Gospel blong Jon 18:1-40
-
Judas i letem Jisas i go long han blong ol enemi (1-9)
-
Pita i yusum wan naef blong faet (10, 11)
-
Oli tekem Jisas i go long Anas (12-14)
-
Faswan taem we Pita i talem se hem i no save hem (15-18)
-
Jisas i stanap long fes blong Anas (19-24)
-
Seken taem mo namba 3 taem we Pita i talem se hem i no save hem (25-27)
-
Jisas i stanap long fes blong Paelat (28-40)
-
“Kingdom blong mi i no blong wol ya” (36)
-
18 Taem Jisas i talem ol samting ya finis, hem wetem ol disaepol blong hem oli krosem Kedron Vali,*+ mo oli go long wan ples we i gat garen long hem nao oli stap ya.+
2 Judas, man ya we i letem hem i go long han blong ol enemi, hem tu i save ples ya from we plante taem, Jisas wetem ol disaepol blong hem oli stap mit long ples ya.
3 Nao Judas i tekem sam soldia mo ol ofisa blong ol jif pris mo ol Farisi, oli kam long ples ya. Olgeta ya oli karem ol laet mo ol stik faea, mo ol tul blong faet.+
4 Jisas i save finis ol samting we bambae i hapen long hem. Ale hem i go fored long olgeta mo i askem long olgeta se: “?Yufala i stap lukaot hu?”
5 Oli ansa se: “Jisas ya we i Nasarin.”+ Nao hem i talem long olgeta se: “Mi ya nao.” Judas ya we i letem hem i go long han blong olgeta, hem tu i stap stanap wetem olgeta.+
6 Be taem Jisas i talem long olgeta se: “Mi ya nao,” oli step bak, oli foldaon long graon.+
7 Nao hem i askem long olgeta bakegen se: “?Yufala i stap lukaot hu?” Oli ansa se: “Jisas ya we i Nasarin.”
8 Jisas i talem se: “Mi mi talem long yufala finis se mi ya nao. Sipos yufala i stap lukaot mi, i gud yufala i letem ol man ya oli go.”
9 Hemia i blong mekem tok we hem i talem i kamtru we i talem se: “Olgeta ya we yu yu givim long mi, mi mi no lusum wan long olgeta nating.”+
10 Saemon Pita i gat wan naef blong faet, ale hem i pulumaot, i katem slef blong hae pris, i katemaot raetsaed sora blong hem.+ Nem blong slef ya Malkas.
11 Be Jisas i talem long Pita se: “Yu putumbak naef ya long paos blong hem.+ ?Yu no ting se mi mas dring long kap ya we Papa blong mi i givim?”+
12 Nao ol soldia wetem komanda blong ami mo ol ofisa blong ol man Jiu, oli arestem Jisas mo oli fasem hem.
13 Nao oli tekem hem i go long Anas, palika blong Kaeafas+ we i hae pris long yia ya.+
14 Kaeafas ya nao i bin talem long ol man Jiu se i moa gud we wan man i ded blong sevem olgeta man.+
15 Nao Saemon Pita mo wan narafala disaepol, tufala i stap folem Jisas.+ Be narafala disaepol ya, hae pris i save hem, taswe hem i folem Jisas i go insaed long yad blong hae pris,
16 be Pita i stap stanap long get.* Nao disaepol ya we hae pris i save hem, hem i go aotsaed, i toktok long gel we i stap lukaot long get, mo hem i tekem Pita i kam insaed.
17 Nao gel ya i talem long Pita se: “?Yu tu yu wan disaepol blong man ya?” Hem i ansa se: “Nogat.”+
18 Long taem ya ples i kolkol, ale ol slef mo ol ofisa oli laetem ol sakol faea, mo oli stanap raon long hem blong wom. Pita tu i stap stanap wetem olgeta, i stap wom.
19 Nao jif pris i askem kwestin long Jisas from ol disaepol blong hem, mo ol tijing blong hem.
20 Jisas i ansa se: “Mi mi stap talemaot ol tok blong mi long fes blong olgeta man. Oltaem mi stap tijim ol man long sinagog mo long tempol+ we ol man Jiu oli stap kam long hem, mo mi mi no haed blong toktok long ol man.
