Jeremaea 40:1-16
40 Tok ya Jeremaea i kasem long Jehova afta we Nebusaradan+ lida blong ol gad i letem hem i aot long Rama+ i go fri. Hem i bin tekem Jeremaea i go longwe, we ol hankaf oli stap long hem, mo hem i stap long medel blong olgeta man Jerusalem mo Juda we oli bin dipotem olgeta i go long Babilon.
2 Biaen lida blong ol gad i tekem Jeremaea mo i talem long hem se: “Jehova God blong yu, i bin talemaot ol trabol ya agensem ples ya,
3 mo Jehova i mekem ol trabol ya i kamtru olsem we hem i talem, from we yufala i mekem sin agensem Jehova mo yufala i no obei long voes blong hem. Hemia nao from wanem samting ya i hapen long yufala.+
4 Naoia mi stap tekemaot ol hankaf long han blong yu, mi letem yu yu fri tede. Sipos yu ting se i gud yu kam wetem mi long Babilon, yu kam, mo bambae mi lukaot long yu. Be sipos yu no wantem kam wetem mi long Babilon, yu no kam. !Yu luk! Olgeta graon ya i stap long fored blong yu. Yu go long eni ples we yu jusum.”+
5 Taem Jeremaea i no tanemraon yet blong gobak, Nebusaradan i talem se: “Yu gobak long Gedalia+ boe blong Ahikam+ we i boe blong Safan,+ we king blong Babilon i putumap hem i lukaot long ol taon blong Juda mo yu stap wetem hem long medel blong ol man, o yu save go long eni ples we yu jusum.”
Ale lida blong ol gad i givim wan presen long hem mo sam kakae blong i holem wetem hem mo i letem hem i go.
6 Nao Jeremaea i go long Gedalia we i boe blong Ahikam long Mispa+ mo i stap wetem hem long medel blong ol man ya we oli stap nomo long graon ya.
7 Samtaem i pas, olgeta lida blong ol ami we oli stap long open ples wetem ol man blong olgeta, oli harem se king blong Babilon i putumap Gedalia we i boe blong Ahikam, i lukaot long kantri ya Juda, mo i putumap hem i lukaot long ol man, ol woman, mo ol pikinini, we oli ol puaman blong kantri ya we oli no bin dipotem olgeta i go long Babilon.+
8 Ale oli go luk Gedalia long Mispa.+ I gat Ismael+ we i boe blong Netania, Johanan+ mo Jonatan we tufala i boe blong Karea, Seraea we i boe blong Tanumet, ol boe blong Efae we i man Netofa, mo Jesania+ we i boe blong man Mahaka. Olgeta ya oli go wetem ol man blong olgeta.
9 Nao Gedalia we i boe blong Ahikam mo i smol bubu blong Safan, i mekem wan strong promes long olgeta mo long ol man blong olgeta se: “Yufala i no mas fraet blong wok blong ol man Koldia. Yufala i stap long kantri ya mo yufala i wok blong king blong Babilon, nao bambae yufala i stap gud.+
10 Be mi, bambae mi stap long Mispa blong representem yufala taem ol man Koldia oli kam long yumi.* Be yufala, yufala i mas hivimap ol waen, ol frut blong hot taem, mo oel, mo putum olgeta long ol graonpot blong yufala blong putum gud ol samting, mo yufala i go stap long ol taon we yufala i tekova long olgeta.”+
11 Mo olgeta man Jiu we oli stap long Moab, Amon, mo Edom, wetem olgeta we oli stap long olgeta narafala kantri, olgeta tu oli harem se king blong Babilon i letem smol haf blong ol man oli stap long Juda, mo se hem i putumap Gedalia boe blong Ahikam we i boe blong Safan i lukaot long olgeta.
12 Ale olgeta man Jiu oli stat blong aot long olgeta ples we oli bin go stap wanwan long olgeta, oli kambak, mo oli kam long kantri ya Juda, long Gedalia long Mispa. Mo oli hivimap waen mo ol frut blong hot taem, we i plante we plante.
13 Johanan boe blong Karea mo olgeta lida blong ol ami we oli stap long open ples, oli kam long Gedalia long Mispa.
14 Oli talem long hem se: “?Yu yu no save se Bahalis, king blong ol man Amon,+ i bin sanem Ismael boe blong Netania i kam blong kilim yu?”*+ Be Gedalia boe blong Ahikam i no bilivim olgeta.
15 Biaen Johanan boe blong Karea i talem haed nomo long Gedalia long Mispa se: “Mi wantem go kilim ded Ismael boe blong Netania, mo bambae i no gat wan man i save. ?From wanem hem i mas kilim yu?* ?Mo from wanem olgeta man Juda we oli kam stap wetem yu, oli mas go wanwan olbaot, mo smol haf blong ol man Juda we oli stap yet, oli lus?”
16 Be Gedalia+ boe blong Ahikam i talem long Johanan boe blong Karea se: “Yu no mas mekem samting ya, from samting we yu stap talem long saed blong Ismael i giaman nomo.”
Ol futnot
^ PT: “blong mi stanap long fored blong ol man Koldia we oli kam long yumi.”
^ NT: “kilim sol blong yu?”
^ NT: “kilim sol blong yu.”
