Yu Save Trastem Baebol

Namba Seven Politik Paoa Blong Wol

Ol samting we bambae yumi tokbaot long saed blong namba seven bigfala politik paoa blong wol, i save givhan long yumi blong luksave se Baebol i kamaot long God, mo se yumi save trastem Baebol. Mo tu, yumi luksave se ol tok blong Baebol i givim wan nambawan promes long yumi. ?Wanem promes? Promes ya se, ol trabol we i kamaot long nogud rul blong man, mo we i mekem ol man oli safa, bambae i finis.

YUMI laef long wan taem we i spesel mo i impoten tumas. Long taem blong yumi, namba seven politik paoa blong wol we Baebol i tokbaot, hem i kamtru. Sikis politik paoa oli rul long taem we ol man oli raetem Baebol. Taswe stori blong olgeta i stap long Baebol. Namba seven politik paoa ya nomo we i no gat stori blong hem long Baebol, be i gat profet tok long saed blong hem i stap. Baebol i tokbaot ol seven politik paoa ya no “king” ya, se: “Faef king blong olgeta oli foldaon finis, i gat wan i stap holem nem blong king naoia, mo i gat wan we i no kamtru yet. Taem we hem i kamtru, bambae hem i stap smoltaem nomo.” a—Revelesen 17:10.

Oli raetem tok ya bitim 1,900 yia finis. Long taem ya, faef long ol seven “king” no politik paoa blong wol “oli foldaon finis.” Ol faef politik paoa ya, i gat Ijip, Asiria, Babilon, Media mo Pesia, Gris. Tok ya se ‘wan i stap naoia’ i stap tokbaot politik paoa blong Rom. Be Rom i no save stap olwe. Bambae i gat wan moa politik paoa, mo profet tok i talem long saed blong hem se: “[Hem] i no kamtru yet.” !Biaen, namba seven “king” ya i kamtru, stret olsem profet tok blong Baebol i talem! ?Namba seven “king” ya, hem i wanem politik paoa? ?Bambae hem i rul olwe? Sipos no, ?bambae hem i finis olsem wanem? Baebol i givim klia ansa long ol kwestin ya.

Yumi Save Trastem Ol Profet Tok Blong Baebol

Namba seven politik paoa blong wol i stat blong kamtru taem wan kantri long notwes blong ol ples we Rom i rul long olgeta, i kasem paoa. Kantri ya hemia Inglan. Long ol yia 1760, kantri ya i wan strongfala neson finis. Inglan i stap kam strong moa long saed blong mane mo paoa, gogo, long ol yia 1800, hem i rij moa bitim ol narafala neson long wol, mo i strong moa bitim ol narafala neson. Wan buk i talem se: “Inglan i rul long plante moa ples i bitim ol narafala politik paoa bifo long hem.” Ples we Inglan i rul long hem “i bigwan olsem 2,800 milian hekta, mo i gat 372 milian man i stap long ol ples ya.”

Taem Wol Wo Wan i gohed (1914-1918) Inglan i fren gud wetem Amerika, we hem i wan long ol ples we Inglan i rul long hem. ?Wanem i hapen biaen? Tufala kantri ya Inglan mo Amerika, tufala i joen blong mekem wan bigfala politik paoa we i stap rul kasem tede.—Lukluk bokis ya,  “Tufala Kantri Ya i Fren Gud.”

Profet tok blong Revelesen 17:10 i laenap wetem wan narafala profet tok long buk blong Daniel. Daniel i raetemdaon wan vison we God i soem  long King Nebukadnesa. King ya i luk “wan bigfala pija blong man” i stanap long fes blong hem. (Daniel 2:28, 31-43) Daniel i talemaot mining blong drim ya. Hem i talem se ol haf blong bodi blong man ya oli saen blong ol politik paoa, stat long Babilon we i stap rul long taem ya. (Ijip mo Asiria tufala i foldaon finis.) Ol samting we i hapen long ol yia biaen, oli soemaot se mining we Daniel i talem, hem i stret nomo:

Hed blong pija ya oli wokem long gol. Hed ya i minim politik paoa blong Babilon.

Jes mo tufala han blong hem oli wokem long silva. Oli minim politik paoa blong Media mo Pesia.

Ples blong strap go kasem as blong hem oli wokem long bras. Hemia i minim politik paoa blong Gris.

Tufala leg blong hem oli wokem long aean. Tufala i minim politik paoa blong Rom.

