Yu lanem moa long saed blong Jeova taem yu ridim Baebol. Longtaem bifo, God i jusum sam man blong raetemdaon ol tingting blong hem. Hanraet blong olgeta ya i stap long buk ya we oli kolem Baebol. Tede, yumi lanem moa long saed blong God taem yumi ridim Baebol. From we Baebol i karem tok no mesej blong Jeova, yumi talem tu se Baebol hem i Tok blong God. Yumi save bilivim evri samting we Baebol i talem from we neva Jeova i giaman. “God i no save giaman.” (Hibrus 6:18) Trutok i stap insaed long Tok blong God.—Jon 17:17.

Baebol i wan long ol sas presen we God i givim long yumi. Hem i olsem wan leta we wan papa we i gat lav, i sanem i go long ol pikinini blong hem. Baebol i tokbaot promes blong God se bambae hem i jenisim wol ya i kam wan nambawan ples blong laef long hem—wan paradaes. Baebol i talem long yumi wanem we God i bin mekem bifo, wanem we hem i stap mekem naoia, mo wanem we bambae hem i mekem long olgeta pikinini blong hem we oli holem bilif. Mo tu, Baebol i halpem yumi blong winim ol problem mo blong faenem glad.—2 Timoti 3:16, 17.

 Ol Witnes blong Jeova oli ol fren blong God; oli save halpem yu blong kasem save long ol tijing blong Baebol. Yu mas talem long olgeta se yu yu wantem stadi long Baebol. Oli no askem mane long man from ol stadi olsem. (Matiu 10:8) Antap long samting ya, yu save joen long ol Kristin miting. Ol miting ya oli stap long ol ples blong wosip we oli kolem Haos Kingdom. Sipos yu joen long ol Kristin miting ya, kwiktaem nomo, save blong yu long saed blong God i save kam bigwan moa.

Yu save lanem moa long saed blong God tru long ol samting we hem i wokem. Eksampel, Baebol i talem se: “God i mekem skae mo graon.” (Jenesis 1:1) Taem Jeova i wokem “skae,” hem i mekem san. ?San ya i tijim wanem long saed blong God? Hem i tijim yumi se Jeova i gat bigfala paoa. God nomo i save wokem wan samting olsem san we i gat bigfala paoa. Mo tu, san ya i tijim yumi se Jeova i waes, from we i nidim fasin waes blong wokem san ya we i stap givimaot hot mo laet we neva i save finis.

Ol samting we Jeova i wokem oli soemaot se hem i lavem yumi. Tingbaot ol defren kaen frut we oli stap long wol ya. Sipos Jeova i wantem, hem i save givim wan kaen frut nomo long yumi—no hem i save tingting se yumi no nidim ol frut. Be, no gat. Jeova i givim plante defren kaen frut we saes blong olgeta, kala blong olgeta mo tes blong olgeta evriwan i defdefren. Samting ya i soem se Jeova hem i wan God we i gat lav, mo tu, hem i glad blong givim presen, hem i tingbaot yumi, mo hem i kaen gud.—Ol Sam 104:24.