Ol man Isrel oli lego hil ya Sinae, mo oli wokbaot long draeples ya Paran, go kasem wan ples we nem blong hem Kades. Nao Jehova i talem long Moses se: ‘Yu sanem 12 man, wan long evri laen, oli go spae long kantri ya Kenan, we bae mi givim long ol man Isrel.’ Ale Moses i jusumaot 12 man, mo i talem long olgeta se: ‘Yufala i go lukluk kantri ya Kenan mo faenemaot sipos graon ya i gud. Yufala i traem luk sipos ol man oli strong no nogat, mo sipos ol man oli stap long ol haos tapolen no long ol taon.’ Nao ol 12 spae ya oli wokbaot i go long Kenan. Tu long olgeta, hemia Josua mo Keleb.

Afta we 40 dei i pas, ol spae oli kambak, mo oli karem ol fig, ol grenadin, mo ol grep. Oli talem se: ‘Kantri ya i gud tumas, be ol man oli strong mo ol taon oli gat ol bigbigfala stonwol i goraon long olgeta.’ Be Keleb i talem se: ‘!Yumi strong ya! !Yumi naf blong winim olgeta! !Yumi go kilim olgeta naoia!’ ?Yu save from wanem Keleb i talem olsem? From we hem mo Josua, tufala i trastem Jehova. Be ol narafala 10 spae ya oli talem se: ‘!Nogat! !Ol man ya oli bigbigfala man! !Yumi olsem anis nomo!’

Ol man Isrel oli harem nogud. Nao oli stat blong komplen, se: ‘!Yumi jusum wan narafala lida blong yumi! !Yumi gobak long Ijip! Sipos yumi  go long Kenan, ol man bae oli kilim yumi evriwan i ded.’ Josua mo Keleb i talem se: ‘Yufala i no fraet. Yufala i obei long Jehova nao hem bae i lukaot gud long yumi.’ Be ol man Isrel oli no lesin. !Oli wantem kilim Josua mo Keleb i ded!

?Jehova i mekem wanem? Hem i talem long Moses se: ‘!Man! Mi mekem fulap samting blong givhan long ol man Isrel, be oli no wantem obei long mi yet. Taswe, bae oli stap 40 yia long draeples ya, gogo oli ded. Ol pikinini blong olgeta wetem Josua mo Keleb, olgeta nomo bae oli go long kantri ya we mi mi promes blong givim long olgeta.’