se: “Yufala i mas gat ol pikinini mo yufala i kam plante, mo yufala i fulumap solwota,+ mo i gud ol laef samting we oli stap flae oli kam plante olbaot long wol.”
23 Nao sapa i pas mo moning i pas, hemia namba 5 dei.
24 Biaen God i talem se: “I gud i gat ol defdefren kaen laef samting* long wol ya, ol animol we oli save laef wetem ol man, mo ol animol olsem snek mo lised,* mo ol wael animol.”+ Mo ol samting ya oli kamtru olsem we hem i talem.
25 Nao God i mekem ol defdefren kaen wael animol blong graon, mo ol defdefren kaen animol we oli save laef wetem ol man, mo ol defdefren kaen animol olsem snek mo lised. Mo hem i luk se i gud.
26 Biaen God i talem se: “I gud yumi+ mekem man long pija blong yumi,+ blong i olsem yumi.+ Mo i gud olgeta oli bos long ol fis long solwota, mo long ol pijin we oli stap flae long heven, mo long ol animol we oli save laef wetem ol man, mo long evri animol we oli olsem snek mo lised we oli stap muv olbaot long wol ya, mo i gud oli lukaot long olgeta samting long wol.”+
27 Ale God i gohed, i mekem man long pija blong hem. God i mekem man ya long pija blong hem. Hem i mekem wan man mo wan woman.+
28 Biaen God i blesem olgeta, mo i talem se: “Yufala i mas gat ol pikinini mo yufala i kam plante mo fulumap wol,+ mo mekem ol samting long wol ya oli stap aninit long han blong yufala,+ mo bos+ long ol fis long solwota, ol pijin we oli stap flae long heven, mo evri laef samting we oli stap muv long wol ya.”
29 Nao God i talem se: “Mi mi givim long yufala, evri plant we oli gat sid mo evri tri we oli stap karem frut we oli stap olbaot long wol ya. Mi mi givim ol samting ya blong yufala i kakae.+
30 Be ol samting we oli grin olsem ol gras mo ol lif, mi mi givim long evri wael animol blong oli kakae, mo long evri pijin we oli stap flae long heven, mo long evri animol* we oli laef mo oli stap muv olbaot long wol ya.”+ Mo ol samting ya oli kamtru olsem we hem i talem.
31 Mo taem God i luk olgeta samting we hem i mekem, hem i luk se oli gud tumas.+ Nao sapa i pas mo moning i pas, hemia namba 6 dei.
Ol futnot
^ NT: “i emti.”
^ NT: “spirit blong God.”
^ NT: “Skae.”
^ NT: “sol.”
^ PT: “flae antap long graon long spes long heven.”
^ NT: “sol we i laef.”
^ NT: “sol.”
^ NT: “ol animol we oli krol.”
^ NT: “sol.”
