1, 2. ?Baebol ya New World Translation i leftemap nem blong God olsem wanem?

 LONG Tusde namba 2 Disemba 1947, long Brooklyn, New York, san i saen gud be ples i kolkol lelebet. Long moning ya, wan smol grup blong ol tabu brata long Betel oli statem wan bigfala wok we i tekem 12 yia blong finisim. Oli wokem Baebol ya New World Translation of the Holy Scriptures. Taem oli mekem wok ya, oli mas meksua se i stret gud. Ale, long Sande namba 13 Maj 1960, oli finisim Baebol ya. Tri manis afta, long namba 18 Jun 1960, long wan asembli long Manchester, Inglan, Brata Nathan Knorr i soemaot las volium blong Baebol ya. Olgeta evriwan we oli kam long asembli ya oli glad tumas. Brata Knorr i talem se: ‘!Tede ol Witnes blong Jehova long olgeta ples blong wol, oli glad we oli glad!’ I gat wan spesel samting we i mekem olgeta oli glad tumas. Hemia se prapa nem blong God i stap long evri ples long Baebol ya, olsem we i stap long olfala hanraet.

² Long plante Baebol, i no gat nem blong God i stap. Setan i wantem ravemaot nem ya long tingting blong ol man. Be ol man blong Jehova we tabu spirit i makemaot olgeta, oli agensem plan ya blong Setan. Yumi luk samting ya long fastok blong New World Translation, we i talem se: “Bigfala samting long Baebol ya, se nem blong God i stap long evri ples we hem i mas stap long hem.” Yes, long Baebol ya, prapa nem blong God, Jehova, i stap bitim 7,000 taem. !Tru ya, i klia nomo se New World Translation i leftemap nem blong Papa blong yumi long heven, Jehova!

3. (1) ?Ol Baebol Studen oli kasem save se nem ya Jehova i minim wanem? (2) ?Eksodas 3:13, 14 i minim wanem? (Yu luk pej ya, “ Mining Blong Nem Blong God.”)

³ Fastaem ol Baebol Studen oli kasem save se nem blong God i minim “Mi stap we mi stap.” (Eks. 3:14, King James Version) Taswe, Wajtaoa blong namba 1 Jenuware 1926, i talem se: “Nem ya Jehova, hem i blong God ya we i laef olwe . . . i no gat wan taem we laef blong hem i stat mo bambae i no gat wan taem we laef blong hem i finis.” Be biaen, Jehova i givhan long ol man blong hem blong oli kasem save ful mining blong nem ya. Ale, taem  oli stat blong tanem New World Translation, oli kasem save finis se nem ya i no soemaot nomo se God i stap olwe. Be nem ya i soemaot tu se God i gat wan stamba tingting, mo i stap wok blong mekem tingting ya i kamtru. Nao oli kasem save se nem ya i minim “Hem i Mekem i Kam Olsem.” Yes, hem i mekem heven mo wol wetem ol laef samting we oli save wosipim hem, mo hem i gohed blong mekem samting we hem i wantem i kamtru. ?Be from wanem i impoten tumas we nem blong God i kam hae we i hae? ?Mo yumi save mekem wanem blong leftemap nem ya?

4, 5. (1) Taem yumi prea se “plis yu mekem we nem blong yu i tabu,” ?yumi stap askem wanem? (2) ?Bambae God i mekem nem blong hem i tabu olsem wanem?

⁴ Jehova i wantem leftemap nem blong hem. Stamba tingting blong hem i blong mekem nem ya i tabu. Yumi luksave samting ya long fastok blong Lodsprea se: “Plis yu mekem we nem blong yu i tabu.” (Mat. 6:9, NW) Be yumi wantem save se tok ya i minim wanem.

