HAF 7
?Jisas Hem i Hu?
Jehova i sanem Jisas i kam long wol. 1 Jon 4:9
Sipos yumi wantem mekem Jehova i glad, yumi mas lesin tu long wan enjel long heven we hem i gat bigfala paoa. Jehova i mekem enjel ya longtaem bifo we hem i mekem Adam.
Biaen, Jehova i putum laef blong enjel ya i go long bel blong Meri, wan yang gel we i no save man yet. Meri i bonem pikinini ya long Betlehem. Oli putum nem long hem se Jisas.—Jon 6:38.
Taem Jisas i stap long wol, hem i soemaot ol fasin blong God stret. Hem i gat kaen fasin, i lavem ol man, mo ol man oli glad blong kam long hem. Jisas i gat strong tingting blong tijim trutok long saed blong God long ol man.
Jisas i mekem i gud long ol man, be ol man oli no laekem hem nating. 1 Pita 2:21-24
Ol lida blong ol skul oli no laekem Jisas nating, from we hem i soemaot ol giaman tijing blong olgeta, mo i soemaot we ol fasin blong olgeta i no stret.
Jisas i mekem ol sikman oli gud bakegen, mo hem i mekem sam man we oli ded oli laef bakegen.
Ol lida blong skul oli pulum ol man Rom blong oli wipim Jisas mo kilim hem i ded.
