Stori 42: Wan Dongki i Toktok
?YU BIN harem wan dongki i toktok samtaem? Maet yu talem se ‘Nogat. Ol anamol oli no save toktok.’ Be Baebol i tokbaot wan dongki we i toktok. Bambae yumi luk olsem wanem samting ya i hapen.
Klosap ol man Isrel oli kasem kantri blong Kenan. Balak we i king blong Moab i fraet tumas long ol man Isrel. Ale hem i sanem toktok i go long wan man we i gat hed, nem blong hem Balam, blong i kam singaot trabol long ol man Isrel. Balak i mekem promes long Balam se bambae i givim bigfala mane long hem. Ale, Balam i klaem long dongki blong hem, i stat wokbaot i kam blong luk Balak.
Jeova i no wantem we Balam i singaot trabol i kam long ol man blong Hem. Ale, hem i putum wan enjel i stanap long rod blong blokem Balam. Enjel ya i stap holem wan longfala naef blong faet. Balam i no save luk enjel ya, be dongki i save luk hem. Taem dongki i luk hem, hem i tanem hem i gowe long rod. Biaen, hem i ledaon long bel blong hem long medel blong rod. Balam i kros gud long dongki ya, i wipim hem long wokingstik blong hem.
Nao Jeova i mekem se dongki ya i toktok olsem man, i talem long Balam se: ‘?Mi mi mekem wanem long yu? ?From wanem yu wipim mi olsem?’
Balam i talem se: ‘!From we yu stap mekem long mi olsem we mi mi krangke! !Sipos mi holem naef blong faet blong mi, naoia nomo bambae mi kilim yu yu ded!’
Be dongki i talem se: ‘!Yu luk! Oltaem yumitu stap wokbaot. ?Be yu save tingbaot we mi mekem olsem long yu samtaem?’
Balam i talem se: ‘Nogat.’
Nao Jeova i letem Balam i luk enjel ya we i stap stanap long rod, i holem naef blong faet blong hem. Enjel ya i talem se: ‘!Balam! ?From wanem yu stap wipim dongki blong yu? Mi mi kam blong blokem rod blong yu, from we yu yu mekem i nogud, yu stap go blong singaot trabol i kam long ol man Isrel. Sipos dongki ya i no bin gowe long rod, bambae mi mi kilim yu yu ded, mi letem hem nomo i stap.’
Nao Balam i talem se: ‘Sore, mi mi mekem nogud ya. Mi no save we yu yu stap stanap long rod blong blokem mi olsem.’ Nao enjel i letem Balam i go, mo Balam i go luk Balak. Hem i traem yet blong singaot trabol i kam long ol man Isrel, be Jeova i mekem se hem i talem ol tok blong blesem Isrel nomo. Tri taem, hem i mekem samting ya.
Namba 21:21-35; 22:1-40; 23:1-30; 24:1-25.
Ol Kwestin
- ?Balak hem i hu? ?From wanem hem i sanem toktok i go long Balam?
- ?From wanem dongki blong Balam i ledaon long medel blong rod?
- ?Dongki i talem wanem long Balam?
- ?Enjel i talem wanem long Balam?
- ?Wanem i hapen taem Balam i traem singaot trabol i kam long ol man Isrel?
Sam narafala kwestin
- Ridim Namba 21:21-35.
?From wanem ol man Isrel oli winim King Sihon we i king blong ol man Amoro wetem King Og we i king blong Basan? (Nam. 21:21, 23, 33, 34)
- Ridim Namba 22:1-40.
?Wanem tingting i pusum Balam blong singaot trabol i kam long ol man Isrel? ?Yumi lanem wanem lesen from? (Nam. 22:16, 17; Prov. 6:16, 18; 2 Pita 2:15; Jud 11)
- Ridim Namba 23:1-30.
?Nating we Balam i toktok olsem wan man blong wosipim Jeova, olsem wanem ol aksin blong hem oli soemaot defren samting? (Nam. 23:3, 11-14; 1 Saml. 15:22)
- Ridim Namba 24:1-25.
?Olsem wanem stori ya blong Baebol i mekem bilif blong yumi i strong se stamba tingting blong Jeova bambae i kamtru? (Nam. 24:10; Aes. 54:17)