⁵ Yumi tokbaot finis long Japta 1, se tok ya i faswan long tri samting long Lodsprea we oli joen wetem stamba tingting blong Jehova. Tu narawan hemia: “Plis, yu mekem Kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Mat. 6:10, NW) Long prea ya, yumi askem long Jehova blong i tekem aksen blong mekem tufala samting ya i kamtru. Long sem fasin, taem yumi prea se, “plis yu mekem we nem blong yu i tabu,” yumi stap askem long Jehova blong i tekem aksen. Yumi wantem se hem i tekemaot doti we ol man oli sakem long nem blong hem long olgeta yia we i pas. ?Olsem wanem? ?Jehova bambae i ansa long prea ya? Yes. Hem i talem se, bambae hem i soemaot long ol man we oli spolem nem blong hem, se nem ya i tabu. (Esik. 36:23; 38:23) Taem Jehova i finisim ol rabis man long Amagedon, bambae hem i mekem nem blong hem i tabu long fes blong olgeta man.

6. ?Yumi mekem nem blong God i tabu olsem wanem?

⁶ Long ol yia we i pas finis, Jehova i letem ol man blong hem oli joen wetem hem blong mekem nem blong hem i tabu. I tru, nem ya Jehova i tabu finis. Taswe, ?yumi mekem i tabu olsem wanem? Aesea i talem se: “I stret blong yufala i ona long [Jehova] nomo.” Mo Jehova i talem long ol man blong hem se: “Bambae yufala i fraet long mi, mo bambae yufala i ona long mi.” (Aes. 8:13; 29:23) Taswe, yumi mekem nem blong God i tabu, taem yumi ona long nem ya mo leftemap antap long ol narafala nem, mo taem yumi tinghae long mining blong hem. Yumi soemaot se yumi fraet long nem blong God mo yumi respektem  nem ya, taem yumi luksave se Jehova i rul long yumi, nao yumi obei long hem long olgeta hat blong yumi.—Prov. 3:1; Rev. 4:11.

7, 8. (1) ?From wanem Jehova i no letem ol man blong hem oli karem nem blong hem kwiktaem? (2) ?Bambae yumi tokbaot wanem naoia?

⁷ Stat long yia 1870, ol man blong God oli yusum nem ya Jehova long ol buk blong olgeta. Nem ya i stap long Wajtaoa long Ogis 1879, mo long singbuk we oli printim long sem yia, nem blong hem Songs of the Bride (Ol Singsing Blong Woman Blong Kraes). Be Jehova i no letem olgeta oli karem tabu nem ya blong hem kwiktaem. Hem i meksua fastaem se oli naf. Taswe, ?hem i rerem ol Baebol Studen olsem wanem, blong oli naf blong karem nem ya?

⁸ Long ol yia klosap long 1900 mo jes afta long 1900, Jehova i mekem se ol man blong hem oli kasem save moa long ol samting we i joen wetem nem blong hem. Bambae yumi tokbaot tri samting we oli kasem save long hem.

9, 10. (1) ?Long ol yia bifo, from wanem Wajtaoa i tokbaot Jisas plante taem? (2) ?Stat long yia 1919, oli mekem wanem jenis? ?Wanem i kamaot from? (Yu luk pej ya tu, “ Wajtaoa i Leftemap Nem Blong God.”)

⁹ Fas samting: Ol Baebol Studen oli kasem save se nem blong God nao i impoten moa. Fastaem oli ting se tijing blong Baebol we i impoten moa, hemia se Jisas i ded blong pemaot ol man. From samting ya, Wajtaoa i tokbaot Jisas plante taem. Long fas yia we oli printim Wajtaoa, nem ya Jisas i stap plante moa taem i bitim nem ya Jehova. Wajtaoa blong namba 15 Maj 1976, i talem se ol Baebol Studen oli ‘leftemap Jisas bitim mak.’ Be sloslo, God i givhan long olgeta blong oli luksave se Baebol i yusum nem ya Jehova i bitim ol narafala nem. ?Ale oli mekem wanem? Sem Wajtaoa i talem se, stat long yia 1919, “oli ona moa long Jehova, we i Papa blong Mesaea long heven.” !Long ol ten yia afta long 1919, nem ya Jehova i stap bitim 6,500 taem long Wajtaoa!

