OL MAN blong raetem Baebol oli finisim wok blong olgeta klosap long yia 100. Ol tingting we oli lidim jos blong bilif long Triniti oli kamaot bitim tu handred yia biaen, long yia 325. Long taem ya, i gat wan bigfala miting long taon ya Nicaea long Esia Maena, we naoia hem i Iznik long Teki. Wan buk (New Catholic Encyclopedia) i talem se long miting ya, hemia fastaem we oli talemaot tijing we jos i agri long hem, wetem tijing ya tu se God hem i hu mo Jisas hem i hu. ?From wanem oli mas tokbaot God mo Jisas bakegen? Ol man oli finisim Baebol plante handred yia bifo long taem ya. ?Olsem wanem? ?Baebol i no eksplenem klia God mo Jisas?

Taem man ya Constantine i rul long ol ples we oli stap aninit long gavman blong Rom, ol man we oli talem se oli Kristin oli gat defdefren tingting long God mo Jisas. ?Jisas hem i God, no God i mekem Jisas? Blong ansarem kwestin ya, Constantine i singaot ol lida blong jos oli kam long Nicaea. Hem i mekem olsem, i no from we hem i wantem faenemaot trufala tijing long God mo Jisas. Hem i mekem from we hem i no wantem se jos i mekem ol man we hem i rul long olgeta oli seseraot.

Plante handred bisop oli stap long miting ya, ale Constantine i askem long olgeta blong oli gat wan tingting nomo. Be samting ya i no kamtru. Ale hem nomo i talem wan tingting, se Jisas i “wan bodi” (homoousios) wetem Papa blong hem, mo i askem long olgeta blong oli agri long tingting ya. Be tok ya blong hem i no klia nating. Tok ya i no kamaot long Baebol, be i stanap long waes blong ol man Gris nomo. Tingting ya i kam olsem fandesen blong tijing blong Triniti we jos i agri long hem biaen. Yes, klosap long yia 400, Triniti i kam wan tijing we i sem mak long tijing blong Triniti tede, hemia se tabu spirit i namba tri haf blong God.

Jisas i talem se: “Ol man blong mekem tru wosip, bambae oli mekem wosip long Papa blong yumi long . . . trutok.” (Jon 4:23, New World Traslation) Trutok ya i stap long Baebol. (Jon  17:17) ?Olsem wanem? ?Baebol i tijim se Papa mo Pikinini mo tabu spirit trifala i wan nomo?

Fas samting, se tok ya “Triniti” i no stap long Baebol. Namba tu samting, se Jisas i neva talem se hem i hae olsem God. Hem i bodaon long God, i mekem wosip long hem. (Luk 22:41-44) Namba tri samting, se taem Jisas i laef bakegen long ded olsem wan spirit man, hem i singaot ol man blong hem se “ol brata blong mi.” (Matiu 28:10) ?Olsem wanem? ?Olgeta ya oli brata blong Hae God tu? !Nogat! Bilif blong olgeta long Jisas we hem i fasbon Pikinini blong God i mekem se olgeta tu oli kam ol pikinini blong wan Papa nomo. (Galesia 3:26) I gud yu skelem sam moa vas wetem bilif we i kamaot long miting ya long Nicaea.

Bilif we i kamaot long miting long Nicaea:

“Mifala i bilif . . . long wan Masta Jisas Kraes . . . we hem i wan bodi wetem Papa, hem i God, hem i Laet, mo hem i God ya we i tru.”

Ol tok blong Baebol:

• “Papa blong mi, . . . hem i hae moa long mi [Jisas].”—Jon 14:28. *

• “Mi [Jisas] mi stap gobak long Papa blong mi we hem i Papa blong yufala tu, mo i God blong mi mo i God blong yufala tu.”—Jon 20:17.

• “Yumi gat wan God nomo blong yumi. Hem i Papa blong yumi.”—1 Korin 8:6.

• “Yumi talem tangkiu long God we hem i God mo Papa blong Jisas Kraes, Masta blong yumi.”—1 Pita 1:3.

• “God, hem i hed blong Kraes.”—1 Korin 11:3. *