Sean Gladwell/Moment via Getty Images
!LUKAOT GUD OLTAEM!
Ol Gavman Oli Spenem Bitim 2 Taosen Bilian Dola Long Ol Tul Blong Faet—?Baebol i Talem Wanem?
Long 2022, mane we ol gavman raon long wol oli spenem long ol tul blong faet i kasem 2.24 taosen bilian U.S. dola, hemia i plante moa i bitim ol yia bifo. Wan bigfala risen, hemia from we Rasia i atakem Yukren. Long Eprel 2023, Stockholm International Peace Research Institute (SIPRI) i mekem wan ripot long saed blong yia 2022. Hemia sam save we i kamaot long ripot ya:
Mane we ol gavman blong Yurop oli spenem long ol tul blong faet “i go antap 13 pesen long yia ya. Hemia i bitim ol narafala yia afta long 1991.”
“Mane we Rasia i spenem i go antap samwe 9.2 pesen. I minim se naoia hem i kam nambatri gavman long wol we i spenem bigfala mane long ol tul blong faet.”
Yunaeted Stet i spenem moa mane long ol tul blong faet i bitim ol narafala kantri, mo i “spenem 39 pesen blong ol mane we ol gavman blong fulwol oli spenem long ol tul blong faet.”
Nan Tian, we i joen blong raetem ripot ya blong SIPRI, i talem se: “Taem yumi luk se mane we ol gavman raon long wol oli spenem long ol ami blong olgeta i go antap, hemia i soemaot se wol blong yumi i stap kam moa nogud.”
Baebol i talemaot finis se ol problem bitwin ol politik paoa bambae i kam antap moa, mo i tokbaot tu se i gat wan rod nomo blong gat trufala pis.
Baebol i talemaot se ol faet bambae oli kam antap
Baebol i tokbaot taem ya we yumi stap laef long hem, se “taem long en.”—Daniel 8:19.
Buk blong Daniel i talemaot se long taem ya, bambae i gat ol wol paoa we oli stap faet mo “puspusum” olgeta. Hemia i minim se ol gavman ya oli traem blong kam strong moa long ol narafala gavman, mo blong kasem paoa oli yusum “ol gudfala samting,” o spenem plante mane, long ol ami blong olgeta.—Daniel 11:40, 42, 43.
Blong lanem moa long saed blong profet tok ya blong Baebol, wajem video ya Ol Profet Tok We Oli Kamtru Finis—Daniel Japta 11.
Rod blong mekem se i gat trufala pis
Baebol i talem se God bambae i tekemaot ol gavman blong man. Bambae hem i “stanemap wan kingdom we bambae i neva foldaon. Mo kingdom ya bambae i no go long han blong wan narafala man. Bambae hem i smasem mo i finisim olgeta kingdom ya, mo hem nomo bambae i stanap olwe.”—Daniel 2:44.
I no longtaem, bambae Jehova a God i mekem wan samting we ol man oli no naf blong mekem, hemia blong mekem se i gat trufala pis we i stap blong olwe. ?Bambae hem i mekem olsem wanem? Gavman blong hem long heven, hemia Kingdom, bambae i spolem ol tul blong faet mo i finisim ol wo.—Ol Sam 46:8, 9.
Blong lanem moa long saed blong ol samting we Kingdom blong God bambae i mekem, ridim atikol ya “Taem Kingdom Blong God i Rul, Ol Man Bambae Oli ‘Gat Gudfala Laef’”
a Jehova i prapa nem blong God.—Ol Sam 83:18.