¹⁰ Ale, ol brata oli leftemap nem blong God i go antap, olsem we i stret blong mekem. Long rod ya, oli soemaot se oli tinghevi long nem ya. Oli olsem Moses bifo, we i ‘presem nem blong Jehova.’ (Dut. 32:3; Sam 34:3) Mo Jehova i luk se oli tinghevi long nem blong hem, nao hem i blesem olgeta, olsem we Baebol i talem.—Sam 119:132; Hib. 6:10.

11, 12. (1) ?Afta long yia 1919, ol buk blong yumi oli tokbaot wanem? (2) ?Jehova i stap pulum ol man blong hem blong oli tingbaot wanem? ?From wanem?

¹¹ Seken samting: Ol tru Kristin oli kasem save long wok we God i givim long olgeta. Smoltaem afta long yia 1919, ol tabu brata we oli stap lidim ol man blong God, oli stadi gud long profet tok blong Aesea. Stat long taem ya, ol buk blong yumi oli tokbaot wok blong prij plante. Ol save ya i olsem ‘kakae long stret taem blong hem.’ ?From wanem?—Mat. 24:45.

¹² Bifo long yia 1919, Wajtaoa i no eksplenem tok blong Jehova we Aesea i talem, se: “Yufala i witnes blong mi. Mi mi jusumaot yufala blong yufala i man blong wok blong mi.” (Ridim  Aesea 43:10-12.) Be jes afta long yia 1919, ol buk blong yumi oli tokbaot ol vas ya. Oli pulum ol tabu brata blong oli joen long wok we Jehova i givim long olgeta, hemia blong oli witnes blong hem. Long ol yia 1925 kasem 1931, i gat 57 Wajtaoa we oli tokbaot Aesea japta 43. Evriwan long olgeta oli talem se tok blong Aesea i go stret long ol tru Kristin. Long ol yia ya, Jehova i stap pulum ol man blong hem blong oli tinghevi long wok we oli mas mekem. ?From wanem? Hem i wantem ‘luk sipos oli naf’ blong karem nem blong hem. (1 Tim. 3:10) Oli mas mekem wok fastaem blong pruvum se oli witnes blong God. Biaen, oli save karem nem blong hem.—Luk 24:47, 48.

13. ?Baebol i soemaot se wanem samting nao we i moa impoten?

¹³ Namba tri samting: Ol man blong Jehova oli kasem save se samting we i moa impoten, hemia se nem blong God i mas tabu. Afta long yia 1920, oli kasem save se Jehova i wantem moa blong leftemap nem blong hem, i bitim ol narafala samting. ?Baebol i soemaot samting ya olsem wanem? Yu traem tingbaot ol man Isrel bifo. ?From wanem God i sevem olgeta, oli aot long Ijip? Jehova hem wan i talem se, hem i wantem ‘talemaot nem blong hem long olgeta ples long wol.’ (Eks. 9:16) Nating se ol man Isrel oli mekem stronghed, be Jehova i givhan long olgeta yet. ?From wanem? Bakegen, hem i mekem olsem blong leftemap nem blong hem, mo blong ol narafala oli no daonem nem ya. (Esik. 20:8-10) ?Ol stori ya long Baebol oli tijim ol Baebol Studen long wanem samting?

14. (1) ?Klosap long yia 1930, ol Baebol Studen oli kasem save wanem? (2) ?Save ya i mekem wanem long ol Baebol Studen? (Yu luk bokis ya tu, “ Strong Tingting Blong Prij.”)

¹⁴ Klosap long yia 1930, ol Baebol Studen oli kasem save mining blong tok we Aesea i talem 2,700 yia bifo. Hem i talem se, fasin blong Jehova blong lidim ol man blong hem i leftemap nem blong hem. (Aes. 63:14) Oli kasem save se i moa impoten we God i mekem nem blong hem i tabu, i bitim we hem i sevem olgeta. (Aes. 37:20; Esik. 38:23) Long yia 1929, buk ya Prophecy i tokbaot samting ya, i se: “Bigfala samting we olgeta man long wol oli mas kasem save long hem, hemia se nem blong Jehova i mas tabu.” Niufala save ya i givim paoa long ol Baebol Studen, blong oli witnes long nem blong God, mo blong oli tekemaot doti we ol man oli sakem long nem ya.

