Stori 100: Jisas Long Garen Blong Getsemane
AFTA we Jisas mo ol aposol blong hem oli aot long bigfala rum antap, oli go long garen blong Getsemane. Oli kam plante taem finis long ples ya. Jisas i talem long olgeta blong oli stap wekap mo prea. Nao hem i wokbaot i go longwe lelebet, i bodaon we fes blong hem i kasem graon.
Biaen, Jisas i kambak long ol aposol blong hem. ?Yu ting se olgeta ya oli stap mekem wanem? !Oli stap slip! Tri taem Jisas i talem long olgeta blong stap wekap, mo tri taem hem i faenem olgeta oli stap slip. Long namba tri taem, Jisas i talem long olgeta se: ‘?Weswe? ?Yufala i stap slip yet? Taem i kam finis blong man ya i letem mi, mi go long han blong ol man nogud.’
Taem Jisas i stap toktok yet, oli harem noes blong wan bigfala hip blong man we oli stap kam. !Yu luk! !Oli stap kam wetem ol naef blong faet mo ol nalnal blong olgeta! Mo oli stap karem ol stik faea blong oli save luklukgud. Taem oli kam klosap, wan long olgeta i wokbaot i kam long Jisas. Hem i kis long Jisas, olsem pija ya i soem. !Man ya, hem i Judas Iskariot! ?From wanem hem i kis long Jisas?
Jisas i askem long hem se: ‘Judas, ?Yu yu kam blong kis long mi, blong letem mi mi go long han blong ol enemi blong mi?’ Yes, kis ya i wan saen. Judas i stap soem long ol man ya, hu nao Jisas we oli mas holem hem. Ale, ol enemi blong Jisas oli kam holem hem. Be Pita i no wantem se oli holem Jisas, hem i rere blong faetem ol man ya. Hem i pulumaot naef blong faet we hem i stap karem, mo i traem blong katem man ya we i stanap klosap long hem. Naef ya i jes mestem hed blong man ya, i katemaot raetsaed sora blong hem. Be Jisas i tajem sora blong man ya mo i mekem i gud bakegen.
Jisas i talem long Pita se: ‘Yu putumgud naef ya i gobak long paos blong hem bakegen. ?Yufala i ting se mi no save singaot long Papa blong mi blong i sanem plante taosen enjel, oli kam lukaot long mi?’ !Yes, Jisas i save mekem olsem! Be hem i no askem long God blong sanem ol enjel, from we hem i save se hemia stret taem blong ol enemi blong hem oli holem hem. Ale, hem i letem olgeta oli tekem hem i go. Bambae yumi luk wanem i hapen long Jisas biaen.
Matiu 26:36-56; Luk 22:39-53; Jon 18:1-12.
Ol Kwestin
- ?Afta we Jisas mo ol aposol blong hem oli aot long bigfala rum antap, oli go wea? ?Jisas i talem long ol aposol blong hem blong oli mekem wanem?
- ?Taem Jisas i kambak long ol aposol blong hem, oli stap mekem wanem? ?Samting ya i hapen hamas taem?
- ?Hu ya i kam long garen? ?Judas Iskariot i mekem wanem olsem pija ya i soem?
- ?From wanem Judas i kis long Jisas? ?Pita i mekem wanem?
- ?Jisas i talem wanem long Pita? ?From wanem Jisas i no askem long God blong i sanem ol enjel?
Sam narafala kwestin
- Ridim Matiu 26:36-56.
?Olsem wanem Jisas i givim gudfala eksampol long ol Kristin elda tede taem hem i stretem ol disaepol blong hem? (Mat. 20:25-28; 26:40, 41; Gal. 5:17; Efes. 4: 29, 31, 32)
?Wanem tingting blong Jisas long man we i yusum ol tul blong faet agensem narafala? (Mat. 26:52; Luk 6:27, 28; Jon 18:36)
- Ridim Luk 22:39-53.
?Taem wan enjel i kamtru long Jisas long garen blong Getsemane blong mekem hem i strong, samting ya i soemaot se bilif blong Jisas i stap seksek? Eksplenem. (Luk 22:41-43; Aes. 49:8; Mat. 4:10, 11; Hib. 5:7)
- Ridim Jon 18:1-12.
?Taem ol man oli agensem Jisas, olsem wanem hem i blokem ol man ya blong oli no mekem wan samting long ol disaepol blong hem? ?Fasin ya blong hem i tijim yumi long wanem samting? (Jon 10:11, 12; 18:1, 6-9; Hib. 13:6; Jem. 2:25)
