Jeremaea 35:1-19
-
Laen blong Rekab oli soem gudfala eksampol long fasin blong obei (1-19)
35 Long ol dei blong Jehoeakim+ boe blong Josaea, king blong Juda, tok ya blong Jehova i kamtru long Jeremaea se:
2 “Yu go long haos blong laen blong Rekab+ mo yu toktok wetem olgeta mo yu tekem olgeta i go insaed long haos blong Jehova, insaed long wan long ol rum blong kakae,* ale yu givim waen long olgeta blong oli dring.”
3 Ale mi tekem Jahasania boe blong Jeremaea we i boe blong Habasinia, ol brata blong hem, ol boe blong hem, mo evriwan long haos blong laen blong Rekab
4 i go insaed long haos blong Jehova. Mi tekem olgeta i go long rum blong kakae we i blong ol boe blong Hanan we i boe blong Ikdalaea, wan man blong tru God. Rum ya i stap narasaed long rum blong kakae blong ol prins, we i stap antap long rum blong kakae blong Mahasea we i boe blong Salum we i man blong lukaot long doa.
5 Biaen mi putum ol kap mo ol kap waen we i fulap long waen, long fored blong ol man long haos blong laen blong Rekab, mo mi talem long olgeta se: “Yufala i dring waen.”
6 Be oli talem se: “Bambae mifala i no dring waen, from we Jehonadab*+ boe blong Rekab we i olfala bubu blong mifala, i bin givim oda ya long mifala se: ‘Yufala mo ol boe blong yufala, yufala i no mas dring waen nating.
7 Mo yufala i no mas bildim wan haos, saksakem sid, mo yufala i no mas planem o kasem wan plantesen blong grep. Be oltaem yufala i mas laef long ol tent, olsem nao yufala i save laef longtaem long kantri ya we yufala i stap long hem olsem ol man blong narafala kantri.’
8 Taswe mifala i gohed blong obei long voes blong Jehonadab boe blong olfala bubu blong mifala Rekab, yes evri samting we hem i talem long mifala, mifala i neva dring eni waen, hemia mifala wetem ol waef blong mifala, ol boe blong mifala, mo ol dota blong mifala.
9 Mo mifala i no bildim ol haos blong stap long hem, mo mifala i no gat ol plantesen blong grep mo ol graon, mo ol sid.
10 Mifala i gohed blong laef long ol tent mo mifala i stap obei long olgeta samting we Jehonadab* olfala bubu blong mifala i bin talem long mifala.
11 Be taem King Nebukadnesa* blong Babilon i kam antap agensem kantri ya,+ mifala i se: ‘Yufala i kam, i gud yumi go insaed long Jerusalem blong ronwe long ol ami blong ol man Koldia mo blong ol man Siria,’ mo naoia mifala i stap long Jerusalem.”
12 Mo tok blong Jehova i kamtru long Jeremaea se:
13 “Hemia samting we Jehova komanda blong ol ami, we i God blong Isrel i talem, i se: ‘Yu go mo yu talem long ol man Juda mo long olgeta we oli stap laef long Jerusalem se: “Yufala i save gud we oltaem mi mi gohed blong pulum yufala blong obei long ol tok blong mi,”+ hemia nao tok blong Jehova.
14 “Jehonadab boe blong Rekab i talem long ol laen blong hem se oli no mas dring waen, mo olgeta oli folem gud ol tok blong hem, oli no stap dring waen kam kasem tede, yes oli stap obei long oda blong olfala bubu blong olgeta.+ Be mi, bifo i kam, mi stap toktok long yufala bakegen mo bakegen,* be yufala i no obei nating long mi.+
15 Mo mi gohed blong sanem olgeta man blong wok blong mi ol profet oli kam long yufala, mi stap sanem olgeta bakegen mo bakegen,*+ mi se: ‘!Plis yufala wanwan i mas tanem baksaed long ol rabis rod blong yufala,+ mo yufala i mekem samting we i stret! Yufala i no mas wokbaot biaen long ol narafala god mo wok blong olgeta. Olsem nao, bambae yufala i gohed blong laef long kantri ya we mi bin givim long yufala, mo long ol olfala blong yufala.’+ Be yufala i no pusum sora blong yufala i kam mo yufala i no lesin long mi.
16 Ol laen blong Jehonadab boe blong Rekab, oli mekem samting we olfala bubu blong olgeta i bin talem long olgeta,+ be ol man ya oli no lesin long mi nating.”’”
17 “Taswe hemia samting we Jehova, God ya we i komanda blong ol ami, mo i God blong Isrel i talem, i se: ‘Naoia bambae mi tekem trabol i kam long Juda mo olgeta man Jerusalem. Hemia olgeta trabol we mi bin givim woning long olgeta from.+ From we mi bin toktok long olgeta be oli no save lesin, mo mi gohed blong singaot olgeta be oli no ansa.’”+
18 Mo Jeremaea i talem long famle blong laen blong Rekab se: “Hemia samting we Jehova komanda blong ol ami, we i God blong Isrel i talem, i se: ‘From we yufala i bin obei long oda blong olfala bubu blong yufala Jehonadab mo yufala i gohed blong folem olgeta oda blong hem, we yufala i mekem stret samting we hem i talem long yufala,
19 nao hemia samting we Jehova komanda blong ol ami, we i God blong Isrel i talem, i se: “Bambae i neva gat wan taem we wan long laen blong Jehonadab* boe blong Rekab i no mekem wok long fes blong mi.”’”
Ol futnot
^ NT: “wan long ol rum.”
^ PT: “Jonadab,” hem i sot nem blong Jehonadab.
^ PT: “Jonadab,” hem i sot nem blong Jehonadab.
^ PT: “Nebukadresa,” narafala rod blong spelem.
^ PT: “mi stap girap eli mo mi stap toktok.”
^ PT: “mi girap eli mo mi stap sanem olgeta i kam.”
^ PT: “Jonadab,” hem i sot nem blong Jehonadab.
