?YU YU tingbaot stori blong trifala yangfala ya we yumi ridim finis? Yes, ol yangfala ya oli ol fren blong Daniel we oli no wantem kakae ol rij kakae we i nogud long bodi blong olgeta. Ol man Babilon oli singaot trifala ya se, Sadrak, Mesak, mo Abednego. Be traem luk trifala ya naoia. ?From wanem trifala i no bodaon long bigfala aedol ya olsem ol narafala oli mekem? Bambae yumi faenem ansa blong kwestin ya.

Yu yu rimemba ol loa we Jeova i bin raetemdaon, we nem blong olgeta se Tenkomanmen? Faswan long ol loa ya hemia: ‘Bambae yufala i no mekem wosip long ol narafala god, yufala i mas mekem wosip long mi nomo.’ Trifala yangfala ya oli stap obei long loa ya, nating se i no isi.

King blong Babilon, Nebukadnesa, i singaot plante bigman blong oli kam ona long aedol ya we hem i stanemap. Hem i talem long ol man ya se: ‘Taem yufala i harem noes blong ol trampet, ol gita mo ol narafala instramen, yufala i mas bodaon blong mekem wosip long pija ya we oli wokem long gol. Man we i no bodaon long hem, wantaem nomo bambae mi sakem hem i go long bigfala faea ya we i laet we i laet.’

Taem Nebukadnesa i harem nius ya se Sadrak, Mesak, mo Abednego i no bodaon, hem i kros we i kros. Hem i talem long ol man blong hem blong oli karem trifala i kam stanap long fes blong hem. Nao hem i givim wan moa janis long trifala blong oli bodaon long pija ya. Be ol yangfala ya oli trastem Jeova. Oli talem long Nebukadnesa se: ‘God ya we mitrifala i wok blong hem, hem i save sevem mitrifala. Be sipos hem i no sevem mitrifala, nating nomo. Be yu yu mas save se bambae mitrifala i no save bodaon long aedol ya we yu stanemap.’

Taem Nebukadnesa i harem tok ya, hem i kros tumas gogo ae blong hem i red we i red. I gat wan bigfala faea i stap klosap, nao hem i talem long ol man blong hem se: ‘!Yufala i sakem seven hip faeawud i go wantaem long hol ya blong faea, blong mekem faea ya i laet we i laet bitim mak!’ Nao hem i talem long ol strong soldia blong hem blong oli fasem Sadrak, Mesak, mo Abednego, oli sakem trifala i go long bigfala faea ya. Be from we faea ya i laet we i laet bitim mak, ol soldia ya we oli karem trifala man ya i go long hol blong faea ya, faea i bonem olgeta oli ded. ?Be olsem wanem long trifala yangfala ya we oli sakem trifala i go long faea?

King i stap lukluk i go long faea, nao i sek bigwan, mo i fraet. Hem i singaot long ol haeman blong hem, se: ‘!Ei olgeta! ?Mi mi ting se yumi fasem tri man nomo, yumi sakem trifala i go insaed long bigfala faea ya?’

Ol man blong hem oli ansa se: ‘Yes king. Yumi fasem tri man nomo ya.’

Nao king i se: ‘Be mi luk fo man i stap wokbaot insaed long faea ya. I no gat rop i fasem olgeta, mo faea i no bonem olgeta nating. Mo namba fo man ya i olsem wan god nomo.’ King i go klosap long hol ya blong faea, mo i singaot trifala i talem se: ‘!Sadrak! !Mesak! !Abednego! !Yutrifala i man blong wok blong God ya we i hae we i hae! !Yutrifala i kamaot!’

Taem trifala i kamaot, ol man oli luk we faea ya i no bonem trifala nating. Nao king i talem se: ‘!Yumi presem God blong Sadrak, mo Mesak mo Abednego! Hem i sanem enjel blong hem i kam, nao hem i sevem trifala ya we trifala i no save bodaon blong mekem wosip long ol narafala god, trifala i mekem wosip long God blong trifala nomo.’

Trifala i soem nambawan fasin blong stap tru long Jeova. I gud yumi folem eksampol ya blong trifala.

Eksodas 20:3; Daniel 3:1-30.