15. (1) Long yia 1930, ?wanem ol save we ol brata oli kasem finis? (2) ?Stret taem i kam finis blong oli kasem wanem blesing?

¹⁵ Ale, long yia 1930, ol brata oli save finis se nem blong God nao we oli mas leftemap. Oli save tu long wok we God i givim long olgeta. Mo oli save se i moa impoten we nem blong God i tabu, i bitim ol narafala samting. Ale, stret taem i kam nao blong Jehova i givim bigfala blesing long olgeta blong oli karem nem blong hem. ?Samting ya i hapen olsem wanem? Blong faenem ansa blong kwestin ya, bambae yumi tokbaot sam samting we oli hapen long taem blong Baebol.

16. (1) ?Plante taem Jehova i yusum hu blong leftemap nem blong hem? (2) Long ol yia we i pas finis, ?hu i holem nem blong God?

¹⁶ Plante taem Jehova i yusum wan kampani blong man long wol blong leftemap nem blong hem. Stat long yia 1513 bifo Kraes, neson blong Isrel nao hem i kampani we Jehova i yusum. (Aes. 43:12) Be sore tumas, oli no holem promes we oli mekem wetem God. Ale, long yia 33, Jehova i sakemaot olgeta. Nao hem i ‘tekemaot sam man we oli no laen blong Isrel, blong oli holem nem blong hem.’ (Wok 15:14) Hemia kampani blong ol tabu man blong Kraes we oli kamaot long olgeta kantri. Baebol i singaot olgeta se, “Isrel blong God.”—Gal. 6:16, Nyutesteman Wetem Ol Sam Long Bislama.

17. ?Setan i mekem wanem?

 ¹⁷ Long yia 44, ol disaepol blong Kraes oli karem nem ya “Kristin.” (Wok 11:26) Fastaem, olgeta nomo oli karem nem ya, from we olgeta nao oli tru Kristin. (1 Pita 4:16) Be Setan i mekem se sam narafala man tu oli karem nem ya Kristin, olsem parabol blong gudfala sid mo rabis gras i soemaot. Be ol man ya oli giaman Kristin. Taswe, long plante handred yia, i had blong ol man oli luksave se hu nao ol tru Kristin. Be samting ya i jenis long “taem blong tekemaot ol kakae long garen” we i stat long yia 1914. ?From wanem i jenis? From we ol enjel oli seraotem ol tru Kristin long ol giaman Kristin.—Mat. 13:30, 39-41.

18. ?Wanem i mekem ol brata oli luksave se oli mas jenisim nem blong olgeta?

¹⁸ Afta we Jisas i putumap slef we i stret mo waes long yia 1919, Jehova i givhan long ol man blong hem blong oli kasem save wok we hem i givim long olgeta. Oli luksave kwiktaem se wok blong prij i makemaot olgeta se oli defren long ol giaman Kristin. Oli kasem save tu se nem ya “Baebol Studen” i no stret long olgeta. I no naf blong oli stadi Baebol nomo. Oli mas witnes blong God tu, oli mas tinghevi long nem blong hem, mo oli mas leftemap nem ya. Ale, ?wanem nem i stret blong soemaot wok blong olgeta? Ansa blong kwestin ya i kamaot long yia 1931.

19, 20. (1) ?Oli talemaot wanem strong desisen long wan asembli long yia 1931? (2) Taem ol brata oli harem niufala nem ya, ?oli mekem wanem?

