Jenesis 34:1-31
34 Nao Daena we i gel blong Jekob mo Lea,+ i stap go spenem taem wetem* ol yang woman blong ples ya.+
2 I gat wan boe long ples ya we nem blong hem Sekem, hem i boe blong Hamoro we i wan man Hivi+ mo hem i wan jif long ples ya. Taem Sekem i luk Daena, hem i tekem hem mo i slip wetem hem, nao i repem hem.
3 Mo oltaem hem* i stap tingbaot Daena we i gel blong Jekob, mo hem i laekem hem tumas, mo i stap toktok gud long hem blong mekem hem i laekem hem.*
4 Nao Sekem i talem long papa blong hem Hamoro+ se: “Yu go askem blong yangfala woman ya i kam waef blong mi.”
5 Taem Jekob i harem nius se Sekem i mekem gel blong hem Daena i kam doti, hem i no talem wan samting from we long taem ya, ol boe blong hem oli stap yet wetem ol animol blong hem long open ples.
6 Biaen Hamoro we i papa blong Sekem, i go luk Jekob blong toktok wetem hem.
7 Be ol boe blong Jekob oli harem nius blong samting we Sekem i mekem, nao kwiktaem nomo oli aot long open ples mo oli kambak long haos. Oli harem nogud mo oli kros tumas from we Sekem i mekem wan samting we i no stret nating,+ hem i pulum sem i kam long Isrel taem hem i slip wetem gel blong Jekob.+
8 Nao Hamoro i toktok wetem olgeta, i se: “Boe blong mi Sekem i wantem gel blong yufala tumas. Plis yufala i givim gel ya blong i kam waef blong hem,
9 nao bambae yumi kam famle tru long mared ya.* Yufala i givim ol gel blong yufala long mifala, mo yufala i save tekem ol gel blong mifala.+
10 Yufala i save stap wetem mifala, mo yufala i save stap long eni ples long graon ya. Yufala i save stap mo mekem bisnes long ples ya, mo yufala i save holem ol graon ya i blong yufala.”
11 Biaen Sekem i talem long papa blong Daena mo long ol brata blong hem se: “Mi wantem se yufala i glad long mi, mo bambae mi givim eni samting we yufala i askem.
12 Yufala i save leftemap praes blong woman ya i go antap mo yufala i save askem plante presen long mi.+ Mi mi rere blong givim eni samting we yufala i talem. Mi mi wantem nomo se yufala i givim yang woman ya blong i kam waef blong mi.”
13 Nao ol boe blong Jekob oli trikim Sekem mo papa blong hem Hamoro, from we Sekem i bin mekem sista blong olgeta Daena i kam doti.
14 Oli talem long tufala se: “Mifala i no save mekem samting ya, mifala i no save givim sista blong mifala long wan man we i no sakomsaes,+ from we hemia bambae i mekem bigfala sem long mifala.
15 I gat wan samting nomo we i save mekem se mifala i agri: Hemia sipos yufala i kam sem mak long mifala, mo yufala i mekem olgeta man blong yufala oli sakomsaes.+
16 Nao bambae mifala i givim ol gel blong mifala long yufala, mo bambae mifala i tekem ol gel blong yufala, mo bambae mifala i stap wetem yufala mo yumi kam wan nomo.
17 Be sipos yufala i no lesin long mifala mo yufala i no sakomsaes, bambae mifala i tekem gel blong mifala mo mifala i aot.”
18 Nao Hamoro mo boe blong hem Sekem,+ tufala i luk se ol tok ya oli gud.+
19 Yang man ya i kwik blong mekem samting we oli talem,+ from we hem i laekem gel blong Jekob tumas, mo from we hem i wan man we ol man oli respektem hem moa i bitim ol narafala man long haos blong papa blong hem.
20 Nao Hamoro mo boe blong hem Sekem, tufala i go long get blong taon blong tufala, blong toktok wetem ol man long taon ya,+ se:
21 “Ol man ya oli wantem gat pis wetem yumi. I gud yumi letem olgeta oli stap mo oli mekem bisnes long ples ya, from we graon ya i bigwan inaf long yumi evriwan. Yumi save tekem ol gel blong olgeta blong oli kam waef blong yumi, mo yumi save givim ol gel blong yumi long olgeta.+
22 I gat wan samting nomo we i save mekem se olgeta oli agri blong stap wetem yumi, blong yumi kam wan nomo: Hemia se yumi evriwan we i man, yumi mas sakomsaes olsem we olgeta oli sakomsaes.+
23 Nao bambae olting blong olgeta, ol sas samting blong olgeta, mo evri animol blong olgeta, bambae oli blong yumi. Taswe i gud yumi agri long samting we oli talem, olsem nao oli save stap wetem yumi.”
24 Nao evriwan we oli stap long get blong bigfala taon ya, oli lesin long Hamoro mo boe blong hem Sekem. Nao evri man we oli stap long taon ya oli sakomsaes.
25 Be long namba 3 dei, taem ol man oli harem bodi blong olgeta i soa yet, Simeon mo Livae we tufala i boe blong Jekob mo tufala i brata blong Daena,+ tufala i tekem naef blong faet blong tufala, mo tufala i go insaed long taon ya we tufala i stap wokbaot gud nomo. Nao tufala i kilim i ded olgeta man long taon ya.+
26 Tufala i kilim i ded Hamoro mo boe blong hem Sekem long naef blong faet, mo tufala i tekemaot Daena long haos blong Sekem nao oli aot.
27 Ol narafala boe blong Jekob oli kamtru long ol man ya we oli ded i stap, mo oli tekemaot olgeta samting long taon ya from we Sekem i mekem sista blong olgeta i kam doti.+
28 Oli tekem ol sipsip, ol nani, ol buluk, mo ol dongki blong olgeta, wetem evri samting we oli luk long open ples mo long taon ya.
29 Mo tu oli tekem evri samting blong olgeta, mo oli holemtaet evri pikinini mo waef blong olgeta, mo oli tekem evri samting we i stap long ol haos blong olgeta.
30 Nao Jekob i talem long Simeon mo Livae+ se: “Yutufala i mekem bigfala trabol i kam long mi,* naoia ol man Kenan mo ol man Perij oli luk mi olsem wan samting we i sting. Yumi ya, yumi smol nomo, mo bambae olgeta oli joen tugeta blong faet agensem mi mo bambae oli finisim gud mi mo evriwan long haos blong mi.”
31 Be tufala i talem se: “?Olsem wanem? ?Bambae ol man oli mekem sista blong mifala i kam olsem wan prostitut?”
Ol futnot
^ NT: “go luk.”
^ NT: “sol blong hem.”
^ PT: “blong pulum hat blong yang woman ya.”
^ PT: “yumi mekem agrimen blong mared.”
^ NT: “mekem ol man oli no moa wantem joen wetem mi.”
