LESEN 03
?Yu Save Trastem Baebol?
Baebol i mekem plante promes mo i givim plante advaes. Ating yu wantem save se hem i tijim wanem, be long semtaem, maet yu fraet tu. ?I stret blong trastem ol promes mo advaes long olfala buk ya? ?Yu save enjoem laef naoia mo bilif long ol promes blong Baebol? Plante milian man oli bilif olsem. I gud yu traem faenemaot sipos yu save bilivim tu.
1. ?Ol stori blong Baebol oli tru?
Baebol i talemaot se ol tok blong hem oli “ol stret tok blong trutok.” (Prija 12:10) Hem i tokbaot ol trufala stori blong ol man we oli rili laef bifo. (Ridim Luk 1:3; 3:1, 2.) Plante man blong histri mo akeoloji oli pruvum se ol impoten det, ol man, ol ples, mo ol stori we Baebol i tokbaot, oli tru.
2. ?From wanem yumi save talem se Baebol i no olfala?
Plante taem, Baebol i pruvum se ol tok blong hem i tokbaot ol samting we ol man oli jes save biaen. Eksampol, hem i tokbaot ol topik blong sayens. Plante long ol topik ya, ol man oli no bilivim long taem ya we oli raetem Baebol. Be tede, ol man blong sayens oli pruvum se samting we Baebol i talem, oli tru. Yes, “man i save dipen long olgeta oltaem, naoia mo blong olwe.”—Ol Sam 111:8.
3. ?From wanem yumi save trastem ol promes blong Baebol?
Baebol i tokbaot ol profet tok we oli “talemaot ol samting we oli no kamtru yet.” (Aesea 46:10) Hem i talemaot ol tru stori we plante yia biaen, oli jes kamtru. Mo tu, hem i talemaot klia ol samting we oli stap hapen tede long wol. Long lesen ya, bambae yumi jekem sam profet tok blong Baebol. !Oli kamtru long wan fasin we yumi sapraes long hem!
DIGIM MOA
Faenemaot olsem wanem tede sayens i agri wetem Baebol, mo jekem sam profet tok blong Baebol we bambae yu sapraes long olgeta.
4. Sayens i agri wetem Baebol
Bifo, plante man oli bilif se wol i sidaon long wan samting. Plei VIDEO.
Makem samting we buk blong Job i talem samwe 3,500 yia bifo. Ridim Job 26:7, mo tokbaot kwestin ya:
-
?Olsem wanem Job i save se wol i no hang “long wan samting”?
Bifo long ol yia 1800, ol man oli no savegud long wota saekol. Nating se i olsem, makem wanem we Baebol i talem plante taosen yia bifo. Ridim Job 36:27, 28, mo tokbaot ol kwestin ya:
-
Vas ya i tokbaot wota saekol. ?Be olsem wanem Job i save samting ya?
-
?Vas ya we yu jes ridim, i mekem se yu yu trastem Baebol moa?
5. Baebol i talemaot ol impoten samting bifo we oli kamtru
Ridim Aesea 44:27–45:2, mo tokbaot kwestin ya:
-
?Wanem save we Baebol i talemaot 200 yia bifo we Babilon i foldaon?
Histri i pruvum se Saeras we i king blong Pesia, wetem ami blong hem, oli winim taon blong Babilon long yia 539 B.K.T. a Oli jenisim rod blong reva we i protektem taon ya. Afta we oli go insaed long ol get we oli open i stap, oli winim taon ya we oli no nid blong faet. Tede, bitim 2,500 yia afta, Babilon i wan hip blong ol ston nomo. Makem wanem we Baebol i bin talemaot.
Ridim Aesea 13:19, 20, mo tokbaot kwestin ya:
-
?Olsem wanem samting we i hapen long Babilon i pruvum se profet tok ya i kamtru?
Ol hip ston blong Babilon tede, long Irak
6. Baebol i talemaot ol samting we yumi stap luk tede
Baebol i tokbaot taem blong yumi se “ol las dei.” (2 Timoti 3:1) Makem samting we Baebol i talemaot long saed blong taem ya:
Ridim Matiu 24:6, 7, mo tokbaot kwestin ya:
-
?Wanem sam samting we bambae i hapen long ol las dei?
Ridim 2 Timoti 3:1-5, mo tokbaot ol kwestin ya:
-
?Long ol las dei, ol man bambae oli gat wanem fasin?
-
?Weswan long ol fasin ya we yu stap luk finis?
SAM MAN OLI SE: “Baebol i wan buk blong kastom stori.”
-
Long tingting blong yu, ?wanem i pruvum se toktok ya i no tru?
SAMARI
Histri, sayens, mo profet tok, oli soem se yu save trastem Baebol.
Tingtingbak
-
?Ol stori blong Baebol oli tru?
-
?Wanem sam topik long Baebol we sayens i agri long olgeta?
-
?Yu ting se Baebol i save talemaot fiuja? ?From wanem yu ansa olsem?
FAENEMAOT
?Long Baebol, i gat sam save blong sayens we i rong?
?Wanem sam trutok long saed blong “ol las dei”?
“6 Profet Tok Blong Baebol We Yu Stap Luk Oli Kamtru” (Wajtaoa, 1 Jun 2011)
Lanem olsem wanem ol profet tok long saed blong Gris, i kamtru.
Faenemaot olsem wanem ol profet tok oli jenisim tingting blong wan man long saed blong Baebol.
a B.K.T. i minim “Bifo Komon Taem,” mo K.T. i minim “Komon Taem.”
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
