Sol i wan man Rom we i bon long taon ya Tasas. Hem i wan Farisi mo i save gud Loa blong ol man Jiu, be i no laekem nating ol Kristin. Hem i stap pulumaot ol Kristin man mo woman long ol haos blong olgeta, mo i sakem olgeta long kalabus. Mo tu, hem i stap long taem ya we ol man oli stonem disaepol Steven i ded.

Be Sol i wantem go long ol narafala ples tu blong holem ol Kristin. Ale, hem i askem long hae pris blong i sanem hem i go long taon ya Damaskes. Taem Sol i kam klosap long taon ya, wan bigfala laet i saen long hem, nao i foldaon long graon. Hem i harem wan voes i se: ‘Sol, ?from wanem yu stap mekem i nogud long mi?’ Sol i askem se: ‘?Hu ya?’ Voes ya i talem se: ‘Jisas ya. Yu go long Damaskes, nao bae yu harem wanem we yu mas mekem.’ Wantaem nomo, Sol i kam blaen, mo oli holem han blong hem, oli lidim hem i go long taon ya.

Long Damaskes, i gat wan Kristin we nem blong hem Ananaeas. Long wan vison, Jisas i talem long Ananaeas se: ‘Yu go long haos blong Judas long rod ya we nem blong hem Stret Rod, mo yu lukaot Sol.’ Ananaeas i talem se: ‘!Masta, mi harem nius blong man ya finis! !Hem i stap sakem ol disaepol oli go long kalabus!’ Be Jisas i se: ‘Yu girap yu go luk hem. Mi mi jusumaot Sol blong i talemaot gud nius long ol man long plante kantri.’

Ananaeas i faenem Sol, mo i talem long hem se: ‘Sol, brata blong mi, Jisas i sanem mi blong mi openem ae blong yu.’ Wantaem nomo, Sol i save lukluk bakegen. Hem i kasem save long Jisas mo i kam wan man blong hem. Taem hem i baptaes, hem i go wetem ol narafala Kristin blong prij long ol haos prea blong ol man Jiu. !Traem tingbaot olsem  wanem ol man Jiu oli sek taem oli luk se Sol i stap tijim ol man long saed blong Jisas! Oli talem se: ‘?Hemia sem man ya we bifo i ronem mo kilim ol disaepol blong Jisas?’

Long tri yia we Sol i prij long Damaskes, ol man Jiu oli no laekem hem nating mo oli mekem plan blong kilim hem i ded. Be ol brata oli harem plan ya mo oli givhan long Sol blong i ronwe. Oli haedem hem long wan bigfala basket, mo oli yusum rop blong slakem hem i godaon, i gotru long wan bigfala hol long stonwol blong taon ya.

Taem Sol i go long Jerusalem, hem i wantem joen wetem ol brata, be oli fraet long hem. Nao disaepol Banabas we i gat kaen fasin, i tekem Sol i go long ol aposol, mo i mekem olgeta oli luksave se Sol i jenisim fasin blong hem finis. Nao Sol i joen wetem kongregesen long Jerusalem mo i gohed strong blong talemaot gud nius. Biaen, ol man oli singaot hem se Pol.