Tufala leg blong hem daon oli wokem long aean wetem red graon. Tufala i soemaot se, long taem ya we Inglan mo Amerika i rul, bambae ol pati blong politik oli raorao nomo, mo ol man tu bambae oli no save joen gud.

Revelesen 17:10 i talem se namba seven politik paoa ya “bambae hem i stap smoltaem nomo.” ?Taem ya i longfala olsem wanem? ?Bambae politik paoa ya i lus olsem wanem? ?Wanem bambae i hapen biaen? Daniel i givim save long saed blong ol kwestin ya.

Wan Promes We Yu Save Trastem

Daniel i tokbaot pija ya, nao biaen hem i talem se: “I gat wan ston i kamaot hem wan antap long wan bigfala hil, nao i foldaon i kam bangem bigfala pija ya long tufala leg blong hem daon, we oli wokem tufala long aean wetem red graon, mo i smasem tufala, we tufala i brobrok long ol smosmol pis.” (Daniel 2:34) !Hemia samting blong fraet ya! ?Tok ya i minim wanem?

Daniel i talem se: “Nao long taem blong ol [las] king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king [blong wol ya], nao bambae hem i rul oltaem gogo i no save finis.” b (Daniel 2:44, 45) I gud yumi makem ol impoten save ya:

1. God nomo i “stanemap” Kingdom ya we bambae i winim ol narafala kingdom, mo we ston i pija blong hem. Ston ya i “kamaot hem wan,” i min se i no wan man we i stanemap Kingdom ya. Taswe i stret nomo we yumi singaot Kingdom ya se Kingdom blong God.

2. Kingdom blong God bambae i “flatemgud” ol kingdom blong man, we i minim namba seven politik paoa blong wol tu. ?From wanem? From we ol kingdom blong man oli no wantem lego paoa blong olgeta. Bambae oli faet agensem God long las bigfala faet ya we Baebol i kolem Amagedon. Baebol i talem klia se “ol king blong evri ples long wol” bambae oli joen long faet ya.—Revelesen 16:13, 14, 16.

  3. Kingdom blong God “bambae i no save finis samtaem.” Hemia i defren long ol gavman blong man we oli stap jenis oltaem. Mo tu, Kingdom ya bambae i rul long olgeta ples blong wol.—Daniel 2:35, 44.

Taem God i spolem ol man we oli agensem hem, bambae hem i mekem profet tok blong Jenesis 3:15 i kamtru fulwan. Jisas Kraes, spesel pikinini blong woman ya, bambae i smasem Setan we i olsem snek ya, wetem ol pikinini blong hem. (Galesia 3:16) Ol pikinini blong Setan, i minim tu ol man we oli folem ol rabis fasin blong Setan, mo ol man we oli wantem se man nomo i rul, i no God mo Kraes we i rul.—Ol Sam 2:7-12.

Naoia, wan kwestin we i impoten tumas i stanap: ?Las faet ya bambae i kamaot wetaem? ?“Ston” ya we i minim Kingdom blong God, bambae i tekemaot rul blong ol man wetaem? Baebol i talem ansa blong tufala kwestin ya. Hem i talemaot wan “saen” we bambae i soemaot se yumi stap long ol las dei.—Matiu 24:3.

!Yu Mas Luksave “Saen” Ya!

I gat plante samting we oli mekemap saen ya, olsem ol faet long olgeta ples blong wol, “graon i seksek bigwan,” “ol strong sik,” mo bigfala “hadtaem blong kasem kakae.” (Luk 21:10, 11; Matiu 24:7, 8; Mak 13:8) Wan narafala samting we i soemaot se yumi stap long “ol las dei,” hemia se ol man oli no moa folem ol rul blong Baebol long wosip mo fasin blong olgeta. (2 Timoti 3:1-5, NW) ?Olsem wanem? ?“Ol samting ya” evriwan oli kamtru finis? (Matiu 24:8) !Yes! Oli kamtru long bigfala fasin, taswe plante man oli fraet long samting we i save hapen long fiuja. Wan niuspepa (The Globe and Mail) i talem se: “Sam long ol saentis mo ol narafala man we yumi respektem olgeta from bigfala save we oli gat, oli stap talem sam tok long saed blong fiuja we i mekem yumi fraet. Oli talem se laef blong olgeta man bambae i finis.”