¹⁹ Long Julae 1931, i gat 15,000 Baebol Studen we oli kam long wan asembli long taon ya Columbus, long Amerika. Long fas pej blong program blong asembli ya, i gat tufala leta ya J mo W i stap. Evriwan we oli stap long asembli ya oli wantem save se, ?hemia i minim wanem? Samfala oli ting se mining blong hem ‘Jes Wajaot,’ sam narafala oli ting se ‘Jes Wet.’ Ale, long Sande namba 26 Julae, Brata Joseph Rutherford i ridimaot wan strong desisen. Hem i talem se: “Yumi wantem tumas we ol man oli save se yumi Witnes blong Jehova. Mo yumi wantem we oli singaot yumi long nem ya.” !Saye! !Wantaem nomo, ol man oli kasem save se JW i minim Jehovah’s Witnesses! Nem ya i stanap long Aesea 43:10.

²⁰ Taem Brata Rutherford i ridimaot desisen ya, ol man oli singaot bigwan mo oli klapem han. !Long plante ples long wol, ol man oli harem long radio, samting we i hapen long Columbus! Ernest mo Naomi Barber, we tufala i stap long Ostrelia, tufala i tokbaot taem ya se: “!Taem ol brata long Amerika oli klapem han, ol brata long Melbourne tu oli stanap mo oli klapem han longtaem! !Oli no wantem stop! !Mitufala i no save fogetem taem ya!” a

21. ?Nem ya ol Witnes blong Jehova i mekem wanem long ol man blong God?

²¹ Nem ya, ol Witnes blong Jehova, i mekem ol man blong God oli strong moa blong prij. Edward Grimes mo woman  blong hem Jessie, we tufala i mekem wok blong paenia long Amerika, tufala i stap long asembli ya long yia 1931. Tufala i talem se: “Taem mitufala i aot long haos blong go long asembli ya, mitufala i Baebol Studen. Be taem mitufala i kambak, mitufala i Witnes blong Jehova. Mitufala i glad tumas, from we naoia mifala i gat wan nem we i leftemap nem blong God.” Afta long asembli ya, sam Witnes oli yusum wan niufala fasin blong prij blong leftemap nem blong God. Taem oli go long wan haos, oli soem wan kad we oli raetem long hem se: “Mi mi wan Witnes blong JEHOVA. Mi stap talemaot Kingdom blong JEHOVA, God blong mifala.” Yes, ol man blong God oli praod blong karem nem blong Jehova. Oli rere blong talemaot long olgeta man se nem ya i hae we i hae.—Aes. 12:4.

22. ?Wanem i mekem se man i luksave kwiktaem ol Witnes blong Jehova?

²² Plante yia finis, Jehova i pulum ol tabu brata blong oli tekem nem ya ol Witnes blong Jehova. Tede, nem ya i makemaot yet ol man blong God. Setan i no wantem olsem, hem i wantem mekem we yumi sem mak long ol giaman skul. Be hem i no win. Naoia, ol man oli stap luksave moa, se yumi nomo, yumi witnes blong God. (Ridim Maeka 4:5; Malakae 3:18.) Nem blong God i stap long yumi nomo. Taswe, taem wan man i harem narafala man i yusum nem ya Jehova, kwiktaem nomo hem i save se man ya i wan Witnes blong Jehova. Ol giaman skul oli no save kam olsem ol bigfala hil we oli blokem tru wosip, nogat. Tru wosip i “hae moa, i winim ol narafala hil.” (Aes. 2:2) Yes, wosip blong Jehova mo tabu nem blong hem, i hae we i hae.

23. ?Yumi bilif strong long wanem samting, olsem Ol Sam 121:5 i talem?

²³ Yumi save se Setan bambae i traehad blong spolem yumi, naoia mo long fiuja. Be yumi bilif strong se Jehova bambae i lukaot gud long yumi. !Bilif ya i givim paoa long yumi! (Sam 121:5) Taswe, yumi gat sem tingting olsem man we i raetem Sam ya, se: ‘Ol man we Jehova i God blong olgeta, we hem i jusumaot olgeta blong oli man blong hem, olgeta ya oli save harem gud.’—Sam 33:12.