21 ?From wanem yu askem kwestin long mi? I gud yu askem long olgeta ya we oli harem tok blong mi. !Yu luk! Olgeta oli save samting we mi talem.”
22 Taem Jisas i talem tok ya finis, wan long ol ofisa ya we i stanap klosap, i slavem fes blong hem+ mo i talem se: “?Weswe yu yu ansa olsem long hae pris?”
23 Jisas i ansa se: “Sipos mi talem wan samting we i rong, yu talem. Be sipos samting we mi talem i stret, ?from wanem yu slavem mi?”
24 Ale Anas i sanem hem we oli fasem hem yet, i go long hae pris ya Kaeafas.+
25 Saemon Pita i stap stanap yet klosap long faea, i stap wom. Nao oli talem long hem se: “?Yu tu yu wan disaepol blong man ya?” Be hem i haedem i se: “Nogat.”+
26 Nao wan long ol slef blong hae pris we i famle blong man ya we Pita i katemaot sora blong hem,+ i talem se: “Mi luk yu long garen wetem hem.”
27 Be Pita i haedem bakegen, mo wantem nomo faol i singaot.+
28 Nao long eli moning, oli tekem Jisas long haos blong Kaeafas i go long haos blong hed gavman.+ Be oli no go insaed long haos ya, from we oli no wantem kam doti+ nao oli no save kakae kakae blong Pasova.
29 Taswe Paelat i kam luk olgeta aotsaed mo i askem long olgeta se: “?Wanem poen we yufala i gat agensem man ya?”
30 Oli ansa se: “Sipos man ya i no wan man blong brekem loa, bambae mifala i no save tekem hem i kam long yu.”
31 Nao Paelat i talem long olgeta se: “Yufala i tekem hem i gobak mo yufala nomo i jajem hem folem loa blong yufala.”+ Nao oli talem long hem se: “Folem loa, mifala i no gat raet blong kilim man i ded.”+
32 Samting ya i kamaot blong mekem tok blong Jisas i kamtru, we hem i talem blong soemaot fasin we bambae hem i ded long hem.+
33 Nao Paelat i go insaed long haos blong hed gavman bakegen, mo i singaot Jisas, i askem long hem se: “?Yu yu King blong ol man Jiu?”+
34 Jisas i ansa se: “?Kwestin ya i kamaot long tingting blong yu nomo, o ol narafala oli stap tokbaot mi long yu olsem?”
35 Paelat i ansa se: “Mi mi no man Jiu. Ol man ples blong yu nomo mo ol jif pris oli putum yu long han blong mi. ?Yu yu mekem wanem?”
36 Nao Jisas i ansa se:+ “Kingdom blong mi i no blong wol ya.+ Sipos Kingdom blong mi i blong wol ya, bambae ol man blong mi oli faet finis blong blokem ol man ya blong oli no putum mi long han blong ol man Jiu.+ Be Kingdom blong mi i no blong wol ya.”
37 Nao Paelat i talem long hem se: “Oraet. ?Be yu yu king?” Jisas i ansa se: “Yu nao yu talem olsem se mi mi wan king.+ Mi mi bon i kam long wol ya blong wan samting nomo, blong mi talemaot trutok.+ Olgeta man we oli glad long trutok, oli lesin long voes blong mi.”
38 Nao Paelat i askem long hem se: “?Wanem ya trutok?”
Afta we hem i askem kwestin ya, hem i go aotsaed bakegen blong luk ol man Jiu mo i talem long olgeta se: “Mi mi no faenem wan rong long hem.+
39 Mo folem kastom blong yufala, bambae mi letem wan man i go fri long taem blong Pasova.+ Taswe ?yufala i wantem se mi letem King blong ol man Jiu i go fri?”
40 Be oli singaot bigwan bakegen, oli se: “!No! !Mifala i no wantem man ya! !Mifala i wantem Barabas!” Be Barabas ya i wan man blong stil.+
Ol futnot
^ NT: “Kedron reva blong koltaem.” Hemia wan krik we i drae, be i ron nomo long taem blong kolkol, taem i gat plante ren.
^ NT: “klosap long get.”