Be oli rong long wan bigfala samting. I no olgeta man we bambae oli lus. Kingdom blong God bambae i tekem aksen, mo samting ya nao bambae i mekem se laef i no finis long wol ya. Taem Jisas Kraes i talem saen ya we i soemaot se en i klosap, hem i talem se: “Gud nius ya blong kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW) ?Olsem wanem? ?Profet tok ya i kamtru? !Yes!

Tede, ol Witnes blong Jehova oli stap talemaot Kingdom blong God long bitim 230 kantri. Mo tu, oli printim wan magasin we nem blong hem se Wajtaoa i Talemaot Kingdom Blong Jehova. Jehova nao prapa nem blong God. (Eksodas 3:14, futnot) Wok blong ol Witnes blong tijim ol man long Baebol, i givhan long plante plante man mo famle blong oli sakemaot ol rabis fasin, mo oli lanem ol klin fasin mo fasin blong mekem pis, olsem God i wantem. (1 Korin 6:9-11) From samting ya, plante milian man long olgeta ples blong wol oli gat strong tingting se bambae God i sevem olgeta, taem Kingdom blong hem i stretem ol trabol long wol.

Yes, bambae oli luk wetem prapa ae blong olgeta, se ol tok blong Lodsprea we Jisas i tijim ol man long hem, bambae i kamtru. Long prea ya hem i talem se: “Kingdom blong yu bambae i kam. Samting we yu yu wantem bambae i kamaot long wol ya, olsem we i kamaot finis long heven.” (Matiu 6: 10, King James Version) ?Yu yu ting se laef long wol ya bambae i olsem wanem, taem ol man oli lavem God mo oli obei long hem? Ol vas blong Baebol we oli kam biaen, oli save givhan long yu blong yu luksave from wanem tok ya “gud nius” i stret nomo.

Taem Samting We God i Wantem i Kamaot Long Wol . . .

● Ol faet bambae oli finis, mo tru pis i stap. “Hae God i . . . mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.” (Ol Sam 46:8, 9) “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11.

● Bambae i gat plante kakae blong olgeta man. ‘Bambae i gat plante kakae, we ol hil oli fulap gud long hem.’—Ol Sam 72:16.

● Bodi blong ol man bambae i strong gud. “Bambae i no moa gat man . . . we i save talem se hem i sik.”—Aesea 33:24.

● Olgeta man bambae oli gat gudfala haos. “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.”—Aesea 65:21, 22.

● Evri samting we oli mekem man i safa, bambae oli finis. “God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

?Olsem wanem? ?Yu yu laekem ol promes ya? Sipos yes, ol Witnes blong Jehova oli askem long yu blong yu kasem moa save blong Baebol. Sipos yu mekem olsem, bambae yu luksave plante moa samting we oli soemaot se rabis rul blong man bambae i finis i no longtaem. Bambae yu luksave tu se i stret blong trastem Baebol fulwan, from we i tru nomo se hem i kamaot long God.—2 Timoti 3:16. c

[Ol futnot]

[Bokis/Foto blong pija long pej 17]

 TUFALA KANTRI YA I FREN GUD

Long manis Julae 2010, ol man blong niuspepa mo televisin oli toktok wetem praeminista blong Inglan, David Cameron, mo presiden blong Amerika, Barack Obama. Presiden ya i talem se: “I no gat tok we i naf blong eksplenem spesel fasin fren we Amerika i gat wetem Inglan. Tufala kantri ya i kamaot long wan mama nomo. Tufala kantri ya i gat sem tingting long saed blong wanem samting i impoten mo wanem samting i no impoten. . . . Antap long evri samting, tufala kantri ya i fren gud oltaem from we samting ya i save mekem se evri samting we tufala i tingting strong long hem, oli save kamtru. . . . Taem Amerika mo Inglan i stanap tugeta, ol man blong tufala kantri ya mo blong ol narafala kantri blong wol, oli harem se oli stap sef, mo oli gat plante moa samting tu. Blong talem long sot tok nomo, Amerika i no gat wan fren we i givhan moa long hem, mo i joen gud moa wetem hem, i bitim Inglan.”

[Tok blong pija long pej 16]

(Lukluk niuspepa)

Babilon

Media mo Pesia

Gris

Rom

Inglan mo Amerika

[Tok blong pija long pej 18]

Baebol i promes se, taem Kingdom blong God i rul bambae i gat tru pis

[Tok blong pija long pej 15]

Time line: Egyptian wall relief and bust of Nero: Photograph taken by courtesy of the British Museum; Persian wall relief: Musée du Louvre, Paris