Jeremaea 20:1-18
20 Nao Pasuru boe blong Hime, we i pris, mo i nambawan haeman long haos blong Jehova, i stap lesin taem Jeremaea i stap talemaot ol profet tok ya.
2 Ale Pasuru i wipim Jeremaea we i profet mo i lokem hem long ol stok*+ ya long Get Blong Benjamin Antap, we i stap long haos blong Jehova.
3 Be long nekis dei taem Pasuru i tekemaot Jeremaea long ol stok ya, Jeremaea i talem long hem se:
“Jehova i givim wan defren nem long yu, i no Pasuru, be Fraet Long Olgeta Ples.+
4 From hemia samting we Jehova i talem, i se: ‘Bambae mi mekem yu yu olsem wan samting we yu wan yu fraet long hem mo ol fren blong yu tu oli fraet long hem, mo bambae yu luk stret long ae blong yu we ol enemi blong olgeta oli kilim olgeta oli ded long naef blong faet,+ mo bambae mi letem Juda i go long han blong king blong Babilon, mo bambae hem i tekem olgeta oli go stap long Babilon mo i kilim olgeta oli ded long naef blong faet.+
5 Mo bambae mi givim olgeta rij samting blong taon ya mo olgeta gudgudfala samting blong hem, mo olgeta sas samting blong hem, mo olgeta gudfala samting blong ol king blong Juda, i go long han blong ol enemi blong olgeta.+ Mo bambae oli stilim olgeta mo oli holem olgeta mo oli tekem olgeta i go long Babilon.+
6 Mo yu Pasuru, mo olgeta evriwan we oli stap long haos blong yu, bambae yufala i go kalabus long narafala kantri. Bambae yu go long Babilon mo yu ded longwe, mo bambae oli berem yu longwe wetem ol fren blong yu, from we yu bin talemaot ol giaman profet tok long olgeta.’”+
7 O Jehova, yu yu trikim gud mi, mo mi foldaon gud long trik blong yu.
Yu yusum paoa blong yu agensem mi, mo yu win.+
Mi mi kam olsem wan samting we ol man oli stap laf long hem fuldei,Evri man oli stap jikim mi.+
8 From evritaem we mi toktok, mi mas singaot bigwan, mi talemaot se:“!Faet mo fasin blong spolem samting!”From tok blong Jehova, ol man oli stap talem ol rabis tok mo oli stap jikim mi fuldei.+
9 Taswe mi talem se: “Bambae mi no moa tokbaot hem,Mo bambae mi no moa toktok long nem blong hem.”+Be long hat blong mi, tok ya i kam olsem faea we i stap bonem ol bun blong mi,Mo mi taed finis blong holemtaet tok ya insaed long mi,Mi no moa save holem i stap longtaem moa.+
10 From mi harem plante nogud toktok we i stap goraon,Ol samting blong fraet oli stap raonabaot long mi.+
Oli se: “!Yumi tok agensem hem, i gud yumi tok agensem hem!”Evri man we oli stap talem se pis i stap wetem mi, oli stap wet blong luk we mi foldaon,+ oli se:“Maet bambae hem i mekem wan krangke mastik,Mo yumi save winim hem mo yumi save givimbak long hem.”
11 Be Jehova i bin stap wetem mi olsem wan strong man blong faet we man i fraet long hem.+
From samting ya, olgeta we oli stap ronem mi blong kilim mi, bambae oli stambol mo bambae oli no win.+
Bambae ol man oli mekem olgeta oli sem bigwan, from we bambae oli no win.
Yes, sem ya bambae i stap olwe we ol man oli no save fogetem.+
12 Be yu, O Jehova komanda blong ol ami, yu stap skelem ol stret man,Yu luk ol tingting we oli haed* mo yu luk hat.+
I gud yu letem mi mi luk we yu givimbak long olgeta,+From we mi mi putum kot kes blong mi long han blong yu.+
13 !Yumi singsing long Jehova! !Yumi presem Jehova!From hem i tekemaot puaman* long han blong ol rabis man.
14 !I gud sipos man i bin singaot trabol i kam long dei ya we mi bon long hem!!I gud sipos man i no bin blesem dei ya we mama blong mi i bonem mi long hem!+
15 I gud sipos trabol i bin kasem man we i karem gud nius i kam long papa blong mi se:“!Pikinini blong yu i bon, wan boe!”Nao i mekem hem i glad bigwan.
16 I gud sipos man ya i kam olsem ol taon we Jehova i spolem olgeta, we hem i no sore nating.
I gud long moning hem i harem man we i singaot bigwan, mo long medel dei i harem saon we i givim woning.
17 ?From wanem hem i no kilim mi mi ded long bel,Nao mama blong mi i kam olsem ples we oli berem mi long hem,Mo bel blong hem i stap bigwan olwe?+
18 ?From wanem mi mas kamaot long bel blong mama blong miBlong luk trabol mo mi harem nogud,Blong mi finisim ol dei blong mi we mi sem we mi sem?+
