Raon long wol, plante man oli intres long fasin ya blong no kakae o dring eni samting we i kamaot long animol.

•   “Fasin blong no kakae mit, hem i wan kaen laef o tingting we ol man oli gat, nao oli mekem bes blong olgeta blong no spolem o kilim animol blong kakae, mekem klos o eni narafala samting.”—The Vegan Society.

 Sam man oli no kakae mit from we oli kea long ol animol, mo sam narafala oli mekem olsem from oli wantem lukaot gud long envaeronmen, long helt blong olgeta, o from sam kaen bilif we oli gat.

•   “Fasin blong no kakae mit, i defren long fasin ya blong no kakae sam kaen kakae, from we plante taem ol man oli luk fasin ya olsem wan bilif, wan fasin blong laef we man i mas jusum, mo wan rod we wanwan man i save folem blong mekem wol i kam gud moa.”—Britannica Academic.

 ?Olsem wanem? ?Fasin blong no kakae mit, i wan rod blong mekem wol i kam gud moa? ?Baebol i talem wanem?

 Baebol i talem se Krieta blong yumi, Jehova God, a i luk ol man se oli hae moa long ol animol, mo hem i givim wok ya long ol man blong oli lukaot long ol animol. (Jenesis 1:27, 28) Samtaem afta, God i givim raet long ol man blong oli save kakae ol animol. (Jenesis 9:3) Be, hem i no givim raet blong man i mekem i nogud long ol animol.—Ol Proveb 12:10.

 Folem Baebol, sipos yumi kakae mit o nogat, hemia i prapa desisen blong yumi. b Jus blong yumi bambae i no mekem se yumi gud moa long ae blong God. (1 Korin 8:8) Mo yumi no mas jikim narafala from desisen we hem i mekem, blong jusum samting we hem i wantem kakae.—Rom 14:3.

 Baebol i soemaot se fasin blong laef blong yumi, bambae i no save stretem ol problem long wol. Plante problem we ol man oli no save stretem, oli kamaot from politik, posisen, mo mane. Baebol i talem se:

•   “Samting we i kruked, man i no save stretem.”—Prija 1:15.

 Krieta blong yumi bambae i stretem ol problem we yumi stap fesem tede. Baebol i yusum wan pijatok blong tokbaot samting we God bambae i mekem.

•   “Nao mi luk wan niufala heven mo wan niufala wol. Heven mo wol we tufala i stap fastaem, tufala i lus finis, mo solwota tu i no moa stap.”—Revelesen 21:1.

 God bambae i tekemaot ol gavman blong man, o ‘heven we i stap fastaem,’ mo i putum “wan niufala heven,” hemia Kingdom o gavman blong God long heven. Kingdom blong hem bambae i tekemaot ‘wol we i stap fastaem,’ hemia ol rabis man, mo bambae hem i rulum “wan niufala wol,” o ol man we oli glad blong obei long hem.

 Aninit long rul blong Kingdom blong God nomo, ol man bambae oli lanem blong laef long pis wetem ol animol mo respektem envaeronmen.—Aesea 11:6-9.